Yan mnga truh hŏng grăp čô mnuih, hŏng grăp boh sang! Mmông đuĕ nao kơ thŭn mrâo jăk siam lehanăn yuôm bhăn mơ̆ng lăn adiê, hmei hŏng klei mpŭ hdơr kơ aê aduôn atâo atiêt, kơ dŭm gưl aê ama pô êlâo ktuh êyuh leh ai tiê rŭ mdơ̆ng, mkŏ mjing lăn ala êa djuh, ba hriê yan mnga hnŭk êngiê, mơ̆ng mnuih ƀuôn sang mâo klei êđăp ênang jăk yâo, trei mđao, mjing leh ai ktang klei găl, mđĭ k’hưm kơ lăn čar pô msĕ hŏng ară anei.

          Hlăm ai êwa mtluk mtlak mơak mñai, hưuh mđao drông hrue Tết djuê ana pô, bi ala kơ phung khua kiă kriê Đảng, Knŭk kna, kâo bŏ hŏng klei khăp mơĭt truh hŏng jih jang mnuih ƀuôn sang, dĭng kna, lehanăn lĭng kahan kluôm ala, mnuih ƀuôn sang drei dôk ti ala tac êngao hlăm ai tiê klei khăp, hŏng asăp čuă êmuh sĭt suôr lehanăn klei hơêč hmưi thŭn bhang mrâo jăk siam hĭn. Mơĭt truh hŏng mah jiăng djăp krĭng lăn, mnuih ƀuôn sang dŭm lăn čar dlông rŏng lăn klei hơêč hmưi êđăp ênang, hgŭm mbĭt, hgŭm bruă, lehanăn mâo klei mđĭ kyar kjăp!

          Thŭn êgao, hŏng klei bi mguôp, klei gĭr mơ̆ng kluôm Đảng, jih jang mnuih ƀuôn sang, jih jang lĭng kahan, lăn čar drei dưi bi mklă leh kơ k’hưm mrâo, klei jing mrâo sa Việt Nam kjăp ktnag hlăm klei dleh dlan, thâo gĭrr tui tiŏ klei jăk siam, kyua klei tŭ dưn kơ mnuih ƀuôn sang, mâo lu boh tŭ dưn prŏng, kluôm ênŭm hlăm djăp mta bruă hŏng dŭm klei kruak knăl kdlưn hĭn, jing nanao mah jiăng sĭt suôr, jing êpul hgŭm năng nao knang hŏng dŭm ala čar, mâo lu ala čar mpŭ lehanăn bi mni.

Mmông đĭ nao kơ thŭn mrâo jing mmông yuôm bhăn ciăng kơ drei ksiêm mĭn, kơ djăp mta klei leh êgao, lŏ mĭng kơ klei hdĭp êdei anăp mngač tač hĭn kơ grăp čô mnuih, ruh mgiah jih klei ktrŏ pŏk êlan kơ klei bluh đĭ, dưn yua jih klei găl, srăng mjing ai ktang prŏng mơ̆ng lam, čiăng kơ djuê ana drei kjăp knhuang čhuang nao phă anăp kñăm ba wĭt boh tŭ dưn prŏng hĭn.

Yan mnga pŏk lu klei hmăng hmưi, klei êpa mhao lehanăn kčưm kơ jih jang klei jăk siam hĭn, h’uh mđao hĭn, mdrŏng sah hĭn. Hlăm ai êwa mtluk mtlak yan mnga mơ̆ng lăn adiê lehanăn yan mnga mơ̆ng ai tiê grăp čô mnuih mâo klei bi kuh kŭm, klei mjĕ mjuk, brei drei mđrăm mbĭt tŭ mă ai ktang jăk mơak mrâo, bi mđup brei kơ hdơ̆ng găp djăp mta klei hmăng hmưi jăk siam, bi hơêč hmưi kơ djuê ana dôk nanao, kơ lăn čar knư̆ hrue mdrŏng ktang kjăp siam, kreh dhar, klei hdĭp mnuih ƀuôn sang ƀrư̆ hrue trei mđao, jăk mơak!

 Hơêč hmưi kơ mnuih ƀuôn sang, kơ dĭng kna, grăp gŏ sang, grăp čô mnuih   Việt Nam mâo klei suaih pral, klei hnŭk ênang, klei tŭ jing, lehanăn jăk yâo!

Thŭn mrâo, ai êwa mrâo, klei gĭr mrâo, klei tŭ dưn mrâo!

Kkuh alum hlăm klei khăp!