Ti sang rông ƀuôn Kăm, să Ia Krăi, čar Gia Lai, ai êwa yan mnga pŏk hŏng “Hruê knăm đŭng điŏ” hlăm klei hơ̆k mơak, hơuh mđao. Khua knơ̆ng gĭt gai Binh đoàn 15, Bruă sang čư̆ êa alŭ wăl mbĭt hŏng mnuih ƀuôn sang dŭm ƀuôn mbha jing 4 êpul, bi đŭng điŏ, mkŏ mjing ai êwa hơ̆k mơak, bi mguôp lĭng kahan - mnuih ƀuôn sang. Jŭm dar sang rông jing dŭm anôk čhĭ mnơ̆ng ênoh 0 prăk đru kơ mnuih ƀuôn sang mprăp kơ tết. Lu klei hlăk lêñ dưi mkŏ mjing, iêo jak lu phung hđeh nao hgŭm, ba wĭt klei blŭ tlao hơ̆k mơak.

Truh kơ mlam, anôk anei jing knăm mơak yan mnga jiă kma dhar kreh Lăn Dap Kngư hŏng klei čuh pui leh anăn lu klei kdŏ mmuñ bi mni kơ ƀuôn sang, lăn čar mbĭt hŏng ênai čĭng kwang, klei kdŏ mmuñ djuê ana. Nao hlăm hdră, amai Ksor Nuch – mbms ƀuon Doch Krŏt, să Ia Krăi hơ̆k mơak brei thâo:

 “Lĭng kahan wĭt ƀơ̆ng tết hŏng mnuih ƀuôn sang jăk mơak êdi. Klei bi lông đŭng điŏ, dŭm klei hlăp lêñ đưm leh anăn klei kdŏ mmuñ dhar kreh, lông ƀơ̆ng dŭm mta mnơ̆ng ƀơ̆ng mơ̆ng mnuih Jarai leh anăn Yuăn, mkŏ mjing hruê knăm hơ̆k mơak êdi”.

Hlăm hdră, Binh đoàn 15 leh anăn êpul bruă duh mkra - bruă lĭng kahan 715 mđup brei leh dŭm êtuh hnư mnơ̆ng kơ phung Knŭk kna dlăng ba, gŏ sang ƀun. knơ̆ng gĭt gai lĭng kahan Binh đoàn 15 nao truh ti sang, mđup brei hnư mnơ̆ng, hơêč hmưi tết phung khua mduôn, khua ƀuôn, phung mâo kơhưm, nao čuă, hơêč hmưi tết kđông kahan knông lăn Ia O, bruă Đảng nah gŭ, Bruă sang čư̆ êa dŭm să Ia O leh anăn Ia Krăi.

 Thiếu tướng Hoàng Văn Sỹ – Khua knơ̆ng gĭt gai lĭng kahan Binh đoàn 15 brei thâo. Dŭm mta bruă hlăm hdră “Yan mnga knông lăn bŏ hŏng klei khăp lĭng kahan - mnuih ƀuôn sang ” srăng lŏ dơ̆ng dưi ngă. Hlăm gưl tal 1, Binh đoàn 15 srăng mđup brei 30.000 hnư mnơ̆ng kơ phung knuă druh, mnuih mă bruă leh anăn mnuih ƀuôn sang ti dŭm alŭ ƀuôn, đru 100 tôn hbâo pruê vi sinh hŏng hdră “Bi mtah Trường Sa” thŭn 2026.

Hŏng dŭm bruă ngă anei, Binh đoàn 15 amâo djŏ knŏng kriê dlăng klei hdĭp, ai tiê kơ mnuih ƀuôn sang ƀiădah lŏ ngă bruă klam kđi čar yuôm bhăn, đru hyuă kjăp klei khăp, bi kjăp klei đăo knang mơ̆ng mnuih ƀuôn sang hŏng Đảng, Knŭk kna leh anăn lĭng kahan, mkŏ mjing kjăp Hdră êlan hlăm ai mnuih ƀuôn sang krĭng knông lăn ala čar. Thiếu tướng Hoàng Văn Sỹ brei thâo:

 “Thŭn 2026, hmei yua dŭm mta mnơ̆ng dhơ̆ng mơ̆ng Binh Đoàn hlăm hnư mnơ̆ng mđup brei. Hluê anăn, lŏ mñă klă ai khăp mơ̆ng Bình Đoàn 15 truh hŏng mnuih ƀuôn sang, mkŏ mjing klei bi mguôp ai tiê mơ̆ng knơ̆ng gĭt gai lĭng kahan gưl dlông jing amâo mâo lui hlei pô kơ tluôn. Mơ̆ng anăn, klei đăo knang dưi mđĭ hĭn leh anăn klă sĭt jing pô răng mgang kjăp lăn čar hlăm wưng mrâo”.

Bi ti krĭng knông lăn êa ksĭ mơ̆ng čar Dak Lak, ai êwa yan mnga dôk truh hnưm hŏng dŭm bruă ngă jăk siam mơ̆ng knuă druh, lĭng kahan knông lăn kriê dlăng tết kơ mnuih ƀuôn sang, boh nik jing dŭm gŏ sang mâo klei hdĭp dleh dlan, mrâo tŭ klei hmăi mơ̆ng klei yan adiê ngă, êa lêč.

Ti ƀuôn hgŭm Sông Cầu, čar Dak Lak, Kđông kahan knông lăn Xuân Đài bi mguôp hŏng Êpul bruă phung mniê ƀuôn hgŭm mkŏ mjing “hruê knăm đŭng điŏ”. Dŭm êtuh klŏ điŏ klei khăp dưi mđup brei kơ gŏ sang ƀun, gŏ sang Knŭk kna dlăng ba, đru ba sa wưng tết trei mđao, ênŭm ênap. Mă hnư mnơ̆ng tết mơ̆ng lĭng kahan knông lăn, Dương Bình Yên, ti alŭ Phú Hòa, ƀuôn hgŭm Sông Cầu, mgei ai tiê brei thâo:

 “Hơ̆k mơak kyua dưi đru, dưi mđup brei hnư mnơ̆ng kơ mnuih ƀuôn sang ƀun, anôk mâo tŭ klei truh yan adiê mrâo anei, čiăng dưi mâo sa yan Tết Bính Ngọ trei mđao leh anăn hơ̆k mơak.”

Ti ƀuôn hgŭm phường Hòa Hiệp, Kđông kahan knông lăn Hòa Hiệp Nam bi mguôp hŏng dŭm anôk bruă mkŏ mjing Hdră “Yan mnga knông lăn, mđao ai tiê mnuih ƀuôn sang”. Êpul mkŏ mjing mđup brei 110 hnư mnơ̆ng mâo prăk leh anăn mnơ̆ng yua kơ dŭm gŏ sang Knŭk kna dlăng ba, gŏ sang mâo ai đru, gŏ sang ƀun, phung hđeh hlăm hdră “Đru adei nao sang hră”. Mbĭt hŏng anăn, êpul êa mdrao lĭng kahan lŏ ngă klei mkă dlăng, mdrao klei ruă leh anăn mbha êa drao hlăm hlăm brô 100 gưl čô mnuih ƀuôn sang.

Ăt hlăm dŭm hruê anei, dŭm kđông kahan knông lăn êa ksĭ Dak Lak lŏ bi mguôp hŏng phung ngă bruă jăk đru mkra mđĭ sang dôk kơ lu gŏ sang dleh dlan, đru kơ mnuih ƀuôn sang hnưm bi hơĭt klei hdĭp, hơĭt ai tiê mă bruă knuă leh anăn drông tết jăk mơak. Thiếu tá Vũ Lý Huỳnh, k’iăng khua bruă kđi čar kđông kahan knông lăn Xuân Đài, êpul gĭt gai lĭng kahan knông lăn čar Dak Lak brei thâo:

 “Hdră tết lĭng kahan mnuih ƀuôn sang thŭn anei phung knuă druh, lĭng kahan kđông kahan knông lăn Xuân Đài mâo lu hdră mrâo, nao čuă êmuh truh kơ sang, mđĭ ai phung mă kan hdang mrâo anei tŭ klei hmăi mơ̆ng angĭn êbŭ mrô 13 leh anăn gưl êa lêč. Hmao mđĭ ai leh anăn mđup brei mnơ̆ng čiăng kơ mnuih ƀuôn sang lŏ dơ̆ng ngă bruă, mbĭt hŏng lĭng kahan knông lăn răng mgang klei dưi kiă kriê êa ksĭ, plao ksĭ, răng mgang klei êđăp ênang knông lăn êa ksĭ leh anăn đru mđĭ kyar bruă duh mkra ala ƀuôn ti alŭ wăl.”