Hlue si klei ksiêm yap tal êlâo, Dak Lak mâo 1 čô djiê; lu pưk sang kpŏk čuôr, đa đa  klưh rai, ngăn drăp jhat rai kyua êa kluh; đa đa ktuê êlan klông êngăp êa. Đại tá Lê Văn Hùng,  K’iăng Khua gĭt gai, Khua đru kčĕ Anôk bruă lĭng kahan čar Dak Lak brei thâo, hlăm mlam, dŭm êtuh čô knuă druh, lĭng kahan dưi ba nao hŏng mran leh anăn kdrăp thơ̆ng yua truh ti anôk êngăp êlam, krĭng b ktlah hjăn čiăng mđuĕ mnuih ƀuôn sang, ba phung khua mduôn, hđeh điêt ti anôk êđăp ênang. Leh angĭn êbŭ, hlăm mlam, Đào Mỹ,  K’iăng Khua Knơ̆ng bruă sang čư̆ êa  čar Dak Lak, Khua gĭt gai Anôk bruă ba anăp ti ƀuôn hgŭm Sông Cầu nao ksiêm dlăng anôk mâo klei truh, gĭt gai  msir mgaih, boh nik hưn brei răng kơ klei êđăp ênang tơdah mnuih ƀuôn sang wĭt êmiêt pưk sang, ñĕ kơ klei truh kyua pui kmlă, kyâo êbuh leh anăn mnơ̆ng knur êdei kơ angĭn êbŭ.

Ară anei, dŭm êpul bruă djŏ tuôm ti Dak Lak lŏ dơ̆ng gak răng jih gruê mlam, ksiêm dlăng dŭm anôk adôk êngăp, đru kơ mnuih ƀuôn sang wĭt kơ sang, hơĭt klei hdĭp mda, kñăm kơrŭ wĭt klei hdĭp mda leh anăn mkra mjing hnưm hĭn.

Hluê si klei čih yap phŭn, kluôm čar Gia Lai mâo 2 čô djiê. Êngao kơnăn 2 čô ti ƀuôn hgŭm Quy Nhơn leh anăn An Nhơn êka. Hluê si klei tĭng mkă ka kluôm, ti Gia Lai mâo 45 boh sang klưh rai, êbeh 2.400 boh sang kpŏk čuôr. Angĭn êbŭ mrô 13 ngă kngăm 1 boh kŭm păn, 3 bĭt êlan ti An Vinh klưh hroh. Ti alŭ wăl Hoài Nhơn Bắc, êa ksĭ đĭ lip êbeh 3000 gŏ sang ktuê hang ksĭ, êngao kah knar mơ̆ng 10 - 40cm, mâo anôk truh 80cm.

Dŭm êbâo ha mdiê leh anăn boh kroh rai, lu mnơ̆ng rông djiê, ana kyâo, gơ̆ng pui, ală kĭng angĭn ktlưng êbuh, jhat rai. Kluôm čar lui pui kmlă hnơ̆ng prŏng, klei blŭ hrăm mâo klei kpăk, truh kơ mmông hưn mdah ka dưi mgaih msir kluôm dhuôm. Ară anei, lu alŭ wăl ăt adôk ksiêm dlăng, tĭng mkă klei hmăi, kyua đa đa alŭ wăl adôk ktlah hjăn, ka dưi blŭ hrăm.

Ti čar Quảng Ngãi, hlue si klei ksiêm yap tal êlâo, 50 boh sang kpŏk čuôr, jhat rai, hjăn să Long Phụng luč liê lu hĭn hŏng 45 boh sang kyua angĭn đrŭng. Klei anei brei ƀuh krĭng ktuê hang ksĭ leh anăn krĭng tlung ăt jing anôk hmăi ktang hlăk angĭn găn. Kơ êlan klông, lu ktuê êlan phŭn hmăi djŏ.

Klei anei brei ƀuh klei klưh hroh lăn ti krĭng čư̆ čhiăng ăt mâo lu, boh nik hlăk lăn kma lu êa leh. Ară anei dŭm alŭ wăl dôk lŏ dơ̆ng yap klei luč liê, msir mgaih êjai, mbĭt anăn ktuê dlăng kjăp dŭm krĭng huĭ hyưt kñăm rơ̆ng êđăp ênang kơ mnuih ƀuôn sang.