VOV4.Êđê - Kyuadah amâo mâo klei mkra wĭt bi jăk leh anăn tu klei hjan prŏng bi rai, kyuanăn lu bĭt êlan ti alŭ wăl čư̆ čhiăng čar Kon Tum mâo klei jhar rai kjham. Tơdah amâo mâo mgaih msir hnưm, klei arưp aram dlưh lăn, mnuih ƀuôn sang bi ktlah hjan hlăm yan hjan anei jing dleh dưi ñĕ đuê̆.

Mơ̆ng alŭ Đăk Ga truh ti wăl krah să knông lăn Đăk Nhoong, kdriêk Đăk Glei, knŏng hlăm brô 3km. Êlâo adih, ktuê êlan anei dưi tuh bêtông ƀiădah kyua amâo dưi răng mgang, mkra mđĭ nanao anăn truh kơ ară anei ƀô̆ êlan kpŏk jih, jhat rai. Mbĭt anăn, kyua krĭng anei amâo jăk găl, ktuê dua nah êlan kreh mâo lu anôk klưh lăn, wăt ti krĭng taluy nah gŭ lehanăn taluy nah dlông. Ayŏng A Cu, khua alŭ Đăk Ga brei thâo, klei găn êrô mơ̆ng 108 gŏ êsei ƀuôn Đăk Ga tlă anăp nanao hŏng klei huĭ hyưt:“Ktuê êlan mơ̆ng alŭ Đăk Ga nao truh kơ să Đăk Nhoong dleh dlan êdi hlăm yan hjan, kreh mâo klei klưh hroh lăn. Huĭ hyưt hĭn jing phung hđeh đĭ êdeh nao sang hră ti ktuê êlan klưh hroh lăn kjham êdi”.

Ktuê êlan kdriêk ĐH83 mâo boh taih dlông hlăm brô 12km mơ̆ng să knông lăn Đăk Nhoong nao truh kơ wăl krah kdriêk Đăk Glei ăt msĕ snăn. Êlâo adih, ktuê êlan anei dưi mkra betông leh, ƀiădah lu thŭn mlan amâo dưi mkra mđĭ kyua anăn ƀô̆ êlan mâo lu ƀăng ƀlŭng pprŏng. Huĭ hyưt hĭn mâo kdrêč êlan klưh jih taluy nah gŭ. Dŭm anôk klưh hroh lăn ƀrư̆ hruê mŭt êlam ti ƀô̆ êlan, bi ti gŭ jing ƀăng êlam. A Nang, K’iăng khua bruă Đảng čar, Khua êpul gơ̆ng bruă ƀuôn sang să Đăk Nhoong brei thâo, wăt anôk bruă sang čư̆ êa lehanăn mnuih ƀuôn sang mâo nanao klei huĭ hyưt srăng mâo klei truh hlăm êlan klông lehanăn huĭ srăng mâo klei gun kpăk, bi ktlah tơdah truh yan hjan.“Tơdah mâo adiê hjan prŏng dŭm blư̆ dơ̆ng, wăt ktuê êlan taluy nah gŭ, taluy nah dlông srăng jhat jih. Mâo lu anôk jhat amâo djŏ knŏng sa, dua ôh. Ti gŭ, ta luy nah gŭ klưh giăm jih leh. Hmei knŏng hưn brei răng êjai đuič, dưm pŏk mdhă, băng rôn čiăng mnuih ƀuôn sang amâo nao trŭn ti anôk anăn. Bi kơ sui thŭn brei msir mghaih jih anôk anei, boh nik taluy nah gŭ”

Kdriêk knông lăn Đăk Glei, čar Kon Tum ară anei mâo 70 km êlan kdriêk, 51 km êlan alŭ, ƀuôn, krĭng pla mjing. Êngao ktuê êlan kdriêk ĐH 84 mrâo duh bi liê mkra mđĭ snăn păt čiăng jih ktuê êlan adôk jhat rai jih. Mta phŭn jing kyua êlan anei mâo duh bi liê, rŭ mkra mơ̆ng êlâo, truh ară anei amâo dưi mkra mđĭ nanao mbĭt hŏng anăn jing adiê hjan ngă klưh hroh lăn, ngă kơ klei găn êrô, boh nik bruă dŭ mdiăng mnơ̆ng lŏ hma mơ̆ng mnuih ƀuôn sang tuôm hŏng lu klei dleh dlan. Yan hjan thŭn anei lu să ti kdriêk Đăk Glei, msĕ si: Đăk Nhoong, Đăk Blô, Mường Hoong, Ngọc Linh… dôk tlă anăp hŏng klei gun kpăk êlan găn êrô lehanăn bi ktlah lu krĭng mnuih ƀuôn sang dôk.

Hluê si Adŭ bruă Duh mkra lehanăn Anôk bruă nah gŭ kdriêk Đăk Glei, čar Kon Tum, êlâo hĭn, êpul êya srăng tĭng mkă bruă mkăp prăk kñăm lŏ mkra êjai dŭm anôk jhat rai ti ktuê êlan mâo kdriêk kriê dlăng kñăm rơ̆ng klei găn êrô lehanăn rơ̆ng klei êđăp ênang êlâo, hlăm lehanăn êdei yan hjan êa lip lêč. Kơ wưng sui, êpul êya srăng akâo kơ čar lehanăn gưl dlông ksiêm dlăng mkăp prăk duh bi liê čiăng hnưm msir mghaih, lŏ mkra mrâo dŭm ktuê êlan phŭn hlăm alŭ wăl./.