VOV4.Êđê - Êbeh 30 êpul êya tar rŏng lăn leh anăn 100 knơ̆ng bruă prŏng mơ̆ng ala tač êngao srăng nao hlăm klei kƀĭn trông ba mdah hdră čuăl mkă leh anăn mtrŭt mđĭ duh bi liê krĭng dap mnai krông Cửu Long wưng thŭn 2021 – 2030, mkŏ mjing hruê mgi 21/6 ti ƀuôn prŏng Cần Thơ. Klei hâo hưn mrâo mâo phŭn bruă hdră êlan leh anăn duh bi liê hưn mthâo hŏng phung čih klei mrâo. Klei kƀĭn trông anei srăng dưi tă hdră hluê ngă hdră mtrŭn mrô 13 mơ̆ng phŭn bruă kđi čar kơ hdră êlan mđĭ kyar bruă duh mkra ala ƀuôn, rơ̆ng klei êđăp ênang, bruă lĭng kahan krĭng dap mnai krông Cửu Long truh ti thŭn 2030, tă hdră truh thŭn 2045, bi tŭ ư hluê ngă hdră čuăl mkă leh anăn mtrŭt mđĭ duh bi liê krĭng dap mnai krông Cửu Long wưng thŭn 2021 – 2030, tă hdră truh thŭn 2050. K’iăng khua phŭn bruă hdră êlan leh anăn duh bi liê Trần Quốc Phương brei thâo: Klei kƀĭn anei mâo boh tŭ yuôm bhăn hlăm bruă bi klă klei thâo săng hlăm jih jang gưl bruă, dhar bruă, kơ bruă klam leh anăn klei yuôm bhiăn bruă bi mguôp krĭng. Klei anei srăng jing klei gĭt gai bruă đĭ kyar kluôm krĭng leh anăn grăp alŭ wăl hlăm krĭng.

Y-Ƀel pô mblang