VOV4.Êđê- Hruê mbruê, ti čar Bến Tre, Dhar bruă yang ƀuôn mơ̆ng bruă kƀĭn ala bi mguôp leh êpul bi ala bruă kƀĭn ala čar Bến Tre mkŏ mjing klei kƀĭn trông kơ boh sĭt hluê ngă hdră êlan đru kơ mnuih mă bruă, phung yua mnuih mă bruă ti alŭ wăl krĭng kwar Dhŭng mâo klei dleh dlan kyua klei ruă tưp Covid-19. Bi hŏng alŭ wăl krĭng kwar Dhŭng, mâo leh êbeh 2,5 êklăk čô mnuih mă bruă mâo ai đru hlăm bruă krŭ kdơ̆ng, gŏ sang ƀun ƀin, giăm ƀun ƀin dưi mâo klei đru hŏng ênoh prăk êbeh 2.660 êklai prăk. Thŭn leh êgao, kyua klei ruă tưp bluh đĭ ktang, dŭm alŭ wăl krĭng kwar Dhŭng mâo ênoh prăk đru kơ dŭm êpul anăn jing lu, hlăm brô 78,4% mkă hŏng ênoh prăk đru hlăm kluôm ala. Blŭ hlăm klei kƀĭn trông, phung bi ala lač, dŭm hdră êlan knŭk kna ba mdah jing djŏ hruê mmông, klă hŏng boh sĭt klei hdĭp yang ƀuôn hlăm wưng klei ruă tưp Covid-19 dleh dưi ksiêm dlăng, đru mdul leh klei dleh dlan kơ mnuih ƀuôn sang, knơ̆ng bruă, boh nik hlăm wưng klei ruă bluh đĭ tal 4. Dŭm alŭ wăl krĭng kwar Dhŭng gĭr ktưn truh kơ jih mlan 6 thŭn anei srăng msir mgaih kluôm ênŭm dŭm hră mơar dôk mâo, lŏ dơ̆ng ba mdah dŭm hdră êlan, hdră mtrŭn đru kơ mnuih ƀuôn sang mâo klei dleh dlan.

        Pô mblang: Y-Ƀel Êban