Čiăng mkŏ mjing klei bi lông bi ruê̆ klei hriăm gưl 3 leh anăn ruah mă hđeh sang hră gưl prŏng, mtô mjuăt bruă mă thŭn 2023, Khua knŭk kna mtă kơ Phŭn bruă mtô mjuăt bi hriăm, dŭm Phŭn, dhar bruă, anôk bruă knŭk kna, bruă sang čư êa dŭm čar, ƀuôn prŏng gưl dlông kñăm hluê ngă bruă klam dưi jao, hlăm anăn, hŏng Phŭn bruă mtô mjuăt bi hriăm ba mdah ênŭm, djŏ hruê mmông dŭm hră mơar gĭt gai, mtô lač, hdră êlan mkŏ mjing klei bi lông leh anăn ruah mă hđeh sang hră gưl prŏng, gưl krah phung nai mtô hđeh điêt, rơ̆ng kơ klei bi lông êđăp ênang, klă sĭt, djăp ênŭm hnơ̆ng čuăn klei bi lông.

Bi hŏng bruă sang čư êa dŭm čar, ƀuôn prŏng gưl dlông: gĭt gai mkŏ mjing hluê ngă leh anăn đua klam kơ klei bi lông ti alŭ wăl. Mkŏ mjing klei găl kơ klei êrô êbat, huă ƀơ̆ng, mdei msăn kơ phung hđeh bi lông leh anăn phung nao atăt digơ̆ ti dŭm anôk bi lông, boh nik jing phung bi lông mâo klei hdĭp dleh dlan, krĭng taih kbưi, krĭng mnuih djuê ƀiă, krĭng čư̆ čhiăng leh anăn knông lăn, plao ksĭ.