VOV4.Êđê- Ti anôk bi kƀĭn tal 5 Êpul khua kiă kriê bruă Đảng gưl dlông 13 pŏk leh hrue 4/5, lehanăn srăng bi kƀĭn truh hrue 10/5, Khua gĭt gai Đảng Nguyễn Phú Trọng brei thâo, ngă hdră mă bruă kơ thŭn 2022, lehanăn klah čŭn klei bi kƀĭn tal 21 mơ̆ng Êpul khua kiă kriê gưl dlông kơ bruă kdơ̆ng hŏng klei ƀơ̆ng ngăn, klei ngă amâo mâo djŏ, Phŭn bruă kđi čar jao leh kơ Dhar bruă kiă kriê bruă knuă Gưl dlông gĭt gai, hgŭm hŏng dŭm anôk bruă djŏ tuôm, ksiêm duah bi pral, kñăm mkŏ mjing hdră êlan mkŏ mjing Êpul khua kiă kriê gưl čar kơ bruă kdơ̆ng hŏng klei ƀơ̆ng ngăn, klei ngă amâo mâo djŏ. Mơ̆ng klei đru bi mguôp klei blŭ kơ hdră êlan mkŏ mjing, snăn jih jang 63/63 bruă Đảng čar, bruă Đảng ƀuôn prŏng bi tŭ ư leh hŏng hdră êlan anei. Khua gĭt gai Đảng Nguyễn Phú Trọng mtă kơ Gưl dlông ksiêm duah, mă klei blŭ lehanăn mâo klei bi mklă kơ dŭm klei akâo ba mdah hŏng Phŭn bruă kđi čar, boh nik ơ jih jang hdră êlan Êpul khua kiă kriê gưl čar kdơ̆ng hŏng klei ƀơ̆ng ngăn, klei ngă amâo mâo djŏ, kñăm kyua kjăp hĭn klei kiă kriê hlue ngă hdră mtrŭn hŏng klei ktang bruă bi kdơ̆ng hŏng klei ƀơ̆ng ngăn, klei ngă amâo mâo djŏ hlăm kluôm Đảng, jih jang phung ƀuôn sang lehanăn lĭng kahan./.

Pô mblang: Y-Khem Niê