Čiăng kơ Tết Nguyên đán Giáp Thìn 2024 “Grăp boh sang mâo Tết sơăi, grăp čô mnuih mâo Tết sơăi” čar Kon Tum pioh lu klei mđing kriê dlăng Tết kơ dŭm gŏ sang knŭk kna dlăng ba, phung mâo ai kơrŭ kdơ̆ng, phung khua thŭn, gŏ êsei ƀun, giăm ƀun, phung mă bruă mâo klei hdĭp dleh dlan, phung êdu awăt, ênưih kpĕ êka hlăm ala ƀuôn… Hlăm anăn, čar bi mklă prăk knŭk kna êbeh 8 êklai prăk đru kơ kơ êbeh 16.780 gŏ êsei ñim, giăm ƀun mơak yan mnga, drông tết hŏng hnơ̆ng đru grăp gŏ êsei 600.000 prăk, grăp gŏ êsei giăm ƀun 300.000 prăk. Mbĭt anăn hŏng Knơ̆ng bruă mặt trận čar kwar Việt Nam leh anăn êpul hgŭm dŭm gưl ăt iêô mkrum dŭm pluh êbâo hnư mnơ̆ng kriê dlăng Tết kơ mnuih ƀuôn sang.

Ayŏng A Định, Khua dlăng bruă Đảng hlŏng ngă Khua ƀuôn Đăk Bung, să Đăk Rơ Nga, kdriêk Đăk Tô brei thâo: Bruă Đảng alŭ Đăk Bung mâo 14 čô đảng viên, čiăng rơ̆ng Tết hŏng grăp čô mnuih, grăp boh sang, phung đảng viên hlăm bruă Đảng mbha ktuê dlăng êpul gŏ êsei dưi ktuê dlăng, ksiêm dlăng klei hdĭp mơ̆ng 161 gŏ êsei hŏng 885 čô mnuih hlăm alŭ čiăng kriê dlăng Tết kơ mnuih ƀuôn sang:

Êlâo Tết, hmei ngă leh klei ktuê dlăng dŭm gŏ êsei ƀun leh anăn gŏ êsei dleh dlan čiăng đru kơ mnuih ƀuôn sang mâo Tết hơuh mđao, jăk mơak, grăp čô mâo Tết. Hmei ƀuh bruă răng mgang dliê tŭ dưn kơ mnuih ƀuôn sang, kyua mnuih ƀuôn sang dưi dưn dŭm hdră êlan mơ̆ng bruă răng mgang dliê, mnuih ƀuôn sang thiăm klei mơak čiăng kơ mnuih ƀuôn sang drông Tết hơuh mđao hĭn. Grăp thŭn, Knơ̆ng bruă dliê kmrơ̆ng Đăk Tô bi hgŭm hŏng alŭ ktuê dlăng dŭm gŏ êsei ƀun, dleh dlan čiăng čih anăn đru braih leh anăn mnơ̆ng čiăng êdi kơ mnuih ƀuôn sang, Knơ̆ng bruă mđing kơ mnuih ƀuôn sang hlăm gưl Tết, grăp thŭn mđup brei mnơ̆ng kơ mnuih ƀuôn sang”.

Giăm 230 gŏ êsei mnuih Bahnar ti ƀuôn Dơk Rơng- ƀuôn krĭng ƀuôn sang mrâo ti să Glar, kdriêk Đak Đoa, čar Gia Lai drông yan mnga mrâo 2024 bŏ hŏng klei mơak hlăk yan boh mnga mâo lu, ênoh yuôm, boh nik kphê. Jih jang gŏ êsei hlăm ƀuôn mâo đang kphê, tiu, čêñ hruê̆… gŏ êsei mâo ƀiă ăt dŭm sao, mâo lu snăn 4-5 ha... Thŭn êgao, giăm 20 gŏ êsei mnuih ƀuôn sang mâo prăk hrui wĭt 1 êklai prăk mơ̆ng ana kphê leh anăn knŏng yap mơ̆ng klei hrui pĕ kphê, mnuih ƀuôn sang hlăm ƀuôn blei mrâo êbeh 50 boh êdeh p’phŭt yuôm. Mŭt hlăm thŭn mrâo, mnuih ƀuôn sang Dơk Rơng ktưn hưn mnuih mă bruă mkra mjing lŏ dơ̆ng mâo prăk hrui wĭt lu. Khua mduôn Vut, lač:

:“Thŭn kơ anăp, mnuih ƀuôn sang srăng gĭr bi mlih klei mĭn hdră ngă, kriê dlăng ana pla mjing, kriê dlăng bi jăk kphê ƀrư̆ mrâo lu. Mnuih ƀuôn sang mơak snăk, tơdah hmư̆ klei hưn, ară anei mâo leh mjeh kphê mrâo hĭn, êlâo dih jing kphê TR4 mnuih ƀuôn sang mơak leh, ară anei mâo thiăm mjeh mrâo jing kphê hla soai, kphê mta - đŭt mboh lu, dưi mdrơ̆ng hŏng klei mnơ̆ng ngă snăn mnuih ƀuôn sang dôk gĭr pla dŭm mjeh mrâo anei. Mnuih ƀuôn sang đăo knang hrô kơ mjeh mrâo srăng mâo prăk hrui wĭt lu hĭn, klei hdĭp jăk mơak, djăp ênŭm hĭn.

Wăl krah An Khê jing sa wăl krah mâo Khua knŭk kna tŭ yap alŭ wăl bi leh bruă klam mkŏ mkra krĭng ƀuôn sang mrâo. Leh bi leh  19/19 hnơ̆ng kčah krĭng ƀuôn sang mrâo, wăl krah An Khê mâo leh klei bi mlih hŏng hnơ̆ng đĭ kyar pral, ênoh mkra mjing kah knar wưng 2016 - 2020 mâo 12,75%/năm. Anôk bruă duh mkra mâo klei bi mlih jăk. Dŭm anôk bruă hƀuê ênuk leh anăn knhuah gru djuê ana dhar kreh amâo mdei dưi răng kriê leh anăn đĭ kyar. Ayŏng Hồ Văn Hay, ƀuôn  Pơ Nang, să Tú An, wăl krah An Khê, čar Gia Lai brei thâo:

 “Gŏ sang kâo pla ana kyâo, pla kbâo, pla hbei ƀlang, Leh anăn prăk hrui wĭt gŏ sang kâo grăp thŭn mâo 50-60 êklăk prăk, djăp yua hlăm gŏ sang, brei anak nao hriăm hră, kăn kƀah mơh, klei hdĭp hơĭt. Hlăm thŭn mrâo kâo srăng gĭr mă bruă leh anăn thŭn mrâo anei kâo hơêč hmưi kơ mnuih ƀuôn sang mâo klei suaih pral čiăng tlaih ƀun leh anăn gĭr ktưn răng kriê dhar kreh kơ mnuih ƀuôn sang.

            Dak Găn jing să krĭng taih kbưi kdriêk Dak Mil, čar Dak Nông. Ƀri Têt thŭn anei, bruă Đảng, bruă sang cư̆ êa lehanăn dŭm êpul bruă kđi čar ala ƀuôn mơ̆ng să mđing kơ lu hdră msir iêu mtrŭt djăp ai dưi klei mâo čiăng mđing dlăng kriê Têt kơ mnuih ƀun lehanăn mnuih ƀuôn sang djuê ana ƀiă hlăm ƀuôn sang. Y Srao, Khua Êpul gru bi kal hrah să Dăk Găn brei thâo, klei mĭn mơ̆ng să jing amâo lui hlei gŏ sang dleh dlan amâo dưi drông Têt.

             “Êpul gru bi kal hrah să bi hgŭm hŏng bruă Đảng, bruă sang čư̆ êa lehanăn dŭm êpul bruă kđi čar – ala ƀuôn mđing mtrŭt mjhar, đru mđing dlăng Têt kơ mnuih ƀun, gŏ sang knŭk kna dlăng ba lehanăn mđup brei mnơ̆ng kơ mnuih ƀuôn sang ti dŭm ƀuôn hlăm să. Hmei gĭr čiăng kơ mnuih ƀuôn sang dưi drông Têt trei mđao, êđăp ênang, amâo lui hlei gŏ sang amâo dưi drông Têt. Ƀri thŭn mrâo, h’êč hmưi kơ jih jang mnuih ƀuôn sang suaih pral, mă bruă tŭ jing, bi hgŭm mguôp êpul êya kjăp, anei jing klei kâo čiăng hĭn. 

Mŭt hlăm thŭn mrâo Giáp Thìn 2024, čiăng kơ grăp gŏ sang dưi mâo Têt, dŭm êpul bruă kđi čar ala ƀuôn mkŏ mjing leh lu hdră drông Têt hŏng bruă sang čư̆ êa alŭ wăl dŭm čar krĭng Lăn dap kngư mđing dlăng kriê Têt kơ mnuih ƀuôn sang, boh nik jing mnuih ƀun, mnuih dleh dlan, mnuih mă bruă… dưi drông sa yan Têt trei mđao, djăp ênŭm hŏng klei mĭn amâo lui hlei gŏ sang kƀah hlăm wưng Têt djuê ana Giáp Thìn 2024:

            Să knông lăn Quảng Trực, kdriêk ƀun 30a Tuy Đức jing sa hlăm dŭm să adôk dleh dlan mơ̆ng čar Dak Nông. Điểu Khanh, K’iăng khua anôk bruă sang čư̆ êa să brei thâo, să mâo ênoh gŏ êsei ƀun lu. Boh nik, thŭn 2023 leh êgao, ti alŭ wăl să mâo klei klưh hroh kyua yan adiê ngă kơ lu gŏ sang lŏ lĕ hlăm klei dleh dlan hĭn. Kyua anăn, bruă mđing dlăng kriê Têt kơ mnuih ƀuôn sang ti alŭ wăl mâo Đảng, bruă knŭk kna mđing dlăng, hŏng klei mĭn grăp sang mâo Têt s’aĭ.

             “Gưl Têt anei să Quảng Trưc hmei gĭr mtrŭt mjhar klei đru mơ̆ng dŭm anôk bruă duh mkra, phung mâo ai tiê kmah mđing kriê dlăng Têt kơ mnuih ƀuôn sang, boh nik gŏ êsei ƀun, dleh dlan. Hmei gĭr čiăng kơ grăp sang, grăp čô dưi drông têt trei mđao, yâo m’ak./.

Mrâo êgao, dŭm kđông kahan răng mgang knông lăn hlăm Knơ̆ng gĭt gai lĭng kahan răng mgang knông lăn čar Gia Lai mkŏ mjing leh Hdră “Yan mnga knông lăn – H’uh mđao ai tiê mnuih ƀuôn sang” ti dŭm să knông lăn kdriêk Ia Grai, Đức Cơ, Čư̆ Prŏng. Ti dŭm hdră anei, phung knuă druh lĭng kahan kđông kahan răng mgang knông lăn hrăm mbĭt hŏng mnuih ƀuôn sang alŭ wăl đŭng ƀêñ điŏ, tông čing čhar, mjĕ mjuk kdŏ mmuñ čiăng bi kjăp klei hgŭm mguôp lĭng kahan hŏng mnuih ƀuôn sang. Mbĭt anăn, phung đru brei ăt mkŏ mjing anôk čhĭ mnơ̆ng 0 prăk, mơ̆ng anăn mđup brei kơ mnuih ƀuôn sang dŭm êtuh hnư mnơ̆ng mâo abăn, mŭng, braih lehanăn hdruôm hră, mnơ̆ng yua hlăm klei hriăm hră kơ phung hđeh. Mơ̆ng anăn, đru kơ mnuih ƀuôn sang dưi drông Têt trei mđao, djăp ênŭm. Thượng Uý Siu Thương – Kđông kahan răng mgang knông lăn Ia O lač kơ bruă mđing dlăng kriê têt kơ mnuih ƀun, phung hđeh, mnuih djuê ƀiă ti dŭm să Ia O, Ia Chía:

 “Grăp thŭn, truh wưng Têt truh yan mnga hriê wĭt ti kđông kahan răng mgang knông lăn Ia O, čar Gia Lai lŏ mkŏ mjing knăm m’ak Têt, m’ak yan mnga, m’ak thŭn mrâo mbĭh hŏng mnuih ƀuôn sang lehanăn anei ăt jing wưng kđông kahan răng mgang knông lăn lehanăn mnuih ƀuôn sang bi tuôm. Knơ̆ng gĭt gai lĭng kahan răng mgang knông lăn čar gĭt gai leh kđông kahan răng mgang knông lăn Ia O hlăm dŭm hruê akŏ thŭn mrâo nao mđup brei mnơ̆ng kơ dŭm gŏ sang dleh dlan. Leh kơnăn, phung khua mduôn, khua ƀuôn jing mnuih đru kơ kđông kahan răng mgang knông lăn hlăm hdră mtrŭt mjhar. Hlăm wưng Têt nguyên đán thŭn anei, kđông kahan răng mgang knông lăn nao mđup brei leh mnơ̆ng kơ dŭm gŏ sang mâo bruă tŭ dưn, grăp hnư 300 êbâo prăk, đru ba sa yan têt trei mđao, hơ̆k m’ak čiăng kơ mnuih ƀuôn sang bi hgŭm hŏng phung kahan rơ̆ng kjăp klei êđăp êñag krĭng knông lăn./.