VOV4.Êđê- Pui kmlă Dak Nông mrâo bi leh bruă tŭ mă, ba yua hdră bruă mkăp pui kmlă, duh kơ 360 gŏ êsei mnuih ƀuôn sang ti alŭ Dak Lang, să Quảng Khê, kdriêk dak Glong. Anei jing alŭ wăl taih kbưi, mnuih ƀuôn sang hdĭp rah rưng, klei hdĭp adôk dleh dlan kyua ka mâo pui kmlă yua hlăm klei hdiưo leh anăn mkra mjing.

Bi sĭt klei mnuih ƀuôn sang čang hmăng, PC Dak Nông duh bi liê hdră bruă ba pui kmlă ala čar truh ti alŭ Dak Lang, mâo: mkŏ mjing mrâo 4 anôk mđĭ mtrŭn pui kmlă, giăm 2,5 km êlan klei nah gŭ, 5,8 km êlan klei pui nah dlông, ênoh bi liê êbeh 3 êklai 5 êtuh êklăk prăk. Hdră rŭ mdơ̆ng, mnuih ƀuôn sang hlăm alŭ mjing leh klei găl kơ hdră msir ruh mgaih anôk ala, đru kơ phung mă bruă mdơ̆ng gơ̆ng, kă klei… čiăng kơ hdră bruă pral dưi bi leh.

Bruă ba pui kmlă ala čar truh ti dŭm krĭng mnuih djuê ƀiă, krĭng taih kbưi jing klei gĭr prŏng mơ̆ng PC Dak Nông leh anăn kei bi hgŭm jăk mơ̆ng alŭ wăl. Bruă mkăp pui kmlă jing yuôm bhăn hlăm bruă mkŏ mkra krĭng ƀuôn sang mrâo, đru kơ mnuih ƀuôn sang mđĭ kyar bruă duh mkra, bi hrŏ ƀun leh anăn mđĭ klei hdĭp./.

Pô mblang: H’Zawut Ƀuôn Yă