VOV4.Êđê - Thŭn 2021, Dak Lak dưi găn leh sa thŭn hŏng lu klei lông dlăng, dleh dlan lehanăn dưi mâo boh tŭ dưn yuôm bhăn, mjing tur knơ̆ng kơ thŭn 2022 lehanăn hluê ngă Hdră mtrŭn Klei bi kƀĭn bruă Đảng čar tal XVII wưng thŭn 2020 - 2025.  Hương Lý, Pô čih klei mrâo kơ Sang mđung asăp blŭ Việt Nam ti krĭng Lăn dap kngư mâo leh klei bi blŭ hrăm hŏng Nguyễn Đình Trung, Khua hlăm Anôk bruă Đảng gưl dlông, Khua bruă Đảng čar Dak Lak kơ dŭm boh tŭ dưn mâo bruă Đảng, bruă sang čư̆ êa lehanăn mnuih ƀuôn sang dŭm djuê ana čar Dak Lak dưi mâo mbĭt hŏng klei gĭt ktưn hluê ngă “Mta kñăm mdua” hlăm dŭm thŭn mlan ti anăp:

-Ơ Nguyễn Đình Trung, thŭn 2021 jih leh, anei ăt jing thŭn tal êlâo čar Daklak hlue nga hdră mtrŭn Klei bi kƀĭn prŏng Đảng čar tal 17, lehanăn hdră duh mkra ala ƀuôn 5 thŭn 2021 – 2025. Akâo kơ ih yăl dliê lăng kơ dŭm boh tŭ dưn êdah êdi čar Daklak mâo leh hlăm thŭn êgao?

- Nguyễn Đình Trung: Thŭn 2021 dôk hlăm klei dleh dlan kyua klei ruă tưp Covid 19, lehanăn hmăi amâo mâo jăk kơ lu mta bruă hlăm čar, Bruă Đảng čar, Êpul kiă kriê bruă Đảng hlăm čar bi kiă kriê, gĭt gai leh dŭm gưl bruă Đảng, bruă sang čư̆ êa, lehanăn phung ƀuôn sang hlăm čar ngă jăk bruă mdrơ̆ng hŏng klei ruă tưp, lehanăn jih jang bruă mđĭ kyar klei duh mkra mnia mblei, bruă mkŏ mjing Đảng, mkŏ mjing bruă kđi čar hŏng ai tiê “knư̆ tuôm hŏng klei dleh dlan, knư̆ hin mơh mdĭ klei thâo bi mguôp, gĭr bi leh jih jang bruă klam mâo kčah mtrŭn.Boh tŭ dưn thŭn 2021, čar mâo ngă leh mta bruă jăk. Mđĭ kyar bruă duh mkra ala ƀuôn snăn mâo leh 15/16 ênoh čuăn dưi bi leh, lehanăn kdlưn hĭn hŏng ênoh kčah. Hlăm anăn, iêo mkrum prăk duh bi liê mơ̆ng kluôm yang ƀuôn mâo êbeh 42 êbâo 100 êklai prăk, djăp 141% mkă hŏng hdră kčah mtrŭn. Hlăm klei mđĭ kyar bruă duh mkra, snăn bruă mkra mjing phŭn pui bi êran hŏng ai angĭn jing leh sa mta bruă dôk nga êdah hĭn êdi hlăm čar. Čar mâo iêo jak leh klei duh bi liê truh kơ 28 mta bruă, hŏng ênoh prăk duh bi liê tui si čih hlăm hră mơar jing êbeh 24 êbâo êklai prăk. Lu mta bruă mrâo dơ̆ng ngă bruă đru leh sa kdrêč kơ klei mđĭ kyar duh mkra ala ƀuôn hlăm čar. Thŭn 2021, bruă mkŏ mjing Đảng, klei mkŏ mjing bruă kđi čar ăt mâo klei mđing, lehanăn ngă bi jăk hĭn jih jang bruă, lehanăn dưi bi leh ênoh čuăn hŏng klei jăk.

- Jăk leh, mbĭt hŏng jih jang boh tŭ dưn leh mâo hlăm bruă mđĭ kyar klei duh mkra ala ƀuôn, bruă mkŏ mjing Đảng, mkŏ mjing bruă kđi čar ăt mâo čar Daklak mđing ngă nanao. Anei dưi yap jing bruă dleh dlan, bruă ktrŏ, năng mă bruă hŏng klei mbruă. Snăn, čhuang hlăm thŭn tal dua hlue ngă hdră mtrŭn klei bi kƀĭn prŏng Đảng 13, lehanăn klei bi kƀĭn prŏng Đảng čar 17, snăn si lŏ dơ̆ng ngă jih jang bruă anei?

-Nguyễn Đình Trung: Hdră mtrŭn mơ̆ng bruă Đảng čar thŭn 2022 mâo bi klă leh: “Lŏ dơ̆ng hyuă kjăp hĭn bruă mkŏ mjing, ƀư̆ mkra Đảng tui si hŏng hdră mtrŭn gưl dlông 4, gưl 12 lehanăn 13 mđrĭng hŏng bruă hlue ngă asăp mtrŭn mrô 05 lehanăn klei bi mklă mrô 01, hrue 18/5/2021 mơ̆ng Phŭn bruă kđi car hŏng dŭm bruă yuôm bhăn snei:

Tal sa: Mkŏ mjing hlue ngă klei bi mklă mrô 21, hrue 25/10/2021 mơ̆ng Dhar bruă kiă kriê bruă Đảng gưl dlông mđĭ hĭn bruă mkŏ mjing lehanăn ƀư̆ mkra Đảng, lehanăn jih jang bruă kđi čar. Kut kat gang mkhư̆, bi msưh kdŭn, lehanăn mghaih msir ktang knuă druh đảng viên toh hroh klei mĭn knhuah hdĭp, mâo dŭm bruă ngă amâo mâo djŏ čiăng klah đuĕ.

Tal dua: Mkŏ mjing êpul phung đảng viên mâo djăp klei thâo, mâo knhuah dôk dơ̆ng ƀơ̆ng huă jăk, mâo k’hưm knar hŏng bruă klam. Mlih mrâo dăp wĭt êpul nga bruă bi mâo klei tŭ jing jih jang bruă kđi čar mguôp hŏng bruă bi hrŏ ênoh mnuih ngă bruă. Dăp wĭt êpul ngă bruă, lehanăn dăp anôk ngă bruă bi jăk.

Tal tlâo: Bi mlih hdră êlan mă bruă, mđĭ hĭn klei thâo kiă kriê, ai ktang hlăm klei bi blah mơ̆ng dŭm êpul bruă Đảng, đản viên. Hlăm anăn mđĭ hĭn bruă klam ba anăp, thâo bi hmô jăk dưn yua jih bruă klam mơ̆ng đảng viên. Mđĭ hĭn bruă ksiêm dlăng, hyuă kjăp klei bhiăn.

Tal pă: Mđĭ klei tŭ dưn bruă gang mkhư̆, lehanăn hmao ƀuh pral klei ƀơ̆ng ngăn, ƀrư̆ ƀrư̆ bi kdŭn jih klei ƀơ̆ng ngăn, klei bi liê plă plia. Mâo klei ksiêm dlăng ktang, mghaih msir djăp mta boh klei kđi soh. Boh nik dŭm mta kđi klei ƀơ̆ng ngăn prŏng mâo yang ƀuôn ƀuah ăl.

Klei knhal tuič jing, bruă mặt trận čar kwar Việt Nam lehanăn dŭm êpul bruă kđi čar čŏng dưn yua jih bruă klam bi leh mta kñăm mơ̆ng Hdră mtrŭn hlăm bruă mkŏ mjing Đảng, mkŏ mjing bruă sang čư̆ êa, mkŏ mjing êpul knuă druh đảng viên hlue ngă jăk bruă klam mâo kčah jao.

- Êjai dôk găn klei ruă tưp Covid 19 bŏ hŏng klei dleh dlan, čiăng rơ̆ng kơ bruă dưi gang mkhư̆ klei ruă tưp êjai lehanăn mđĭ kyar bruă duh mkra êjai, lehanăn dưi bi leh ênoh čuăn mơ̆ng dŭm hdră mtrŭn Klei bi kƀĭn prŏng Đảng djăp gưl. Êpul kiă kriê bruă Đảng čar si hdră êlan mâo leh čiăng kiă kriê hlăm wưng kơ anăp?

-Nguyễn Đình Trung: Thŭn 2022 tui si klei đăo knăl klei ruă tưp ăt adôk dleh dưi ksiêm dlăng mơh. Kyuanăn yơh, Dhar bruă kiă kriê Đảng čar mâo leh asăp mtrŭn mrô 16 kơ bruă gĭt gai bruă mdrơ̆ng hŏng klei ruă tưp hŏng boh klei mrâo, kñăm kiă kriê kluôm jih bruă kđi čar ngă jăk bruă mdrơ̆ng hŏng klei ruă tưp. Hlămanăn bi klă bruă phŭn msĕ snei:

Sa jing, čŏng păn kjăp jih jang klei ruă tưp, kiă kriê hŏng klei pral, ktrâo atăt djăp hdră năng ngă mtam, đăm lui tơl truh kơ klei dleh dlan rŭng ktrŏ ôh, đăm jing êgao hnơ̆ng đei ôh kơ sang êa drao.

Tal dua, mđĭ hĭn bruă mtô mblang mtă mtăn hlăm klei hâo hưn, mđĭ klei thâo săng hlăm phung ƀuôn sang, kơ bruă mdrơ̆ng hŏng klei ruă tưp Covid 19.

Tlao jing, mđing kiă kriê jih jang dŭm bruă Đảng kdriêk, wăl krah, ƀuôn prŏng, lehanăn êpul êya bruă mprăp kơ hdră gang mkhư̆ hlăm wưng tết nguyên đán Nhâm Dần.

Pă jing, lŏ dơ̆ng hlue nga bi kjăp Hdră mtrŭn mrô 128 mơ̆ng knŭk kna lehanăn hdră mơ̆ng phŭn bruă mdrao mgŭn, lehanăn knơ̆ng bruă sang čư̆ êa čar. Hlăm anăn ksiêm wĭt bi djŏ, pral dŭm hnơ̆ng klei ruă tưp truh, kñăm ba yua djăp hdră djŏ guôp, êjai klei ruă tưp dôk găn bŏ hŏng klei dleh dlan anei. Rơ̆ng dưi ngă bruă mdua mdrơ̆ng hŏng klei ruă tưp êjai, lehanăn mđĭ kyar bruă duh mkra êjai hlăm čar./.  

- Lač jăk kơ ih lu!