VOV4.Êđê - Aguah 13/1, ti Hà Nội, Anôk bruă čung ba mnuih ƀuôn sang Gưl dlông mkŏ mjing klei bi kƀĭn online kluôm ala ksiêm wĭt bruă čung ba mnuih ƀuôn sang leh anăn bi mni kơ klei tŭ hluê ngă thŭn “Mđĭ ktang hluê ngă klei bhiăn êngiê kơ mnuih ƀuôn sang” thŭn 2021, pŏk ngă bruă klam thŭn 2022. Khua hlăm Phŭn bruă kđi čar, Khua hlăm Anôk dlăng bruă Đảng Võ Văn Thưởng nao leh anăn gĭt gai klei bi kƀĭn.  Blŭ hrăm hlăm klei bi kƀĭn, Võ Văn Thưởng mtă kơ bruă čung ba mnuih ƀuôn sang păn kjăp boh klei, hmao lač kơ ai tiê, klei čiăng djŏ klă mơ̆ng mnuih ƀuôn sang mguôp kơ bruă Đảng, bruă sang čư̆ êa ksiêm dlăng msir mgaih, boh nik dŭm bruă djŏ tuôm kơ klei hdĭp, bruă mă, prăk hrui wĭt mnuih ƀuôn sang. Mbĭt anăn brei thâo săng klă, êlam hĭn, djăp ênŭm hĭn kơ klei mĭn “Mnuih ƀuôn sang jing phŭn”, mđĭ lar ai ktang mơ̆ng yang ƀuôn, ai ktang bi hgŭm djuê ana. Mđĭ ktang hdră bi ktưn “phung čung ba mnuih ƀuôn sang mbruă” mơ̆ng bruă kđi čar, mguôp hŏng dŭm klei mtrŭt mjhar, hdră bi ktưn khăp kơ ala čar hlăm dŭm mta bruă, rơ̆ng djŏ klă, tŭ dưn.

H’Zawut pô mblang