VOV4.Êđê - Aguah hruê 14/6, Anôk bruă kƀĭn ala bi trông leh ti sang bi kƀĭn prŏng kơ Klei čih mkra Hdră bhiăn hluê ngă klei ngă phŭn mil pô ti nah gŭ. Êlâo kơ bi trông, lu klei blŭ sa ai hŏng klei čiăng êdi ba mdah Hdră bhiăn, kyua ngă phŭn mil pô jing hdră čiăng mnuih ƀuôn sang mđĭ lar klei ngă phŭn mil pô, bi êdah klei mĭn, klei čang hmăng, klei tŭ lehanăn klei dưi mơ̆ng pô, nao hgŭm hlăm hdră bruă knŭk kna yang ƀuôn ngă phŭn. Ƀiădah mtă brei kčah mtrŭn klă klơ̆ng hdră hưn mthâo klă mngač klei hâo hưn, klei đua klam mơ̆ng pô djă akŏ hlăm bruă anei. Êlâo anăn, bi trông ti êpul kơ Klei čih mkra Hdră bhiăn hluê ngă klei ngă phŭn mil pô ti nah gŭ, lu phung bi ala akâo brei ksiêm dlăng hdră hâo hưn, ăt msĕ mơh kčah mtrŭn klei đua klam mơ̆ng pô djă akŏ hluê ngă hdră bruă anei. Să, ƀuôn hgŭm, wăl krah jing gưl pŏk ngă, ba dŭm hdră mtrŭn mŭt hlăm klei hdĭp lehanăn jĕ giăm mnuih ƀuôn sang hĭn. Kyua snăn, kpă mngač hlăm bruă hluê ngă klei ngă phŭn mil pô ti gưl nah gŭ brei ksiêm dlăng klă nik, rơ̆ng hdră “Mnuih ƀuôn sang thâo, mnuih ƀuôn sang bi trông, mnuih ƀuôn sang ngă, mnuih ƀuôn sang ksiêm dlăng, mnuih ƀuôn sang dưn yua”./.

H’Nêč pô mblang