VOV4.Êđê- Adŭ hriăm ƀiă hđeh sang hră, lu sang hră điêt hlăm sa alŭ wăl, anăn jing sa hlăm dŭm mta phŭn ngă kơ čar Gia Lai kƀah êbeh 3.400 čô nai mtô ti anăp thŭn hriăm mrâo. Êjai anăn, bruă mklin adŭ, mklin sang hră ti alŭ wăl anei hlăm hruê mmông êgao hluê ngă mâo klei êmưt êdi, hmăi kơ mta kñăm bi khuăt klei ngă bruă, mđĭ hnơ̆ng tŭ jăk bruă mtô mjuăt bi hriăm ăt msĕ hŏng bruă mgaih msir klei kƀah nai mtô.

 Jing alŭ wăl mâo lu sang hră hnơ̆ng điêt, ƀiădah 4 thŭn hlue ngă hdră mtrŭn dăp sang hră, adŭ hriăm, kdriêk Phú Thiện, čar Gia Lai knŏng hrŏ 3 sang hră. Nguyễn Thị Hoa - Khua adŭ bruă sang hră mtô bi hriăm kdriêk Phú Thiện brei thâo, mâo lu mta phŭn ngă kơ alŭ wăl ka dưi hlue ngă mtam bruă mbŏ adŭ, bi mŭt sang hră đđiêt:

“Boh sĭt, ti sang hră anei snăn dưi bi mguôp thiăm dŭm anôk mơh. Leh dưi rŭ mdơ̆ng anôk phŭn snăn srăng bi mŭt, dưi msir mgaih truh thŭn 2025 kơh dưi msir mgaih. Blei kdrăp mnơ̆ng snăn dưi blei, ƀiădah ñu kbưi snăn ƀuh kriê dlăng amâo tŭ dưn ôh. Bi dŭm sang hră giăm snăn klă sĭt hlăm wưng kơ anăp srăng bi mŭt thiăm dŭm sang hră dơ̆ng. Anăp anei, klă sĭt srăng bi mŭt mlir gưl”

Ti să Ia Sol kdriêk Phú Thiện: sang hră gưl 1 Thắng lợi 9 adŭ leh anăn Sang hră gưl 2 Trưng Vương 12 adŭ, ƀiădah 4 thŭn êgao amâo bi mŭt mlir gưl hlue si klei kčah ôh

Hlue si klei ktuê dlăng mơ̆ng Knơ̆ng bruă sang hră mtô bi hriăm leh anăn Knơ̆ng bruă kriê dlăng bruă knuă Gia lai, ară anei dŭm kdriêk Phú Thiện, An Khê, Đức Cơ ăt adôk mâo lu hđeh sang hră gưl sa leh anăn gưl 2 hnơ̆ng điêt, ka truh 10 adŭ/sang hră leh anăn ti gŭ 20 čô hđeh sang hră/adŭ. Ti dŭm kdriêk Ia Pa, Kbang, Kông Chro, Krông Pa, Chư Păh, Chư Pưh mâo truh 21 sang hră hđeh mâo hnơ̆ng 5 adŭ. Dŭm boh sang hră anei brei bi mŭt kyua amâo djăp klei găl kơ ênoh adŭ hlue si Phŭn bruă sang hră mtô bi hriăm kčah mtrŭn.

      Amâo djŏ knŏng kƀah klei gĭr hlăm bruă mbŏ adŭ, bi mŭt sang hră ôh, bruă sang čư̆ êa dŭm kdriêk lŏ dơ̆ng kƀah klei bi hgŭm hŏng bruă sang hră čiăng bi mŭt sang hră mlir gưl. Lê Duy Định- Khua Knơ̆ng bruă sang hră mtô bi hriăm Gia Lai brei thâo:

“Hmei kčĕ bi mŭt 6 boh sang hră gưl 3 mâo ênoh adŭ ti gŭ 15 ti dŭm kdriêk Kbang, Đức Cơ, Phú Thiện, Ia Pa, Krông Pa.  Hmei mâo hră mơar mtă kơ Knơ̆ng bruă sang čư̆ êa dŭm kdriêk anei hưn mthâo kơ dŭm sang hră gưl 2 čiăng bi mŭt, ƀiădah amâo ƀuh dŭm kdriêk wĭt lač ôh. Akâo kơ gưl bruă đảng kdriêk ăt mđing dlăng. Tơdah amâo mđing dlăng, srăng amâo dưi msir mgaih ôh klei anei”.

Mbŏ adŭ, bi mŭt sang hră đđiêt srăng đru msir mgaih klei kƀah nai mtô ti Gia Lai

 Hlue ngă bruă lŏ dăp dŭm anôk bruă sang hră, mơ̆ng 2018 truh ară anei, Gia Lai hrŏ leh 4 anôk mtô bi hriăm nanao leh anăn hrŏ 83 sang hră, 515 adŭ, 406 anôk bi hriăm. Êngao kơ dŭm kdriêk, wăl krah ngă jăk, snăn ăt adôk mâo lu alŭ wăl ka jăk msĕ si wăl krah Ayun Pa, dŭm kdriêk Phú Thiện, Mang Yang, Đức Cơ, Ia Grai, ƀuôn prŏng Pleiku… ênoh sang hră đđiêt bi mŭt knŏng ƀiă. Klei anei mklăk wĭt hŏng klei gĭt mbŏ adŭ, bi mŭt snag hră čiăng msir mgaih klei kƀah nai mtô, bi khuăt hdră mă bruă leh anăn mđĭ hnơ̆ng jăk mtô bi hriăm.

Lŏ dơ̆ng pŏk ngă Hdră mtrŭn 19/NQ-TƯ kơ bruă sang hră mtô bi hriăm, wưng 2022-2025, čar Gia lai srăng hrŏ thiăm 8 anôk bruă, 17 sang hră, 97 anôk mtô. Dưi ngă klei anei, čar srăng mkiêt mkriêm êbeh 1700 čô nai mtô. Hŏng ênoh nai mtô mrâo dưi mâo gưl dlông mbŏ, Gia Lai srăng klă klơ̆ng dưi msir mgaih klei kƀah nai mtô ară anei.

 Hlăm klei bi kƀĭn bruă sang hră mkŏ mjing krah mlan 8/2022, Nguyễn Thị Thanh Lịch-  K’iăng Khua knơ̆ng bruă sang čư̆ êa čar Gia lai mtă kơ dŭm kdriêk, wăl krah, ƀuôn prŏng brei ngă bi jăk bruă dăp, lŏ mkŏ mjing dŭm anôk bruă sang hră čiăng msir mgaih klei kƀah nai mtô, rơ̆ng klei dưi nao sang hră kơ phung hđeh:

“Jao leh kơ Knơ̆ng bruă sang hră mtô bi hriăm leh anăn Knơ̆ng bruă knuă ksiêm dlăng lač kơ djăp anôk, grăp alŭ wăl. Hŏng čar, amâo lŏ mâo êlan mkăn ôh, brei hlue ngă mtam čiăng rơ̆ng djăp ênoh nai mtô. Kâo brei kơ dŭm alŭ wăl mjêč pŏk ngă mtam. Hmei srăng lŏ dơ̆ng ktuê dlăng, ksiêm dlăng bruă hlue ngă anei, mguôp hŏng bruă klam pô gĭt gai”.

Pô mblang: H’Zawut Ƀuôn Yă