Blŭ hrăm ti knăm mphŭn pŏk Klei kƀĭn trông, Nai prŏng nai prĭn Nguyễn Xuân Thắng, Khua Êpul hgŭm hlak mblang Gưl dlông brei thâo: Klei kƀĭn trông jing hdră prŏng êdi čiăng ba Hdră mtrŭn Klei bi kƀĭn Đảng tal XIV mŭt hlăm klei hdĭp. Mơ̆ng anei, kñăm hyuă kjăp klei gĭt gai mơ̆ng Khua gĭt gai Đảng Tô Lâm jing brei ngă bruă mtam leh Klei bi kƀĭn, hŏng ai tiê kjăp, mjêč, klă sĭt, đru mguôp hlăm bruă hluê ngă tŭ jing dŭm mta kñăm, bruă klam mơ̆ng Klei bi kƀĭn Đảng tal XIV.

Anei jing Klei bi kƀĭn tal êlâo lehanăn brei drei mkŏ mjing lu Klei bi kƀĭn thơ̆ng kơ bruă, êlam hlăm grăp mta klei. Hlăm anăn mâo wăt hdră mđĭ kyar pral, hơĭt kjăp hlăm boh klei mrâo, kơ hnơ̆ng đĭ kyar dua ênoh mrô mguôp hŏng bruă bi mklă gru hmô đĭ kyar mrâo, brei mâo klei bi kƀĭn êlam msĕ snăn. Brei drei mâo dŭm klei bi kƀĭn trông kơ hdră mđĭ kyar bruă kreh knhâo, mrâo mrang, mlih mrô ƀiădah yuôm hĭn jing mkŏ mjing hluê ngă Hdră mtrŭn anăn boh nik, Hdră mtrŭn 57, 59, 66, 68… Dlăng kluôm mâo 9 hdră mtrŭn klă klơ̆ng, bi sĭt ai tiê hluê ngă Hră mơar Klei kƀĭn tal XIV. Ai tiê mơ̆ng Hră mơar Klei bi kƀĭn jing drei ăt hơĭt kjăp êbat ti gŭ hla čhiăm gru mơ̆ng Đảng, hgŭm ai, hgŭm kngan hluê ngă mta kñăm 100 thŭn, hŏng ai tiê čŏng pô, gĭr ktưn kpưn đĭ mŭt hlăm ênuk gưl mrâo. Mta kñăm knhal tuič jing mkra mđĭ klei hdĭp yâo mơak kơ mnuih ƀuôn sang.

Ti anôk bi kƀĭn trông mkŏ mjing 2 hdră bi trông, mâo “Ba ai tiê mrâo mơ̆ng Hră mơar Klei bi kƀĭn tal XIV mŭt hlăm klei hdĭp” lehanăn “Ba hdră ngă bruă mơ̆ng Klei bi kƀĭn XIV mơ̆ng Đảng mŭt hlăm klei hdĭp”.

Kơiăng nai prŏng, nai prĭn Dương Trung Ý, Khua čih hră klei mrâo Tạp chí Cộng sản mñă: Klei bi kƀĭn XIV jing Klei bi kƀĭn mơ̆ng hdră mlih mrâo, bi mlih klei mĭn, hnơ̆ng trah dlăng lehanăn klei čang hmăng đĭ kyar, jing Klei kƀĭn mơ̆ng klei thâo, klei mĭn lehanăn klei gĭr ktưn prŏng hŏng dŭm hdră mtrŭn prŏng čiăng ba ala čar hơĭt kjăp mŭt hlăm ênuk gưl mrâo mơ̆ng djuê ana. Hră mơar tal anei mâo klei čiăng mrâo jing ngă bruă, lač hlŏng ngă mtam, bi mklă bruă klam, mta kñăm, hdră msir mguôp hŏng klei đua klam kơ boh tŭ, mguôp hŏng hdră mđĭ kyar hơĭt kjăp, mguôp hŏng bruă hluê ngă bruă mđing kơ klei sa ai hlăm mnuih ƀuôn sang. Kơiăng nai prŏng, nai prĭn Dương Trung Ý lač snei:

Boh sĭt mñă klă, boh tŭ yuôm mơ̆ng Hră mơar Klei bi kƀĭn amâo djŏ knŏng kñăm kơ mta phŭn klei mĭn dưi čih lehanăn mdah hlăm hră mơar ƀiădah lŏ dưi ksiêm dlăng bi mklă hlăm boh sĭt. Hră mơar Klei bi kƀĭn knŏng mâo boh tŭ yuôm lehanăn klă sĭt hdĭp tơ dưi bi êdah, klei bhiăn mjing dŭm hdră mtrŭn djŏ, mkŏ mjing hluê ngă tŭ dưn, mjing klei bi mlih hlăm klei hdĭp bruă kđi čar, bruă duh mkra ala ƀuôn, hlăm bruă lĭng kahan, răng mgang klei êđăp ênang, bruă hŏng tač êngao mơ̆ng ala čar lehanăn bi êdah klei bi mlih ktang phĭt mơ̆ng boh sĭt, ti klei mđĭ kyar klei hdĭp mnơ̆ng dhơ̆ng, ai tiê klei mĭn lehanăn klei đăo knang mơ̆ng mnuih ƀuôn sang hŏng Đảng, Knŭk kna. Čiăng đru mkŏ mjing hluê ngă bi sĭt dŭm mta kñăm, klei đua klam hlăm Hră mơar Klei kƀĭn tal 14 mơ̆ng Đảng, bruă thâo săng, hluê ngă kjăp ai tiê klei mĭn mrâo hlăm Hră mơar Klei bi kƀĭn tal 14 jing yuôm bhăn lehanăn čiăng êdi.

Klah čŭn ti anôk bi kƀĭn trông, Kơiăng nai prŏng, nai prĭn Đoàn Minh Huấn, Khua sang hră ksiêm hriăm bruă kđi čar ala čar Hồ Chí Minh tĭng dlăng: Klei bi kƀĭn bi êdah klă, mjêč, pral hŏng ai tiê mơ̆ng Gưl dlông tal anei anăn jing hdră ngă bruă, amâo găn lu hdră krah wah ƀiădah klă anăp mtam dŭm bruă čiăng hluê ngă Hdră mtrŭn Klei bi kƀĭn XIV. Aio tiê ngă bruă mơ̆ng Klei kƀĭn trông bi êdah klă klei bi mlih hlăm hdră bi trông lehanăn hnơ̆ng tŭ jăk mơ̆ng grăp klei blŭ đru mguôp. Phung bi ala mđing bi trông kơ dŭm bruă phŭn, mơ̆ng bi mlih gru hmô đĭ kyar, mđĭ kyar bruă duh mkra êngao knŭk kna truh kơ bruă lĭng kahan, răng mgang klei êđăp ênang, bruă hŏng tač êngao. Mñă kơ dŭm bruă phŭn brei pŏk ngă, Đoàn Minh Huấn mtă kơ dŭm anôk bruă brei bi hgŭm hluê ngă tŭ dưn hdră ksiêm dlăng Hdră mtrŭn Klei bi kbĭn XIV mơ̆ng Đảng hlăm hdră kčah, klei ngă bruă mơ̆ng grăp êpul, anôk bruă.

Êlâo kơ Klei bi kƀĭn snăn mđing ba  Klei hdĭp hlăm Hdră mtrŭn. Leh mâo Hdră mtrŭn lŏ ba Hdră mtrŭn mŭt hlăm klei hdĭp. Anei jing bruă hlak mblang lehanăn boh sĭt, snăn drei dlăng tinei. Dŭm mta phŭn bi êdah hlăm anei mâo dŭm bruă mjêč tal êlâo, wưng thŭn 2026, mâo dŭm bruă kơ wưng man dưn, wưng sui, mâo dŭm hnơ̆ng trah dlăng kơ bruă hlăm sui thŭn, mâo bi trông klă nik. Dŭm bruă phŭn mâo bruă mjing tur knơ̆ng kơ hdră mđĭ kyar, mâo dŭm bruă djŏ tuôm kơ gru hmô, mâo dŭm bruă djŏ tuôm ko hdră ngă bruă, mơ̆ng klei ngă bruă kluôm truh kơ klei ngă bruă mdê bi alŭ wăl./.