Khua knŭk kna mtă kơ dŭm phŭn, dhar bruă, alŭ wăl gĭr ktưn jăk hĭn, ngă bruă jih ai tiê čiăng mâo klei kñăm đĭ kyar dua ênoh mrô hlue si Hdră mtrŭn Klei bi kƀĭn tal XIV mơ̆ng Đảng. Bi ala kơ lu alŭ wăl bi êdah klei gĭr mơ̆ng mlan tal êlâo thŭn 2026, mjing klei bi mlih klă mngač kơ hdră bi liê knŭk kna, mkra mđĭ hră mơar, wăl mnia blei.

Khua knŭk kna mñă klă, thŭn 2026 jing thŭn akŏ wưng, mâo klei yuôm bhăn mjing hnơ̆ng, mjing klei đăo knang leh anăn ai êwa hlue ngă hdră mtrŭn Klei bi kƀĭn tal XIV hŏng lu klei mĭn gĭt gai mrâo, êdah êdi. Khua knŭk kna mtă kƀĭn  pŏk ngă Hdră ngă bruă hŏng hnơ̆ng kčah bruă duh mkra ala ƀuôn phŭn, klă klơ̆ng 12 êpul bruă klam jing 264 bruă klam,  hdră bruă phŭn; mbĭt anăn mđing kơ dhar kreh - ala ƀuôn, klei  hdĭp mda, rơ̆ng kơ prăk mlan, pah mni Tết kơ mnuih mă bruă, krơ̆ng kjăp klei êđăp ênang ala ƀuôn.