Hruê 4/12, Anôk bruă kƀĭn ala bi trông ti Sang bi kbĭn prŏng hưn mdah hdră ngă bruă wưng thŭn 2021 – 2025 mơ̆ng Khua lăn čar, Knŭk kna, Anôk bruă kƀĭn ala lehanăn dŭm anôk bruă mơ̆ng bruă kƀĭn ala, Ksiêm tĭng knŭk kna, Sang phat kđi yang ƀuôn gưl dlông lehanăn Knơ̆ng ksiêm dlăng yang ƀuôn gưl dlông.

Phung bi ala bi mklă, wưng thŭn 2021 – 2025 mâo lu klei dleh dlan, lông dlăng ƀiădah ala čar ăt rơ̆ng klei đĭ kyar lehanăn ba wĭt lu boh tŭ dưn yuôm bhăn. Bi ala anôk bruă kƀĭn ala čang hmăng hlăm wưng păn bruă ti anăp, Anôk bruă kƀĭn ala lehanăn Knŭk kna lŏ dơ̆ng hrăm mbĭt, ba mdah lu klei mĭn mrâo kơ hdră mđĭ kyar ala čar. Lu klei blŭ mtă kơ Anôk bruă kƀĭn ala mđĭ lar bruă klam “Nao êlâo sa knhuang kơ dŭm klei bhiăn”, bi kdơ̆ng pral anăp klei mâo sĭt, dlăng klei bhiăn jing “Boh kdrŭt đĭ kyar”. Êlâo anăn, tlăm 3/12, ti Sang bruă kƀĭn ala, Khua anôk bruă kƀĭn ala Trần Thanh Mẫn nao ti Klei bi kƀĭn ksiêm wĭt hdră mă bruă gưl XV mơ̆ng Êpul bi ala anôk bruă kƀĭn ala thơ̆ng kơ bruă ti alŭ wăl./.