VOV4.Êđê- Lŏ wĭt mă bruă leh dŭm hruê mdei Tết nguyên đán, phung kdŏ mmuiñ mơ̆ng êpul kdŏ mmuiñ djuê ana čar Dak Lak lŏ mprăp êmiêt hŏng hruê mmông hriăm mjuăt kơ klei kdŏ mmuiñ mrâo. Y Kô Niê, Khua Êpul brei thâo, wưng êlâo Tết, jih êpul pioh lu mmông leh anăn hruê mmông hriăm kơ 2 hdră kdŏ mmuiñ drông thŭn mrâo leh anăn mlam drông mŭt thŭn mrâo. Mdê hŏng grăp thŭn, kyua hmaĭ mơ̆ng klei ruă tưp anăn hdră mdah klei kdŏ mmuiñ knŏng ngă ti Anôk bruă dhar kreh čar leh anăn dưi mđung rup ti mmông anăn mtam leh anăn hlăm Tivi leh anăn Youtube. Leh Tết, jih êpul bi ala srăng kčah hruê mmông mkŏ mjing dŭm hdră kdŏ mdah hlăm gưl čar leh anăn êrô hiu truh ti dŭm anôk čiăng mdah kơ mnuih ƀuôn sang leh boh klei ruă tưp Covid-19 dưi ktuê dlăng.

“Êlâo hĭn jing mprăp kơ dŭm hruê mơak, klei bi hdơr leh anăn lăn čar. Êlâo hĭn ăt hluê ngă leh anăn leh mmông Tết snăn lŏ dơ̆ng pŏk ngă. Tơdah klei ruă tưp amâo dưi pŏk ngă snăn srăng lŏ mdar rup dŭm hdră, kdrêč leh anăn mđung hlăm dŭm kdrăp hâo hưn mtô mblang, dŭm hla pŏk web ala ƀuôn mơ̆ng hdră mđung čiăng kơ mnuih ƀuôn sang, leh anăn jih ƀĭng găp dlông rŏng lăn dưi ktuê dlăng.”

Bi ti Gialai, Êpul hiu hâo hưn mơ̆ng Êpul kdŏ mmuiñ Damsan, hlăm knơ̆ng bruă dhar kreh – mjuăt asei mlei, hiu čhưn ênguê Gialai ăt trŭn kơ bruă hiu hâo hưn, hiu mdah klei kdŏ mmuiñ kơ phung ƀuôn sang. Êlâo dih, grăp thŭn, êpul hiu ngă dŭm êtuh gưl hiu hâo hưn, lu jing hlăm dŭm krĭng taih kbưi, krĭng mnuih djuê ƀiă hlăm čar Gialai. Siămdah, thŭn 2021 leh êgao, kyua klei ruă tưp kăm gha klei dôk bi ngi lu mnuih, snăn êpul ăt bi mlih mơh hdră hiu hâo hưn, anăn jing hŏng hdră mdar video, mđung hlăm dŭm hla pŏk yang ƀuôn Facebook, youtube hlue hŏng hdră mdê mdê. Klei anei ăt dưi bi leh mơh bruă knuă lehanăn mâo hâo hưn truh hŏng lu phung ƀuôn sang mơh. Amai H’Blup jing knuă druh êpul hiu hâo hưn mơ̆ng Êpul kdŏ mmuiñ Damsan brei thâo:

“Hmei jing phung knuă druh dhar kreh, ngă bruă hiu hâo hưn. Hmei bi mguôp hŏng hdră mdah klei kưt mmuiñ čiăng kơ phung ƀuôn sang mđi ai tiê, leh sa hrue suăi êmăn hŏng bruă knuă. Mơ̆ng anăn, hmei bi mguôp hŏng dŭm hdră êlan mơ̆ng Đảng, hdră bhiăn knŭk kna. Leh kơ anăn, čiăng kơ phung ƀuôn sang thâo săng Đảng lehanăn knŭk kna mâo klei mđing hĭn êdi, duh mĭn kơ klei hdĭp mda phung ƀuôn sang. Mbĭt hŏng anăn, hâo hưn mtô mblang kơ diñu bi thâo săng, ñĕ đuĕ mơ̆ng phung soh, phung mplư, amâo mâo ba klei jhat asei mlei, kơ phung ƀuôn sang hlăm ƀuôn ôh”./.