VOV4.Êđê- Aguagh anei, ti Hà Nội, pŏk kčưm klei kƀĭn tal 7 mơ̆ng dhar bruă gĭt gai bruă kƀĭn ala. Hlăm gưl kƀĭn anei, dhar bruă gĭt gai bruă kƀĭn ala srăng brei boh blŭ kơ lu mta phŭn yuôm bhăn. Bi kơ bruă mkŏ mjing klei bhiăn ala čar, hlăm klei kƀĭn anei, dhar bruă gĭt gai bruă kƀĭn ala srăng brei boh blŭ kơ bruă hlăk mblang, mđing hmư̆, mkra bi djŏ klei bhiăn bi ktưn, pah mni, mtă brei bi mbŏ hdră mkăp hdră mtrŭn mơ̆ng bruă kƀĭn ala lông ngă klei bi hmô mkŏ mjing klei ngă bruă, mtô klei mă bruă, mtô mjuăt klei mă bruă kơ phung mnă hlăm dŭm sang mnă hlăm hdră mkŏ mjing klei bhiăn ala čar thŭn 2022. Ksiêm dlăng, bi klă bruă tui ngă kdrăp čŭt hơô mơ̆ng êpul phat kđi. Bi kơ dŭm boh klei mđĭ kyar bruă duh mkra – ala ƀuôn, dhar bruă gĭt gai bruă kƀĭn ala brei boh blŭ kơ bruă bi mbŏ hdră êlan duh bi liê ngăn prăk mơ̆ng ala tač êngao mơ̆ng ênoh prăk ka mkăp brei leh anăn mlih mrâo, mĭn tĭng hdră êlan duh bi liê man dưn leh anăn ngăn prăk gưl dlông wưng thŭn 2021 -2025 kơ dŭm hdră mkăp mơ̆ng dŭm phŭn bruă, anôk bruă gưl dlông leh anăn alŭ wăl (gưl tal 2). Mbĭt hŏng anăn, hlăm gưl kƀĭn anei, dhar bruă gĭt gai bruă kƀĭn ala srăng ksiêm dlăng dŭm klei hưn mdah bruă duh kơ mnuih ƀuôn sang mlan 12/2021 mơ̆ng bruă kƀĭn ala, hdră êlan dăp mnuih mă bruă mơ̆ng adŭ bruă kƀĭn ala leh anăn brei boh blŭ bi mklin klei kƀĭn êngao hdră tal 1, bruă kƀĭn ala gưl 15.

Pô mblang: Y-Ƀel Êban