VOV4.Êđê- Aguah hruê 12/1, ti anôk bruă Khua lăn čar, adŭ bruă Khua lăn čar mkŏ mjing leh Klei bi kƀĭn ksiêm wĭt hdră mă bruă thŭn 2021 lehanăn pŏk ngă bruă hlăm thŭn 2022. Blŭ hrăm ti knăm anei, Khua lăn čar Nguyễn Xuân Phúc bi mni adŭ bruă Khua lăn čar thŭn 2021 mâo leh ai êwa mrâo, gĭr hlăm hdră đru kčĕ.

Mđĭ lar knhuah gru anăn, thŭn 2022, adŭ bruă Khua lăn čar brei pral thâo klă klei mâo mơ̆ng lăn čar čiăng ngă jăk hĭn hdră đru kčĕ kơ Khua lăn čar lehanăn K’iăng khua lăn čar, mđĭ lar knhuah gru hgŭm mguôp, hluê ngă tŭ jing hdră đru kčĕ, đru mguôp kơ klei tŭ jing mơ̆ng lăn čar. Khua lăn čar ăt bi mklă, knuă druh adŭ bruă Khua lăn čar brei mđĭ lar ai tiê ba anăp, mjuăt bi hriăm, pral ksiêm dlăng, mđĭ klei thâo čiăng bi leh jih bruă klam đru kčĕ mâo Đảng, Knŭk kna jao./.

Pô mblang: H’Nêč Êñuôl