VOV4.Êđê- Hlue si asăp khua mil čhil Singapore Halimah Yacob jak iêo, khua lăn čar Nguyễn Xuân Phúc lehanăn mô ñu djă akŏ phung khua gưl dlông Việt Nam nao čhưn kơ ala čar Singapore mơ̆ng hrue 24 – 26/2. Anei jing klei nao čhưn gưl knŭk kna tal êlâo mơ̆ng sa khua gĭt gai ala čar truh kơ Singapore yap mơ̆ng leh mâo klei ruă tưp Covid 19 kčưm hlăm thŭn 2020, ăt jing gưl tal êlâo Khua lăn čar, lehanăn jih jang phung khua prŏng Việt Nam nao kơ ala tač êngao hlăm thŭn 2022. Klei nao čhưn anei srăng mđĭ ai êwa mrâo hlăm klei bi mguôp dua ala čar, boh nik hgŭm kơru wĭt bruă duh mkra, mơ̆ng anăn mtrŭn agha êlam hĭn hlăm klei bi mguôp kluôm ênŭm Việt Nam – Singapore. Truh kơ ară anei, Singapore jing sa hlăm 3 ala čar duh bi liê prŏng kơ Việt Nam, hŏng ênoh hlăm hdră čiăng truh 66 êklai dolar, lehanăn giăm 2 êbâo 900 mta bruă. Alŭ wal duh mkra Việt Nam – Singapore jing leh klei bi knăl kơ klei hgŭm bruă dua ala čar, lehanăn truh kơ ară anei prăk mơ̆ng Singapore duh bi liê kơ dŭm alŭ wăl duh mkra ti Việt Nam đĭ leh truh 14 êklai prăk./.

Pô mblang: Y-Khem Niê