Êbeh dua mlan leh klei truh êdeh continer tlă hlăm dŭm boh sang ti sang mnia 312, să Dak Rla, kdriêk Dak Mil, čar Dak Nông, ung mô̆ Hoàng Văn Tuấn nao mdơ̆ng leh sang ti hma. Klei ênguôt hnĭng hlăk dua čô anak êkei ñu djiê hlăm klei truh anei ăt dôk hlăm ai tiê ñu. Ñu brei thâo:

“Luič dua čô anak sa blư̆ mtam, dleh yơh dưi wơr hĕ klei anei. Ară anei, mdơ̆ng sang dôk tinei êjai, dôk ti adih ênguôt amâo čiăng dôk ôh. Găp djuê lač mdơ̆ng sang nah tluôn ƀiă, khă snăn ăt mdơ̆ng ti lăn anăn mơh. Hriê dôk tinei bi ƀuh anak yơh. Ênguôt êdi”.

Klei truh hlăm êlan klông amâo djŏ knŏng ngă truh klei djiê mnuih, găp djuê, gŏ sang hnĭng ênguôt ƀiădah lŏ ba lu klei truh amâo jăk hlăm ai tiê grăp čô, đa đa mnuih tŭ ba kđi. Ayŏng Nguyễn Văn Chí, ti să Dak Buk So, kdriêk Tuy Đức, čar Dak Lak hƀlŏk: Tŭ klei arăng krư̆ kđăl 3 thŭn jih leh ƀiădah klei truh ăt dôk bi ƀuh nanao hlăm ñu.

Mmăt hruê 15/3/2021, ayŏng mgăt êdeh mdiăng mnơ̆ng kyua êran pral lehanăn amâo dlăng klă ñu tlă leh hlăm dua čô hđeh mgăt êdeh êran hŏng pui kmlă. Ayŏng Chí brei thâo:

“Mrâo wĭt mnă wĭt hŏng ƀuôn sang. Êjai dôk hlăm sang mnă pô bi mĭn ƀuh nanao kơ klei truh ngă dua čô hđeh djiê. Mmông anăn pô mgăt êdeh êran êmưt ƀiă, gơ̆ amâo mâo ôh klei truh anei. Ară anei, leh kbiă mnă, kâo amâo jhŏng djă vô lăng ôh, ară anei kâo hiu mă bruă mưn arăng đuič amâo dah nao mă bruă ti Bình Dương amâo dah Sài Gòn adih”.

Hluê si Dhar bruă răng mgang klei êđăp ênang čar Dak Nông, 3 thŭn hŏng anei, klei truh hlăm êlan klông ti alŭ wăl hrŏ. Khă snăn, ênoh klei truh kjham mâo klei bi êdah đĭ. Mta phŭn klei anei kbiă hriê mơ̆ng pô mgăt êdeh lehanăn sa kdrêč jing kyua anôk bruă êlan klông nah gŭ amâo mâo klei kjăp ôh. Nguyễn Nhân Bản – Khua Knơ̆ng bruă êlan klông dŭ mdiăng, Kơiăng khua dhar bruă răng mgang klei êđăp ênang čar Dak Nông brei thâo leh dŭm hdră msir phŭn kñăm bi hrŏ klei truh hlăm êlan klông.

“Dhar bruă răng mgang klei êđăp ênang êlan klông čar gĭt gai leh anôk bruă djŏ tuôm pŏk dŭm hdră mtô mblang, hưn mthâo kơ hdră bhiăn răng mgang klei êđăp ênang êlan klông kñăm mđĭ klei thâo săng mơ̆ng mnuih găn êrô hlăm êlan klông; mđĭ hdră hiu ksiêm dlăng, msir mghaih klei ngă soh. Ksiêm dlăng, msir mghaih dŭm anôk kreh mâo klei truh. Mđĭ hnơ̆ng tŭ hdră mjuăt bi hriăm, ksiêm bi mklă bruă mkăp hră dưi mgăt êdeh, mđĭ klei bi hgŭm kñăm rơ̆ng kjăp klei êđăp ênang êlan klông”.

Klei truh hlăm êlan klông jing klei dôk mđing uêñ êdi hlăm kluôm yang ƀuôn, kyua klei truh mơ̆ng boh klei anei jing kjham snăk. Kñăm bi hrŏ klei truh hlăm êlan klông, mbĭt hŏng hdră msir mơ̆ng anôk bruă djŏ tuôm, grăp čô mnuih brei mđĭ klei thâo săng hluê ngă kjăp Hdră bhiăn êlan klông. Mơ̆ng anăn, đru răng mgang pô lehanăn đru bi hrŏ klei truh, klei ruă êka, ênguôt hnĭng kbiă hriê mơ̆ng klei truh hlăm êlan klông./.