Hruê knhal jih hruê kăm, ti wăl Sang hră gưl hđeh Bình Minh, să Ea Na, čar Dak Lak kdrưh kơăm asăp tlao. Phung hđeh hur har dưi dlăng klei kdŏ mmuñ, mơak mlan pur leh anăn mâo mă mnơ̆ng. Adei H’Jun Hie Ksơr, 5 thŭn, hđeh sang hră gưl hđeh, brei thâo:

 “Hruê anei kâo mơak kyua mâo phung amiêt, neh mbha ƀêñ keŏ kơ hmei. Hmei bi mni kơ diñu lu snăk”

 Hdră knăm mơak mlan pur hŏng akŏ “Kdrưh kơăm asăp tlao - bi kah mbha klei khăp” kyua adŭ  Hriăm kơ klei kđi čar A55A, Sang hră kđi čar čar Dak Lak mkŏ mjing, mđup brei leh 210 hnư mnơ̆ng kơ hđeh sang hră. Nguyễn Thị Lệ Nga,  Khua sang hră gưl hđeh Bình Minh brei thâo:

“ Hđeh sang hră tinei jing mnuih djuê ƀiă, lu jing phung anak čô mâo klei djŏ phung. Phung hđeh mâo klei hdĭp dleh dlan, dŭm hnư mnơ̆ng anei jing phŭn mđĭ ai tiê prŏng prĭn hŏng phung nai leh anăn hđeh sang hră tinei”

 Hlăm wưng anăn mơh, ti ƀuôn Tuôr B, să Ea Na, bruă ngă knăm mơak mlan pur kơ phung hđeh kyua Anôk bruă ksiêm dlăng čar Dak Lak bi hgŭm mkŏ mjing mđup brei 75 hnư mnơ̆ng kơ phung hđeh leh anăn gŏ êsei ƀun.

Amâo djŏ knŏng ti să Ea Na ôh, lu ƀuôn sang ti Dak Lak dŭm hruê anei ăt mơak mñai ênai hdơr êmông gŭ, mngač pui hruh.

Ti să Êa Mdroh, 300 hnư mnơ̆ng dưi jao kơ phung hđeh ti ƀuôn kgŭ krŭ kdơ̆ng đưm hluê Hdră Pui hruh guh mngač klei čang hmăng. Bi ti ƀuôn Kŏ Êmông, Êpul êdam êra să Dang Kang bi hgŭm hŏng dŭm êpul mâo ai tiê kmah mkŏ mjing hdră kdŏ anak rai, tŭk ƀung hdang, khăt ƀŭk amâo mă prăk lehanăn mdup brei čhum ao, mnơ̆ng yua hriăm hră, mđup brei mnơ̆ng Trung thu kơ giăm 700 čô hđeh ti 2 ƀuôn Čư̆ Păm lehanăn Čư̆ Kŏ Êmông. Klei mơak mơak mlan pur lŏ truh hŏng phung hđeh ti Anôk đru ba phung hđeh ala ƀuôn leh anăn phung hđeh čar Dak Lak mơ̆ng hdră Knăm mơak mlan pur kyua Knơ̆ng bruă mdrao mgŭn čar mkŏ mjing. Phung hđeh dưi hgŭm hlăm klei bi lông pui hruh, kdŏ mmuñ leh anăn mâo mă mnơ̆ng, hnư prăk hriăm hră. Nguyễn Xuân Quý,  Khua Anôk bruă brei thâo:

“Thŭn anei Knơ̆ng bruă mkŏ mjing sa hdră ti Anôk bruă đru ba ala ƀuôn čar Dak Lak leh anăn sa anôk bruă mnuih ƀuôn sang mkŏ mjing, hŏng dŭm bruă msĕ si bi lông mkra pui hruh, kdŏ mmuñ. Hdră ăt mâo đa đa phung mâo ai tiê kmah hrăm mbĭt, mđup brei dŭm hnư mnơ̆ng, hnư prăk hră kơ phung hđeh găn klei dleh dlan. Mơ̆ng anăn čang hmăng srăng lar bra truh hŏng jih jang phung hđeh găn klei dleh dlan, jing phung hđeh jăk hriăm thâo Awa Hồ leh anăn jing mnuih tŭ dưn kơ ala ƀuôn”.

 Hlăm ênai hdơr kdrăm kơah, asăp tlao mơak mñai mbĭt hŏng ênai hơ̆k mơak hŏng bruă ngă, klei mơak bi êdah klă hlăm ƀô̆ mta phung hđeh. Adei Nguyễn Thị Minh Châu brei thâo:

“Mrăp kơ knăm mơak mlan pur snăn hmei mtô bi hriăm phung hđeh kdŏ mmuñ, mkra pui hruh, kdŏ anak rai. Kâo khăp hĭn jing dưi dlăng kdŏ anak rai, mâo arăng mđup brei mnơ̆ng. Truh knăm mơak mlan pur snăn kâo mâo lu klei mđing uêñ mơ̆ng Êpul mâo ai tiê kmah, phung đru brei leh anăn phung khua gĭt gai, mđup brei kơ kâo mnơ̆ng wăt tơdah điêt dưn snăñ jing yuôm bhăn snăk”.

Adei Nguyễn Ngọc Hân mơak brei thâo:

“Grăp thŭn snăn tinei phung hđeh ăt mkŏ mjing knăm mơak mlan pur kơ hmei, mâo lu ƀêñ leh anăn mă pui hruh. Hmei bi msiam kơ grăp boh  sang, klei kdŏ mmuñ phung ayŏng amai jing iêô ayŏng wĭt ti Yŭ Dưr, lŏ mâo klei kdŏ mmuñ phung hđeh anăn jing Knăm mơak mlan pur nao ti ƀuôn prŏng”.

Dŭm hnư mnơ̆ng, klei hlăp mơak mñai hŏng pô bi hmô Aduôn Sun hŏng Y Rit đru leh kơ phung hđeh dleh dlan ti Dak Lak ƀuh ai êwa khăp hơiêng leh anăn kah mbha. Amâo djŏ knŏng ba klei mơak ôh, dŭm hdră lŏ dơ̆ng thiăm klei ktang čiăng kơ phung hđeh gĭr găn klei dleh dlan, kriê dlăng, hriăm thâo./.