Amâo guôn asăp mtrŭn mơ̆ng dlông, kăn dôk guôn klei čiu hnô, dŭm ktuê êlan ti să Ia Hiao, čar Gia Lai dưi pŏk mlar mơ̆ng klei čŏng pô myơr lehanăn klei sa ai mơ̆ng mnuih ƀuôn sang. Mơ̆ng bruă myơr grăp met lăn, ruh mltiah mnư̆ mnang, klei đăo knang mơ̆ng Đảng hŏng mnuih ƀuôn sang dưi ksŭl mbŭ, mjing dŭm ktuê êlan mâo anăn “Ktuê êlan sa ai hŏng Đảng mơ̆ng mnuih ƀuôn sang”, pŏk klei čang hmăng đĭ kyar mrâo kơ krĭng lăn ƀuôn sang leh bi mŭt mbĭt.
Dŭm hruê akŏ thŭn mrâo 2026, ti krah ai êwa hơ̆k mơak mơ̆ng yan mnga Lăn Dap Kngư, Trịnh Văn Bình, 69 thŭn, khua êpul lĭng kahan hđăp alŭ Đoàn Kết, să Ia Hiao, čar Gia Lai čŏng pô djă kmŭt biêng hĕ mnư̆ sang čiăng myơr lăn mkra êlan. Ñu brei thâo, myơr lăn mkra êlan jing đru mguôp klă klơ̆ng mơ̆ng gŏ sang mbĭt hŏng mnuih ƀuôn sang hlăm ƀuôn čiăng mkŏ mkra krĭng ƀuôn sang mrâo.
“Hluê si hdră êlan ngă bruă mkŏ mkra krĭng ƀuôn sang mrâo, kâo ƀuh djŏ hŏng klei mĭn Đảng, ai tiê mnuih ƀuôn sang kyuanăn gŏ sang kâo bi tŭ ư myơr lăn mkra êlan hlăm hdră nah gŭ. Hŏng ai tiê kyua êpul êya, êpul êya kyua pô, hdră pŏk êlan anei găl kơ mnuih ƀuôn sang hlăm ƀuôn. Êrô êbat mâo klei găl, mă bruă knuă bi hrŏ ênoh duh bi liê, hnư hrui wĭt tŭ dưn klei hdĭp mnuih ƀuôn sang dưi mđĭ hĭn”.
Să ia Hiao, čar Gia Lai dưi mkŏ mjing hŏng klei bi mŭt mbĭt 3 să Ia Peng, Chrôh Pơnan leh anăn Ia Hiao, kdriêk Phú Thiện hđăp. Bi klă êlan klông jing klei kdlưn hĭn čiăng mđĭ kyar bruă duh mkra ala ƀuôn wưng thŭn 2025 - 2030, bruă Đảng nah gŭ, Bruă sang čư̆ êa să Ia Hiao mtrŭt mjhar mnuih ƀuôn sang myơr lăn čiăng pŏk phai êlan kluôn krĭng ƀuôn sang. Đỗ Văn Điền, 63 thŭn, mnuih ƀuôn sang ti alŭ Đoàn Kết brei thâo, mâo klei sa ai mơ̆ng mnuih ƀuôn sang kyuanăn hdră myơr lăn mkra êlan dưi ngă pral jing sa hdră bruă kluôm.
“Jih jang mnuih ƀuôn sang sa ai, kyuanăn jing jăk êdi, mâo klei anei kyua klei uêñ mĭn mơ̆ng Đảng leh anăn Knŭk kna, mơ̆ng Bruă sang čư̆ êa alŭ wăl leh anăn dŭm gưl khua gĭt gai. Jih jang kyua mnuih ƀuôn sang sa ai, jih jang đru mguôp hruê ai dưi mkŏ mjing klei siam msĕ ară anei”.
Knŏng hlăm wưng bhiâo, mơ̆ng knhal jih thŭn 2025 truh kơ ară anei, să Ia Hiao bi leh 22 bĭt êlan, mtrŭt mjhar 207 gŏ sang myơr êbeh 38.000m2 lăn, êbeh 6.200m2 mnư̆ mnang mbĭt hŏng lu bruă mkŏ mkra mkăn, hŏng ênoh jih jang êbeh 4,8 êklai prăk. Năng mđĭng, hlăm hdră bruă anăn, knuă druh, đảng viên jing êpul nao êlâo, bi hmô hŏng dŭm bruă klă klơ̆ng. Siu Hiếu, k’iăng khua dhar bruă mặt trận să Ia Hiao, mnuih ƀuôn sang ƀuôn Sô Ma Lơng A brei thâo, klei myơr lăn hŏng gŏ sang ñu tal êlâo ăt mâo klei dleh dlan, kyuadah lăn ƀô̆ êlan ênoh yuôm. Ƀiădah, thâo klă bruă klam mơ̆ng pô ngă bruă mặt trận, ñu gĭr ngă bi dưi:
“Ƀuh hdră êlan jing djŏ guôp, kâo pô ăt ngă bruă myơr lăn mkra êlan mkŏ mjing tur knơ̆ng kơ mnuih ƀuôn sang. Mphŭn kčưm ăt dleh hlăm klei mtrŭt mjhar mô̆ anak kyua lăn ƀô̆ êlan ară anei hlăm brô 200 êklăk prăk sa met, ƀiădah ƀuh hdră êlan djŏ leh anăn kâo pô jing khua dhar bruă mặt trận ngă bruă hâo hưn mtrŭt mjhar mnuih ƀuôn sang pô yơh srăng jing pô ba anăn ngă êlâo bi hmô kơ mnuih ƀuôn sang. Leh pŏk phai êlan ƀuh êlan doh siam, mâo mnuôr êa, gŏ sang kâo hơ̆k mơak êdi”.
Klă sĭt brei ƀuh, čiăng mtrŭt mđĭ klei đĭ kyar êlan klông, ngăn prăk knŏng ƀiă mơ̆ng să Ia Hiao amâo mâo djăp čiăng tla prăk ruh mgaih anôk ala. Ti anăp klei lông dlăng anăn, bruă Đảng să ba bruă klam mđĭ kyar êlan klông hlăm hdră mtrŭn, mbĭt anăn ruah dŭm hdră êlan bi râo ai mnuih ƀuôn sang, mă mnuih ƀuôn sang jing kmeh gơ̆ng. Klei bi klă hĭn jing lu bĭt êlan msĕ si Yên Phú 1, Yên Phú 2, Đoàn Kết, Sô Ma Lơng mơ̆ng êlan prŏng ka abŏ 3 met ară anei dưi pŏk phai truh 8 met. Hlăm anăn, ngăn prăk Knŭk kna leh anăn dŭm ênoh prăk djŏ hdră bhiăn đru 90%, mnuih ƀuôn sang đru mguôp 10% leh anăn jih jang ênhă lăn ruh mgaih. Phạm Văn Phương, khua bruă Đảng nah gŭ, khua Êpul gơ̆ng bruă ƀuôn sang să Ia Hiao mñă klă:
“Bi klă klei mbha bruă srăng klă mngač leh anăn bi lar jih hnơ̆ng bruă klam bi hmô mơ̆ng êpul knuă druh đảng viên. nao mbĭt mbha bruă klam anăn hmei ruah dŭm gŏ sang knuă druh đảng viên ngă tal êlâo hĭn. Alŭ tal êlâo ngă bruă jing alŭ Sô Ma Lơng A, leh anăn truh kơ dŭm alŭ mkăn, lu alŭ dưi ngă, mrâo anei hmei dưi mkra 22 bĭt êlan mơ̆ng dŭm ênoh prăk pluă mbĭt leh anăn ênoh prăk bi mguôp čiăng mkra êla nkơ mnuih ƀuôn sang ti alŭ wăl să”.
Dŭm bĭt êlan mrâo amâo djŏ knŏng anôk êrô êbat, ƀiădah lŏ pŏk êlan mđĭ kyar kơ krĭng ƀuôn sang Gia Lai. Boh sĭt să Ia Hiao ară anei kdrưh kơăm, doh, siam, klei đăo knang mơ̆ng mnuih ƀuôn sang hŏng bruă Knŭk kna lŏ kjăp hĭn. Mơ̆ng klei sa ai mơ̆ng Đảng leh anăn mnuih ƀuôn sang, sa ai hdĭp mrâo dôk lar bra, hơĭt kjăp leh anăn ktang lŏ čih dŭm klei yăl dliê siam kơ mkŏ mkra krĭng ƀuôn sang mrâo ti čư̆ čhiăng Gia Lai./.
Viết bình luận