Điểu Ngăm (66 thŭn, mnuih Mnông, ti ƀuôn Bi Gia, Quảng Trực) brei thâo, Dŭm hruê anei, ñu kreh nao ti ssang dhar kreh ƀuôn čiăng dlăng kơ hră anăn phung  mgơ̆ng asei pô bi ala Êpul gơ̆ng bruă ƀuôn sang să, wưng kơ anăp. Hluê si Điểu Ngăm, phung mgơ̆ng asei jing phung hriăm lu, mâo klei hriăm mă bruă hlăm wưng sui, kyuanăn ñu hmăng hmưi dưi ruah phung thâo, mâo knhâo, klă sĭt jing pô bi ala kơ mnuih ƀuôn sang, jing kdrông mkŏ plah wah Đảng, knŭk kna hŏng mnuih ƀuôn sang, đru ba dŭm hdră êlan kơ mkŏ mjing krĭng knông lăn jăk siam hĭn.

 “Kâo kkiêng leh anăn prŏng tinei. Dŭm hruê anei, grăp hruê kâo hriê ti Sang dhar kreh čiăng dlăng hră anăn phung mgơ̆ng asei bi ala Êpul gơ̆ng bruă ƀuôn sang să. Kâo hơ̆k mơak leh anăn ktưn hưn êjai nao mplĕ hră, hmăng hmưi dưi ruah phung thâo, phung knhâo, klă sĭt bi ala kơ ƀuô, đru kơ ƀuôn sang Quảng Trực đĭ kyar hĭn.”

Thị Huynh (mnuih M’nông), Khua êpul mplĕ hră mrô 2 (ƀuôn Bu Prăng 2), să Quảng Trực brei thâo, êpul mplĕ hră mâo hlăm brô 300 čô mplĕ hră, 98% jing mnuih Mnông. Leh klei kƀĭn tal 2 hruê 3/2, amai mbĭt hŏng 8 čô đảng viên hur har hâo hưn, hlăk mblang hdră bhiăn mplĕ hră, mtô kơ phung mplĕ hră ksiêm duah phŭn agha, hdră ngă bruă mơ̆ng phung mgơ̆ng ruah, čiăng rơ̆ng kơ bruă nao mplĕ hră djŏ hdră bhiăn, êngiê, ruah phung êdah êdi, năng bi ala kơ klei mĭn leh anăn klei čiăng mơ̆ng mnuih ƀuôn sang.

 “Ară anei sang dhar kreh ƀuôn mâo leh hră anăn phung mgơ̆ng asei bi ala Êpul gơ̆ng bruă ƀuôn sang să čiăng kơ mnuih ƀuôn sang dlăng, ruah phung bi ala mâo djăp klei thâo, klei hriăm, jing kdrông mkŏ plah wah mnuih ƀuôn sang hŏng Đảng leh anăn knŭk kna. Hluê anăn, đru ba dŭm hră êlan đru mơ̆ng gưl dlông kơ klei duh bi liê, mkŏ mkra đru kơ mnuih ƀuôn sang đĭ kyar hĭn.”

Gưl mplĕ hră ruah phung bi ala Bruă kƀĭn ala  gưl 14 leh anăn Êpul gơ̆ng bruă ƀuôn sang dŭm gưl wưng thŭn 2026 – 2031, să knông lăn Quảng Trực mâo êbeh 7.200 čô bi ala, mplĕ hră ti 12 anôk hlăm 11 ƀuôn leh anăn Trung đoàn 726. Đoàn Lê Anh, khua dhar bruă mặt trận să Quảng Trực hưn, bruă răng mgang klei êđăp ênang, dăp dŭm anôk mplĕ hră, mprăp kơ huôm hră leh anăn dŭm klei găl đru kơ klei mplĕ hră dưi ngă hrăm mbĭt, mprăp kơ hruê ruah khua. Ară anei alŭ wăl dôk bi leh dŭm bruă knhal tuč, mprăp kơ klei kƀĭn knhal tuč, anăp truh ngă hră anăn klă klơ̆ng phung bi ala Êpul gơ̆ng bruă ƀuôn sang să wưng kơ anăp. Đoàn Lê Anh,  brei thâo:

 “Wưng mplĕ hră thŭn 2026 – 2031, hmei dôk bi mguôp hŏng dŭm anôk bruă čiăng êdei kơ lei kƀĭn tal 3 mă hră anăn phung mgơ̆ng asei pô bi ala Bruă kƀĭn ala  ăt msĕ mơh phung bi ala Êpul gơ̆ng bruă ƀuôn sang čar mơĭt kơ alŭ wăl, čiăng hluê ngă ênŭm dŭm hră mơar, rơ̆ng kơ klei mplĕ hră dưi ngă djŏ klei čuăn. Bi hŏng Êpul gơ̆ng bruă ƀuôn sang să ară anei hmei ksiêm dlăng, mprăp kơ bi kƀĭn knhal tuč bi klă hră anăn mơ̆ng 40 čô bi ala jing 33 čô, anăp truh ruah 20 čô bi ala Êpul gơ̆ng bruă ƀuôn sang kơ wưng păn bruă kơ anăp.”

Hŏng klei mprăp jăk, klă nik, klei ruah khua ti să knông lăn Quảng Trực srăng mkŏ mjing hŏng klei êngiê, djŏ hră bhiăn, mkŏ mjing ai êwa hơ̆k mơak hlăm mnuih ƀuôn sang. Mnuih ƀuôn sang Mnông mơĭt klei đăo knang hlăm hră mplĕ. Hmăng hmưi dưi ruah phung bi ala djăp klei thâo, klei knhâo, jĕ giăm, thâo săng mnuih ƀuôn sang. Hluê anăn, đru mkŏ mjing ƀuôn sang Quảng Trực ƀrư̆ hruê ƀrư̆ mrâo mrang, mdrŏng siam.