Tŭ ư asăp jak iêu mơ̆ng Khua gĭt gai Đảng Nguyễn Phú Trọng lehanăn Mô̆ ñu, Khua lăn čar Võ Văn Thưởng lehanăn mô̆ ñu, mphŭn mơ̆ng hruê 12/12, Khua gĭt gai China Tập Cận Bình lehanăn Mô̆ ñu srăng hriê čhưn kơ Việt Nam hlăm 2 hruê. Anei jing gưl hiu čhưn kơ Việt Nam tal 3 mơ̆ng Tập Cận Bình hŏng k’hưm ngă Khua gĭt gai China, êlâo anăn hlăm thŭn 2015, 2017 lehanăn Việt Nam jing ala čar tal 2 Tập Cận Bình hiu čhưn hlăm thŭn anei amâo mâo mguôp hŏng dŭm hdră bruă lu tĭng.

Mĭn tĭng, hlăm gưl čhưn, dua tĭng srăng bi trông kơ bruă bi mklă mrâo kơ klei bi mjĕ dua nah, mtrŭt mđĭ hdră bi hgŭm kluôm dhuôm mơ̆ng dua ala čar êlam hĭn lehanăn klă sĭt hĭn. Mbĭt hŏng klei jăk siam hlăm klei bi mjĕ 2 ala čar kơ hdră bi hgŭm bruă duh mkra – mnia mblei, klei bi mjĕ hlăm bruă kđi čar, bi hgŭm mă bruă mơ̆ng Đảng, knŭk kna, Anôk bruă kƀĭn ala, Mặt trận ăt msĕ mơh dŭm Phŭn, dhar bruă yuôm bhăn mkăn msĕ si bruă hŏng tač êngao, lĭng kahan, kahan ksiêm, bruă knông lăn lehanăn mjĕ mjuk mnuih ƀuôn sang dua ala čar dưi mâo dŭm boh tŭ dưn, ba wĭt klei tŭ klă sĭt kơ mnuih ƀuôn sang dua ala čar./.