VOV4.Êđê- Tuy Đức jing kdriêk knông lăn čar Dak Nông. Êlâo adih, klei hdĭp mda mnuih ƀuôn sang dŭm djuê ana tinei tuôm hŏng lu klei dleh dlan, êdu kƀah. Hlăm dŭm thŭn êgao mnuih ƀuôn sang Mnông ti Tuy Đức dưi čan prăk knơ̆ng prăk pioh duh bi liê mđĭ kyar ana pla mjing msĕ si kphê, tiu, mak ka hŏng klei tŭ dưn. Kyua anăn prăk hrui wĭt đĭ, grăp knhuang msir klei ư̆ êpa, bi hrŏ klei ƀun knap hơĭt kjăp.

Ung mô̆ ayŏng Điểu Minh ti Ƀuôn Bu Đưng, să Dak Rtih, kdriêk Tuy Đức, čar Dak Nông mâo êbeh 6 ha lăn hma. Êlâo dih knŏng buh mdiê leh anăn pla êtak êbai, prăk ba wĭt grăp thŭn kăn mâo lu lei. Ară anei 6 ha lăn hma anei dưi pla mjing kphê pluă mbĭt hŏng tiu. Điểu Minh brei thâo: Đang pla mjing anei amâo mâo sa mta mnơ̆ng ngă ôh kyua ñu ngă jăk dŭm mta bruă mơ̆ng klei ruah mjeh truh kơ hdră dlăng kriê. Boh nik jing bi hrŏ jih hnơ̆ng klei yua hbâo angre, knŏng yua mă hbâo brŭ mă mơ̆ng eh êmô mơ̆ng gŏ sang. Wưng mrâo êgao, khădah ênoh tiu leh anăn kphê jing êlưih êdi, ƀiădah leh mă jih prăk duh bi liê, gŏ sang ăt mâo ba wĭt êbeh 1 êklai prăk mnga. Ung mô̆ ayŏng Điểu Minh ară anei mâo sang dôk kdrưh kơăm hŏng dŭm kdrăp mnơ̆ng yua amâo mâo lŏ mdê hŏng dŭm gŏ sang mdrŏng sah ti ƀuôn prŏng. Dưi mâo klei hdĭp msĕ ară anei kyua klei gĭr ktưn mơ̆ng 2 čô ung mô̆, leh anăn mâo sa kdrêč prŏng mơ̆ng ênoh ngăn prăk lĭng čan mơ̆ng knơ̆ng bruă ngăn prăk. Ayŏng Điểu Minh brei thâo:

            “Kâo dưi lĭng čan sa ênoh prăk mơ̆ng Agribank mâo hŏng anei 5 thŭn leh, êlâo dih gŏ sang kâo ăt ngă bruă lŏ hma ƀiădah amâo mâo prăk duh bi liê kơ klei ngă bruă. Mơ̆ng hruê dưi lĭng čan ênoh prăk anăn, 2 ung mô̆ blei hbâo pruê, blei mjeh, mưn arăng mă bruă. Truh kơ ară anei, hmei mâo leh prăk ba wĭt hơĭt.

            Gŏ sang amai Thị Hoa, ti ƀuôn N’Drung, să Dak Buk So ăt jing sa hlăm dŭm gŏ sang gĭr ktưn tlaih mơ̆ng klei ƀun ƀin kyua ênoh prăk lĭng čan mơ̆ng knơ̆ng bruă ngăn prăk. Amai Hoa yăl dliê, ung ruă duăm amâo dưi mă bruă ktrŏ, gŏ sang hjăn amai mă djăp mta bruă hlăm gŏ sang. Êlâo dih amai knŏng jhŏng čan mă 50 êklăk prăk čiăng blei mjeh, blei hbâo pruê, kriê dlăng đang kphê, tiu. Duh bi liê mâo boh tŭ dưn, amai dưi tla jih nư hđăp, amai lŏ čan thiăm ênoh prăk mrâo čiăng kñăm kơ bruă pla mjing hlăm hma pô.

            “Kâo čan 150 êklăk prăk mơ̆ng knơ̆ng bruă ngăn prăk čiăng duh bi liê kơ bruă pla mjing kphê, tiu. Kyuanăn mâo prăk ba wĭt, brei kơ anak nao sang hră mơar. Kyua mâo ênoh prăk lĭng čan mơ̆ng knơ̆ng bruă ngăn prăk, gŏ sang kâo mâo klei găl mđĭ kyar klei hdĭp mda, mâo prăk pla mjing kphê, tiu, kyuanăn klei hdĭp mda ăt mâo klei đĭ kyar.”

            Ngô Văn Thương, khua bruă sang čư êa să Dak Buk So brei thâo: Êlâo dih hlăm alŭ wăl ăt mâo phung brei čan prăk mă mnga lu, boh nik hlăm wưng ƀĭng ngă lŏ hma čiăng mjêč pioh blei hbâo pruê, kdrăp yua čiăng bi djŏ yan. Hruê mmông giăm anei, kyua mâo prăk brei čan hmar mơ̆ng knơ̆ng bruă ngăn prăk, klei brei čan mă prăk mnga lu dưi bi hrŏ, msưh kdŭn.

“Hŏng mnuih ƀuôn sang, dưi lĭng čan ênoh prăk mơ̆ng knơ̆ng bruă ngăn prăk Agribank Tuy Đức čiăng ngă bruă duh bi liê pla mjing mâo boh tŭ dưn êdi. Boh nik hlăm bruă gang mkhư̆ klei ruă tưp Covid-19, knơ̆ng bruă đru bi hrŏ prăk mnga kơ grăp čô leh anăn êpul êya ti alŭ wăl. Kâo mâo klei kčĕ jing knơ̆ng bruă ngăn prăk lŏ mđĭ hĭn ênoh brei čan kơ mnuih ƀuôn sang.”

            Nguyễn Ngọc Thanh, khua knơ̆ng bruă ngăn prăk Agribank Tuy Đức, čar Dak Nông brei thâo: Hruê mmông êgao, knơ̆ng bruă ngă jăk leh hdră bi hrŏ prăk mnga kơ phung lĭng čan mâo klei hmăi kyua klei ruă tưp Covid-19. Mâo 2.052 čô lĭng čan hŏng ênoh prăk 450 êklai prăk dưi bi hrŏ êbeh 1 êklai mkrah prăk mnga. Anôk bruă mprăp nanao klei brei čan kơ mnuih ƀuôn sang, boh nik jing brei čan hmar, djŏ mmông. Nguyễn Ngọc Thanh mñă klă:

            “Êlâo hĭn Agribank mñă nanao bruă klam kmeh gơ̆ng hlăm bruă 3 mta lŏ hma. Ngă bruă hŏng klei mbruă, klei mlih mrâo, Agribank hrăm mbĭt nanao hŏng mnuih ƀuôn sang, đru kơ mnuih ƀuôn sang dưi lĭng čan ênưih čiăng ngă bruă mkra mjing, mnia mblei, mđĭ hnơ̆ng klei hdĭp, đru mđĭ kyar bruă duh mkra, đru msưh kdŭn klei brei čan mă prăk mnga lu ti alŭ wăl”.

                                          Pô mblang: Y-Ƀel Êban