Lŏ dơ̆ng Klei bi kƀĭn tal 7, hruê anei, Anôk bruă kƀĭn ala pioh jih hruê bi trông ti Sang bi kƀĭn prŏng kơ Klei hâo mdah mơ̆ng Êpul ksiêm dlăng lehanăn klei čih mkra Hdră mtrŭn mơ̆ng Anôk bruă kƀĭn ala kơ boh tŭ ksiêm dlăng bruă hluê ngă Hdră mtrŭn mrô 43 thŭn 2022 mơ̆ng Anôk bruă kƀĭn ala kơ hdră ngăn prăk đru krŭ wĭt, mđĭ kyar bruă duh mkra ala ƀuôn lehanăn dŭm hdră mtrŭn mơ̆ng Anôk bruă kƀĭn ala kơ dŭm hdră yuôm bhăn truh kơ thŭn 2023.

Mơ̆ng boh tŭ ksiêm dlăng bruă hluê ngă Asăp mtrŭn 43 mơ̆ng Anôk bruă kƀĭn ala brei ƀuh, bruă ba mdah Hdră mtrŭn anei jing djŏ klă hlăm klei mâo mơ̆ng hdră duh mkra – ala ƀuôn mơ̆ng ala čar hlăk dôk tlă anăp hŏng lu klei dleh dlan kyua hmăi mơ̆ng klei ruă Covid 19. Mơ̆ng anăn hdră duh mkra mâo leh klei krŭ wĭt pral hlăm thŭn 2022, hŏng hnơ̆ng đĭ kyar GDP mâo êbeh 8%, jing hnơ̆ng đĭ lu êdi hlăm wưng 2011 - 2022.  Êpul ksiêm dlăng mơ̆ng Anôk bruă kƀĭn ala ăt tĭng dlăng, dŭm hdră mtrŭn bruă ngăn prăk, klei brei čan hlăm Hdră mtrŭn 43 pral đru bi dul klei ktrŏ hlăm bruă ngăn prăk kơ mnuih hmăi kjham mơ̆ng klei ruă Covid 19 hlăm dŭm mmông dleh dlan hĭn./.