Mă bruă lehanăn mâo klei hơêč hmưi Tết kơ bruă Đảng, bruă sang čư̆ êa lehanăn mnuih ƀuôn sang čar Tây Ninh, Khua gĭt gai Tô Lâm mơĭt kơ phung khua thŭn hlăm  cách mạng, phung amĭ Việt Nam jhŏng ktang, phung lĭng kahan yang ƀuôn, mnuih kdlưn hĭn hlăm klei mă bruă knuă, mbĭt hŏng jih jang lĭng kahan lehanăn mnuih mă bruă mbĭt hŏng mnuih ƀuôn sang čar Tây Ninh klei čuă êmuh, klei hdơr knga, lehanăn asăp hơêč hmưi kơ klei suaih pral jăk mơak, tŭ jing.

Khua gĭt gai Đảng lač, mơ̆ng ară anei truh kơ thŭn 2030 lehanăn kbưi hĭn jing thŭn 2045 jing yuôm bhăn snăk hlăm hdră êlan mđĭ kyar lăn čar. Hlăm klei anăn, Tây Ninh mâo bruă klam yuôm bhăn, amâo mâo djŏ knŏng hjăn kơ klei mđĭ kyar čar, ƀiădah hlăm jih krĭng lehanăn hlăm kluôm ala.  Tây Ninh jing mnư̆ mnang kjăp ti knông lăn, lehanăn jing anôk mkŏ yuôm bhăn mơh plah wah krĭng Ngŏ kwar dhŭng, hŏng krĭgn yŭ kwar dhŭng, jing anôk krơ̆ng kjăp klei êđăp ênang hgŭm mbĭt, jing anôk mđĭ kyar mrâo hlăm bruă duh mkra mnia mblei, bruă  logistics lehanăn klei duh mkra ti ƀăng jang knông lăn. Khua gĭt gai Đảng mtă, alŭ wăl mkŏ mjing bi jăk klei ruah khua phung bi ala bruă kƀĭn ala gưl 16 lehanăn êpul gơ̆ng bruă ƀuôn sang wưng thŭn 2026–2031; ruah mnuih năng jing pô bi ala kơ ai tiê klei mĭn mnuih ƀuôn sang, đru bi kjăp jih jang anôk bruă mâo mnuih ƀuôn sang ruah, răng mgang kjăp klei êđăp ênang yang ƀuôn lehanăn hlăm knông lăn, mkŏ mjing kdriêl knông lăn hnŭk êngiê, hgŭm mbĭt, lehanăn đĭ kyar./.