Ơ ƀĭng dôk hmư̆, lehanăn jih jang phung ƀuôn sang lehanăn lĭng kahan hlăm kluôm ala!

Hlăm mmông yuôm bhăn kkuh drông thŭn mrâo Nhâm Dần, Kâo mgei ai tiê bi ala kơ Đảng, knŭk kna lehanăn Dhar bruă mặt trận čar kwar gưl dlông Việt Nam, alum mơĭt truh hŏng phung ƀuôn sang, lĭng kahan kluôm ala mbĭt hŏng phung ƀuôn sang drei hdĭp kơ ala tač êngao ai tiê klei khăp, asăp hơêč hmưi thŭn mrâo jăk siam hĭn. Kâo alum mơĭt kơ jih jang mah jiăng hlăm djăp krĭng lăn, phung ƀuôn sang dŭm ala čar tar rŏng lăn klei hơêč hmưi êđăp ênang, bi hgŭm, mdrŏng sah lehanăn jăk yâo.

Lŏ hdơr kơ yan mnga Nhâm Ngọ 1942, hlăm hră klei mrâo “Việt Nam hnŭk êngiê”, Khua gĭt gai Hồ Chí Minh čih leh:

Hơêč hmưi kơ kluôm ala drei hlăm thŭn anei

Hla čhiăm gru hrah kđuh bi kđhĭt!

Thŭn anei jing thŭn kdrăm k’ah.

Asăp hơêč hmưi mơ̆ng Awa ară anei bŏ leh 80 thŭn. Khădah hƀuê ênuk pŏk nao hlăm hla mrâo, ƀiădah dŭm knhuah gru mâo mjut mjing mơ̆ng hbuê ênuk djuê ana, hŏng ai tiê bi mguôp, ai tiê thâo bi đru, hŏng klei kjăp, bŏ hŏng knhuah thâo săn asei mơ̆ng phung ƀuôn sang drei ăt nanao amâo mâo thâo bi mlih ôh.

Thŭn 2021, hlăm wưng dôk găn klei lông dlăng hĭn, drei ƀuh leh hlăm anăn lu gru bi hmô jăk siam, klei thâo bi đru, bi khăp, klei thâo săn asei mlei, kyua yang ƀuôn hlăm jih jang adei tlang yang ƀuôn: Anăn yơh jing phung aê mdrao, phung lĭng kahan, phung ba anăp amâo mâo uêñ kơ klei huĭ hyưt, lui jih găp djuê, amĭ ama mduôn, anak điêt kơ tluôn, anăn yơh jing phung mduôn khua ba jih ênoh ngăn pô mâo mkiêt mkuôm pioh mkrum hlăm keh mdrơ̆ng hŏng klei ruă tưp Covid 19; anăn yơh jing phung hđeh êlăk kâč leh dŭm pŏk rup siam êdi, lu klei čih duê jăk, dŭm pŏk hră mơĭt mgei ai tiê bi êdah klei hmăng hmưi, ai tiê klei khăp hŏng phung nai aê mdrao, mbĭt hŏng dŭm klei đăo knang kơ ai ktang Việt Nam hlăm klei lông dlăng mơ̆ng klei ruă tưp prŏng anei...

Hlăm mnĭt mmông yuôm bhăn anei, mâo anak mnuih Việt Nam drei ăt dôk hlăm anôk gang mkhư̆ klei ruă tưp, phung lĭng kahan hrue mlam dôk răng kriê klei êđăp ênang, răng mgang knông lăn, plao ksĭ, amâodah phung ayŏng amai adei ti lu dhar bruă mdê mdê lŏ dơ̆ng ktuh êyuh kơ bruă knuă, amâo mâo mdei Tết kluôm ênŭm hŏng găp djuê ôh.

Đảng, knŭk kna lehanăn phung ƀuôn sang mpŭ mni kơ dŭm klei thâo gĭr kyua bruă klam hŏng yang ƀuôn. Lăn čar čih pioh dŭm klei phung ƀuôn sang, phung lĭng kahan săn asei mlei, mpŭ mni kơ ai tiê phung ƀuôn sang pô kơ ala tač êngao, lehanăn klei thâo bi đru mơ̆ng mah jiăng ala tač êngao.

Mơ̆ng dŭm klei lông dlăng knŏng lŏ čuih bi kjăp hĭn ai ktang, lehanăn klei thâo bi mguôp sa ai tiê, mơ̆ng dŭm klei thâo gĭr, ai tiê kut kat, năng jing leh knhuah jhŏng ktang mơ̆ng aê ama pô hlăm dăl hƀuê ênuk “Aguah mdrơ̆ng hŏng angĭn êbŭ, tlam gang mkhư̆ mđiă hlơr”, găn leh dŭm êbâo thŭn rŭ mdơ̆ng lehanăn răng kriê lăn ala êa djuh.

Sa blư̆ dơ̆ng hơêč hmưi kơ jih jang gŏ sang, găp ênuê djuê êpul mnuih Việt Nam drei hŏng klei thâo khăp, mâo dŭm hrue Tết mơak mñai, h’uh mđao, lehanăn bŏ ênŭm êđăp ênang. Alum hơêč kơ grăp čô mnuih Việt Nam, jih jang phung ƀuôn sang drei thŭn mrâo Nhâm Dần 2022 êđăp ênang, suaih pral, tŭ jing, lehanăn jăk yâo.

Alum mpŭ mni, lač jăk, lehanăn hơêč hmưi thŭn mrâo!