VOV4.Êđê- Hdră bruă “Anôk bruă mkăp brei êmô mjeh” mơ̆ng Êpul gru bi kal hrah ƀuôn prŏng Ƀuôn Ama Thuôt, čar Dak Lak mkŏ miing hlăm dŭm thŭn êgao dưi ba wĭt leh lu boh tŭ dưn klă klơ̆ng êjai đru kơ lu gŏ sang gĭr ktưn tlaih mơ̆ng klei ƀun ƀin.

Thŭn 2017, amai H’Râu Hđơ̆k, ti ƀuôn Ki, ƀuôn hgŭm Thành Nhất, ƀuôn prŏng Ƀuôn Ama Thuôt, čar Dak Lak mâo Êpul gru bi kal hrah đru sa drei êmô ana mđai. Truh ară anei, êmô ana anei mđai leh 2 drei. Mrâo anei, amai čhĭ leh sa drei êmô knô êbeh 15 êklăk prăk, amai mkra leh war rông ŭn. Bi êmô êđai amai lŏ brei kơ gŏ sang dleh dlan mkăn rông. Amai H’Râu brei thâo: Bruă duh mkra ƀrư̆ hruê ƀrư̆ h’ĭt kjăp, thŭn êlâo, gŏ sang amai akâo kbiă mơ̆ng anăn dŭm gŏ êsei ƀun.

“Lač jăk kơ Êpul gru bi kal hrah ƀuôn prŏng brei kơ kâo sa drei êmô ară anei gŏ sang kâo dul leh klei dleh dlan. Gŏ sang kâo ăt lŏ rông mơh, čiăng kơ êmô mđai lu hĭn, khădah dleh dlan ƀiădah ăt gĭr ktưn mă bruă knuă.

Êpul hgŭm gru bi kal hrah ƀuôn prŏng Ƀuôn Ama Thuôt ksiêm dlăng gru hmô êmô mđai

Leh sa wưng rông, êmô gŏ sang amai H’Phiêt Niê, ti ƀuôn Kmrơ̆ng Prŏng A, să Êa Tu, ƀuôn prŏng Ƀuôn Ama Thuôt mđai leh mơh. Amai H’Phiêt brei thâo:

“Êmô anei knŭk kna brei, sang kâo dleh dlan snăk kyua anăn arăng brei kơ kâo sa drei êmô wĭt rông, kâo dôk hlăm gŏ sang ƀun, sang dôk kăn mâo lei ară anei mâo sa drei êmô, mmông êmô mđai kâo hơ̆k snăk, knŭk kna brei kơ kâo snăn kâo hŏng amĭ kâo rông yơh”

Phạm Khánh Quyên, Khua êpul gru bi kal hrah ƀuôn prŏng Ƀuôn Ama Thuôt, čar DakLak brei thâo: Hlăm dŭm thŭn êgao, êpul jao leh 50 drei êmô ana đru kơ dŭm gŏ sang dleh dlan, lu jing mnuih djuê ƀiă, mâo hdră mđĭ kyar bruă duh mkra.

Lu gŏ êsei ƀun gĭr ktưn hgao klei dleh dlan kyua rông êmô mđai

Hdră ngă anei dưi mđĭ lar nanao, hbĭl êmô ana anei mđai, gŏ sang tŭ mă êmô anăn srăng brei sa drei êmô êđai kơ sa gŏ sang dleh dlan mkăn. Čiăng mđĭ lar êpul êmô, êpul gru bi kal hrah ƀuôn prŏng bi hgŭm leh hŏng anôk bruă mdrao mgŭn mkŏ mjing hdră mtô mjuăt kơ hdră mnêč rông êmô kơ mnuih ƀuôn sang.

“Gru hmô anei đru leh kơ lu mnuih. Lu jing dưi đru kơ dŭm gŏ sang mâo klei hdĭp dleh dlan, gŏ êsei ƀun knap gĭr ktưn kpưn đĭ jing gŏ sang giăm ƀun, bi dŭm gŏ sang giăm ƀun dưi tlaih leh kơ ƀun. Dŭm gŏ sang anăn ară anei mđĭ kyar leh bruă duh mkra, mâo djăp mnơ̆ng ƀơ̆ng huă, amâo lŏ jưh kang kơ klei đru mơ̆ng knŭk kna. Boh tŭ mơ̆ng “Anôk bruă mkăp” anei hlăk dôk krơ̆ng kjăp lehanăn mâo dŭm gưl bruă ksiêm dlăng. Grăp mlan, anôk bruă djŏ tuôm ăt ba nao êpul knuă druh nao ksiêm dlăng bruă jao êmô kơ dŭm gŏ sang ƀun, dleh dlan adôk ti alŭ wăl.

                                                   Pô mblang: H’Nêč Êñuôl