VOV4.Êđê -  Aguah 20/9, êpul mă bruă mơ̆ng Anôk bruă gĭt gai gưl dlông kơ hdră gang mkhư̆ klei ƀơ̆ng ngăn mâo Đại tướng Tô Lâm, Khua hlăm Phŭn bruă kđi čar, Khua Phŭn bruă kahan ksiêm, K’iăng Khua anôk bruă gĭt gai gưl dlông kơ hdră gang mkhư̆ klei ƀơ̆ng ngăn ngă khua êpul mâo leh mmông mă bruă hŏng bruă Đảng čar Dak lak kơ boh phŭn hưn mdah hră čih dŭm klei tŭ mơ̆ng êpul ksiêm dlăng mrô 4 ti Anôk dlăng bruă Đảng čar Dak Lak. Hlue hră čih hưn mdah klei tŭ ksiêm dlăng mơ̆ng êpul ksiêm dlăng, grăp thŭn, Anôk bruă Đảng čar Dak Lak mtrŭn leh anăn hlue ngă hdră kčah ksiêm dlăng bruă kčŭt hưn, phat kđi klei mâo, klei soh ƀơ̆ng ngăn, bruă duh mkra, klei dleh dlan, mâo mnuih ƀuôn sang mđing leh anăn ktuê dlăng dŭm klei ksiêm dlăng kơ bruă duh mkra- ala ƀuôn ti đa đa alŭ wăl, anôk bruă leh anăn bi mguôp mta phŭn anei hlăm hdră mkŏ mjing hlue ngă dŭm hdră êlan prŏng mơ̆ng Đảng leh anăn hdră bhiăn Knŭk kna hŏng hdră gang mkhư̆ klei ƀơ̆ng ngăn.

Klah čŭn mmông mă bruă, Đại tướng Tô Lâm,  Khua hlăm Phŭn bruă kđi čar, Khua Phŭn bruă kahan ksiêm, K’iăng Khua Anôk bruă gĭt gao Gưl dlông kơ hdră gang mkhư̆ klei ƀơ̆ng ngăn mtă: Anôk dlăng bruă Đảng čar Dak Lak lŏ dơ̆ng gĭt gai dŭm gưl bruă, bruă sang čư̆ êa alŭ wăl, dŭm bruă đảng ksiêm kjăp leh anăn hlue ngă bi jăk klei mĭn, hdră mtrŭn, hdră kčah mơ̆ng Đảng leh anăn hdră bhiăn mơ̆ng Knŭk kna, ăt msĕ mơh bruă Đảng čar leh anăn Anôk dlăng bruă Đảng čar, Khua knơ̆ng bruă sang čư̆ êa čar kơ hdră gang mkhư̆ klei ƀơ̆ng ngăn.

Mđĭ ktang bruă ksiêm dlăng, ktuê dlăng ăt msĕ mơh čŏng ksiêm dlăng, ktuê dlăng mơ̆ng Anôk dlăng bruă Đảng, dŭm gưl bruă Đảng hŏng hdră gang mkhư̆ klei ƀơ̆ng ngăn, bruă tŭ mă, msir mgaih klei kčŭt hưn kơ phung ngă soh leh anăn klei akâo kčŭt hưn. Mđĭ hnơ̆ng ksiêm dlăng, ktuê dlăng, čŏng ksiêm dlăng, akâo msir mgaih klei êdi kƀah. Mbĭt anăn, Anôk dlăng bruă Đảng čar Dak Lak pral mkŏ mjing hdră kčat msir mgaih klei êdu kƀah leh anăn hlue ngă djăp ênŭm klei akâo lač leh hlăm Hră hưn mdah klei tŭ ksiêm dlăng mơ̆ng Êpul ksiêm dlăng mrô 4, hưn mdah hŏng Anôk gĭt gai gưl dlông gang mkhư̆ klei ƀơ̆ng ngăn hlue si hdră kčah. Hjăn hŏng čar Dak Lak, anôk dlăng bruă Đảng brei mđing dlăng hĭn hlăm bruă gĭt gai dŭm anôk bruă djŏ tuôm thâo ƀuh hnưm klei hâo hưn kơ phung ngă soh hlăm bruă lăn ala, ngăn dŏ, răng mgang dliê.

H’ Zawut pô mblang