VOV4.Êđê- K’iăng khua knŭk kna Lê Minh Khái mrâo bi mklă Hdră mtrŭn ba jao prăk duh hlăm hdră gang mkhư̆, mdrơ̆ng hŏng klei ruă Covid 19 mâo đăo tĭng hlăm thŭn 2021 kơ Phŭn bruă mdrao mgŭn ka yua jih hlăm thŭn anei ba jao kơ thŭn 2022 kñăm yua hlăm hdră gang mkhư̆, mdrơ̆ng hŏng klei ruă Covid 19. Klă klơ̆ng, Hdră mtrŭn anei brei ba jao jih prăk duh hlăm hdră gang mkhư̆, mdrơ̆ng hŏng klei ruă Covid 19 thŭn 2021 mơ̆ng Phŭn bruă mdrao mgŭn truh 4.643.821 êklăk prăk (mâo wăt prăk blei vaccine, mnơ̆ng yua tlŏ mgang, tŭ mă, kriê pioh, dŭ mdiăng vaccine gang mkhư̆ Covid 19) truh ti thŭn 2022 ăt yua kơ bruă anei hluê si klei ba mdah mơ̆ng Phŭn bruă Ngăn prăk. Hdră mtrŭn ăt mtă, hŏng prăk duh hlăm hdră gang mkhư̆, mdrơ̆ng hŏng klei ruă Covid 19 thŭn 2022, Phŭn bruă mdrao mgŭn mâo hdră ba yua djŏ guôp ênoh prăk anei, bi hgŭm hŏng Phŭn bruă Ngăn prăk čiăng ba mdah hră m’ar djŏ hŏng klei dưi tơdah lŏ čiăng thiăm mbŏ (tơdah mâo) tui djŏ si klei kčah mtrŭn, mđĭ hdră kriê dlăng, ba yua lehanăn bi mklă ênoh prăk bi liê hlăm hdră gang mkhư̆, mdrơ̆ng hŏng klei ruă Covid 19, rơ̆ng klei tŭ dưn, klă mngač, djŏ hdră bhiăn./.

Pô mblang: H’Nêč Êñuôl