VOV4.Êđê - Aguah mbruê 7/2, êlâo kơ kčưm hlăm hruê mă bruă tal êlâo leh wưng mdei tết Nguyên đán Nhâm Dần, k’iăng Khua knŭk kna Phạm Bình Minh mbĭt hŏng dŭm čô k’iăng Khua knŭk kna jing Lê Minh Khái, Vũ Đức Đam, Lê Văn Thành mâo leh klei bi tuôm hŏng phung knuă druh, phung mă bruă knŭk kna ti adŭ bruă knŭk kna. Blŭ hlăm klei bi tuôm anăn, bi ala kơ phung khua gĭt gai knŭk kna, k’iăng Khua knŭk kna Phạm Bình Minh bi mni dŭm klei tŭ jing, đru mguôp mơ̆ng adŭ bruă knŭk kna hŏng dŭm bruă klam ngă bruă mơ̆ng knŭk kna, Khua knŭk kna, hơêč hmưi kơ jih jang phung mă bruă knŭk kna, mnuih mă bruă thŭn mrâo bŏ hŏng klei suaih pral, yâo mơak leh anăn lŏ mâo lu boh tŭ dưn hĭn hlăm klei ngă bruă. Thŭn 2022 jing thŭn tal 2 tui ngă hdră êlan mđĭ kyar bruă duh mkra – ala ƀuôn wưng thŭn 2021 -2025 leh anăn hdră êlan krŭ wĭt, mđĭ kyar bruă duh mkra, kyuanăn srăng mâo lu bruă knuă, k’iăng Khua knŭk kna hmăng hmưi dŭm anôk bruă, dhar bruă, phŭn bruă leh anăn grăp čô knuă druh, mnuih mă bruă knŭk kna, mnuih mă bruă mơ̆ng adŭ bruă knŭk kna kčưm ngă bruă jăk mơ̆ng hruê mă bruă tal êlâo ti thŭn mrâo.

Y-Ƀel pô mblang