Dŭm hruê anei, ti anôk mă bruă rŭ mjing êlan dơ̆ng pral Khánh Hoà – Ƀuôn Ama Thuôt kdrêč găn să Ea Knuêč, kdriêk Krông Pač, čar Dak Lak, dŭm pluh boh êdeh êdâo, masin leh anăn lu mnuih mă bruă dôk bi mbha bruă ngă êlan. Hồ Văn Anh, pô mâo êbeh 20 thŭn djă êdeh čuk ruh mgaih anôk ala, mkra êlan klông mơ̆ng knơ̆ng bruă An Nguyên, čar Dak Lak, anôk bruă dôk rŭ mjing êlan dơ̆ng pral brei thâo. Asei ñu pô amâo mâo hdơr ôh anei jih ya tal tết drông yan mnga kbưi hŏng gŏ sang. Tết anei, ñu mbĭt hŏng phung mă bruă mbĭt mâo knơ̆ng bruă mkŏ mjing klei ƀơ̆ng tết ti anôk mă bruă. Ti sang jưh, khua kiă kriê knơ̆ng bruă blei ênŭm leh mnơ̆ng dhơ̆ng, boh kroh, mnga đào, mnga sŭng gơr leh anăn ƀêñ điŏ, ƀêñ tết leh anăn dŭm mta mnơ̆ng ƀơ̆ng hlăm sang čiăng kơ grăp čô drông yan mnga… Hồ Văn Anh lač:

 “Knơ̆ng bruă ƀuăn hŏng anôk bruă duh bi liê srăng rơ̆ng kơ hnơ̆ng ngă bruă, kyuanăn êlâo kơ tết bi kƀĭn leh phung ayŏng adei ti anôk rŭ mjing êlan dơ̆ng pral. Khua kiă kriê knơ̆ng bruă dăp hruê mă bruă tết hŏng ai tiê phung ayŏng adei bi klă srăng dôk mă bruă. Hmei bi kƀĭn leh anăn tŭ ư hŏng gŏ sang srăng bi klă mă bruă dŭm hruê tết, jing mơ̆ng hruê 26/12 hruê mlan ƀlĕ truh kơ hruê 6/1 tết, knŏng mdei mă hruê sa tết đuč.”

Knơ̆ng bruă mkŏ mkra An Nguyên (Dak Lak) dôk ngă hdră rŭ mjing mrô 3 mơ̆ng km 101 + 500 truh kơ km 108 + 00. Lê Quốc Thắng, k’iăng khua kiă kriê knơ̆ng bruă mkŏ mkra An Nguyên brei thâo, mơ̆ng hruê tŭ mă anôk ala mơ̆ng bruă sang čư êa kdriêk Krông Pač ti gưl 3 mlan tal 4 thŭn 2023, knơ̆ng bruă tiŏ nao lu êdeh êdâo, masin, mnơ̆ng yua leh anăn mnuih mă bruă nao ngă bruă. Ară anei mâo hlăm brô 30 boh êdeh mâo, êdeh čuk, êdeh kčao, êdeh hli, êdeh rơlô klĭ leh anăn hlăm brô 40 – 45 čô mnuih mă bruă mbha 2 mông mă bruă hruê/mlam čiăng čuk hli leh anăn mdơ̆ng kmeh atur kban êlan. Hlăm wưng Tết Giáp Thìn 2024 mrâo êgao, kñăm rơ̆ng kơ mmông ngă bruă, knơ̆ng bruă ăt mkŏ mjing klei mă bruă dŭm hruê tết, dŭm hdră êlan đru kơ mnuih mă bruă mâo knơ̆ng bruă hluê ngă kluôm ênŭm. Lê Quốc Thắng lač:

 “Mơ̆ng hruê 26/12 hruê mlan blĕ truh kơ hruê 6/1 tết, êngao kơ hdră êlan tĭng hluê si knŭk kna, hlăm dŭm hruê mă bruă tết, knơ̆ng bruă lŏ brei thiăm grăp čô 1 êklăk prăk hlăm sa hruê. Anei jing hdră êlan mđĭ ai mnuih mă bruă, grăp čô kyua knơ̆ng bruă dôk ngă bruă kyua grăp čô.”

Êlan dơ̆ng pral Khánh Hoà – Ƀuôn Ama Thuôt mâo boh taih hlăm brô 117,5 km mkŏ čar Khánh Hoà – Dak Lak. Ênoh duh bi liê jih jang kơ hdră jing 21.935 êklai prăk mơ̆ng prăk knŭk kna. Hdră dưi mbha jing 3 kdrêč mâo, kdrêč tal 1 mơ̆ng čar Khánh Hoà jing pô duh bi loiê, kdrêč tal 2 mơ̆ng Phŭn bruă êlan klông leh anăn dŭ mdiăng, kdrêč tal 3 mơ̆ng čar Dak Lak hluê ngă. Hdră anei mâo čar Dak Lak jao kơ Êpul kriê dlăng hdră duh bi liê mkŏ mklra êlan klông leh anăn bruă lŏ hma mđĭ kyar krĭng ƀuôn sang jing pô duh bi liê ngă bruă rŭ mjing.

Đặng Thọ Dần – K’iăng khua adŭ bruă Êlan klông êpul kriê dlăng hdră, pô klă anăp nao ktuê dlăng kdrêč mkŏ mkra mrô 3 brei thâo, ară anei dŭm anôk bruă dôk mjêč ngă dŭm mta bruă msĕ si čuk hli anôk ala, ktĭt êlan tur, rŭ mjing tur kban găn hnoh êa… Hlăm wưng Tết Giáp Thìn 2024 mrâo êgao, dŭm anôk bruă bi klă mă bruă dŭm hruê tết, Êpul bruă mtă kơ khua kiă kriê dŭm knơ̆ng bruă rơ̆ng kơ hnơ̆ng mă bruă, hnơ̆ng tŭ jăk mơ̆ng hdră, srăng mâo klei uêñ mĭn truh kơ phung mă bruă hluê si klei čuăn.

 “Ară anei, leh mâo anôk ala, phung ngă bruă kñăm hluê ngă hmar bruă čuk hli mkra êlan klông hlăm anôk ngă bruă đru kơ bruă mkra êlan dơ̆ng pral. Msĕ si kdrêč mrô 1 mâo 100% mâo leh êlan ngă bruă. Bi kơ kdrêč mrô 2 ăt dưi bi leh êbeh 70%. Kdrêč mrô 3 ăt dưi bi hluh êlan leh anăn mâo phung ngă bruă dôk rŭ mjing”.

Hluê si klei čuăl mkă truh ti thŭn 2030, hdră tă truh ti thŭn 2050, êlan dơ̆ng pral anei jing êlan phŭn čiăng jig sa hlăm dŭm êlan phŭn bruă duh mkra mơ̆ng krĭng Lăn Dăp Kngư, hŏng bruă klam phŭn jing bruă hiu čhưn ênguê, dŭ mdiăng mnơ̆ng dhơ̆ng. Dưi rŭ mjing mơ̆ng mlan 6/2023, ară anei êlan dơ̆ng pral Ƀuôn Ama Thuôt – Khánh Hòa mâo tă leh jing rup klă. Dŭm êlan klông hlăm krĭng Lăn Dăp Kngư, dŭm hdră mâo knhuah mlir krĭng dưi hluê ngă ktang phĭt, dôk ƀrư̆ ƀrư̆ mkŏ bruă duh mkra grăp čar, mơ̆ng alŭ wăl leh anăn wăt krĭng kwar Krah – krĭng Lăn Dăp Kngư, mkŏ mjing ai dưi mtrŭt mđĭ čiăng mđĭ kyar bruă duh mkra ala ƀuôn.