VOV4.Êđê- Aguah hruê 31/5, Êpul ksiêm dlăng mrô 4 mŏng Anôk gĭt gai Gưl dlông kơ hdră gang mkhư̆ klei ƀơ̆ng ngăn, klei ngă amâo jăk mă leh bruă hŏng anôk bruă Đảng čar Dak Lak, hưn mthâo Klei bi mklă ksiêm dlăng bruă kiă kriê, gĭt gai lehanăn mkŏ mjing hdră hmao ƀuh, tŭ mă, msir mghaih klei kčŭt hưn phung ngă soh, klei ƀơ̆ng ngăn, klei ngă amâo djŏ.

Hluê si hdră kčah, êpul srăng mă bruă hŏng Anôk kiă kriê bruă Đảng čar lehanăn ksiêm dlăng ti 4 êpul mâo bruă Đảng ƀuôn prŏng Ƀuôn Ama Thuôt, Knơ̆ng ksiêm dlăng yang ƀuôn čar, Kahan ksiêm čar, Anôk bruă ksiêm dlăng čar kơ dŭm mta bruă, mâo: Hdră gĭt gai mŏng dŭm gưl bruă Đảng hŏng bruă mlih jao, tŭ mă, msir mghaih klei hâo hưn kơ phung ngă soh, mđing kơ dŭm bruă ênưih mâo klei ƀơ̆ng ngăn, klei ngă amâo jăk, hdră hmao ƀuh, hưn mthâo klei hâo hưn phung ngă soh truh kơ dŭm anôk bruă djŏ tuôm, hdră bi hgŭm plah wah anôk bruă djŏ tuôm hlăm bruă hmao ƀuh, tŭ mă, msir mghaih klei hâo hưn phung ngă soh…

Wưng ksiêm dlăng mơ̆ng hruê 01/01/2011 truh kơ hruê 31/12/2021 lehanăn dŭm klei kčŭt hưn phung ngă soh, hdră ksiêm mkă dlăng dưi ngă êlâo kơ hruê 01/11/2011 ƀiădah ka dưi msir mghaih./. 

                                                    Pô mblang: H’Nêč Êñuôl