VOV4.Êđê - Mơ̆ng lu thŭn hŏng anei, klei bi dôk ung mô̆ mơ̆ng mda hlăm dŭm djuê ana mnuih djuê ƀiă ti krĭng Lăn Dăp Kngư ăt lŏ jing mta klei mâo lu klei amâo jăk nah tluôn. Năng lač jing dŭm êpul êya, bruă sang čư êa dŭm gưl knŏng dưi thâo klei anei leh diñu bi dôk leh, êjai phung hđeh “huă ka trei, klei mĭn mâo leh”, braih knă jing leh êsei, jing mô̆, jing ung, jing amĭ ama, lŏ wĭt hlăm klei ư̆ êpa, ƀun ƀin – amâo mâo hriăm hră mơar – dôk ung mô̆ mơ̆ng mda.

Hlăm adŭ điêt ka bŏ 8m2 ti ƀuôn Ea Sin, să Ea Sin, kdriêk Krông Ƀŭk, čar Dak Lak, H’Qui Niê dôk gĭr bi juh anak điêt 3 thŭn, ti adhei mƀlir mnơ̆ng bi lưh êngoh. Êwang, ƀô̆ mta ơ̆ng hlăm ao đŭt, H’Qui msĕ si khua hĭn kơ 18 thŭn. Adei mniê ñu H’Ngân Niê, 15 thŭn, ăt suăi êmăn msĕ si amai ñu mơh mrâo kkiêng anak êbeh 1 mlan. Dua amai adei dôk ung mơ̆ng 15 thŭn, ară anei hƀlok snăn djăp klei truh leh. H’Qui brei thâo: “Tơdah dưi lŏ ruah snăn kâo srăng ruah đru gŏ sang êlâo leh anăn kơh dôk ung, dôk ung hnưm snăn pap anak pô kyua amâo djăp klei găl rông anak ôh. Bi ară anei djăp klei êgao leh snăn gĭr yơh.

Adei mniê H’Ngân ăt ênguôt êưn lač msĕ mơh “Kâo dôk hriăm adŭ 6, ti sang dleh dlan snăn kâo dôk ung. Dlăng ƀĭng găp nao sang hră, pô kkiêng anak, krŏng ală mlan dlăng anak kâo ênguôt mơh”.

Hƀlŏk jing klei mĭn msĕ mơ̆ng phung hlâo ung mô̆ ti Dak Lak jing ung mô̆ hlăk ka truh thŭn. Klei hdĭp êngiê kơ klei hdĭp, bruă mă kđăl jih. Phung hđeh dưi kkiêng msĕ si mjưh mdei klei hdĭp diñu, mơ̆ng thŭn hlăk êdam êra ngiêk anăn truh kơ hlăk khua. Adei H’Thơ Mlô, kkiêng thŭn 2002 ti ƀuôn Ea Pông, să Ea Sin, kdriêk Krông Ƀun - amĭ mơ̆ng hđeh ka bŏ 3 thŭn brei thâo: “Tơdah gŏ sang jăk msĕ si arăng kâo ăt čiăng nao sang hră msĕ hŏng ƀĭng găp. Mâo hruê bi tuôm hŏng digơ̆ nao sang hră kâo ăt luh êa ală mơh, kyua ƀuh phung găp pô nao sang hră dưi hơô siam, pô tluh mơh.”

 Phạm Ngọc Diệp, Knuă druh hâo hưn mtô mblang kơ hdră mnêč ƀă kkiêng anak Ea Sin, brei thâo ñu ênguôt snăn kơ klei bi dôk ung mô̆ mơ̆ng mda ti alŭ wăl, ƀiădah amâo thâo ôh si srăng ngă čiăng đru. Kyua boh sĭt, leh ƀuh snăn diñu bi jing ung mô̆ leh. Boh nik, êla ung mô̆ mda asei nao ngă hră anăn anak kơh bruă sang čư̆ êa thâo “Mâo đa đa gŏ sang snăn thâo leh anăn nao mtrŭt mjhar anăn mâo đa đa hđeh ba tian leh. Đa đa mkăn snăn alŭ wăl ăt nao, ƀiădah nao msir mgaih snăn diñu đuê̆ dăp anăn dleh dlan snăk.”

Hlue si nai prŏng Lý Thị Say, Anôk bruă alŭ wăl 2 hlăm Dhar bruă djuê ana, klei bi dôk ung mô̆ mơ̆ng msa jing sa klei dleh dlan hlăm krĭng mnuih djuê ƀiă. Grăp thŭn, Knŭk kna pioh lu prăk bi liê kơ bruă hâo hưn mtô mblang kñăm bi hrŏ klei bi dôk ung mô̆ mơ̆ng mda, ƀiădah truh hlue ngă klei tŭ dưn amâo jăk ôh. Hlue si nai prŏng, gang mkhư̆ klei bi dôk ung mô̆ mơ̆ng mda brei dưi mđing dlăng bi klă hlăm sang hră, mprăp klei thâo săng kơ êkei mniê, kơ hdră bhiăn, leh anăn bruă klam mâo leh jing ung mô̆, čiăng kơ phung hđeh thâo săng leh anăn mâo klei hrŏng ruah djŏ klă kơ klei hdĭp pô.

Ăt mđĭ bruă klam mơ̆ng klei mtô bi hriăm êkei mniê, klei jing gŏ sang hlăm sang hrăm Hoàng Thị Thu Hoài, Anôk bruă mdrao mgŭn kdriêk Krông Ƀuk brei thâo, bruă sang hră mtô bi hriăm brei ngă ktang hĭn kơh bruă gang mkhư̆ klei bi dôk ung mô̆ mơ̆ng mda dưi mâo klei bi mlih sĭt: “Drei ƀuh bruă mtô bi hriăm kơ êkei mniê kơ phung hđeh ti sang hră khă gơ̆ mâo klei pŏk ngă ƀiădah bruă sang hră anăn ka dưi ngă jêñ jêñ ôh leh anăn msĕ si hlăm hdră mtô bi hriăm drei ka dưi lač kpă, lač tlă anăp ôh. Hŏng phung hđeh gưl anei lu klei wĭt ngă jing bruă mkăp klei thâo kơ klei bi dôk êkei mniê msĕ si bruă kriê dlăng klei suaih pral ƀă kkiêng anak jing ktrâo êlan kơ diñu ngă soh. Ƀiădah tơdah drei ngă djŏ hdră snăn phung hđeh srăng mâo klei thâo săng djŏ hĭn. Kyua anăn brei mđĭ ktang klei mtô hriăm kơ êkei mniê hlăm sang hră gưl 2 jing čiăng êdi.”

 Bi dôk ung mô̆ hlăk thŭn huă ka trei, mĭn ka klă anăn lu phung bi dôk ung mô̆ mơ̆ng mda hdĭp hlăm klei ƀun knap, amâo hriăm hră mơar, hmaĭ amâo jăk kơ klei suaih pral. Tơdah amâo mâo hdră msir tŭ dưn čiăng bi hrŏ klei bi dôk ung mô̆ mơ̆ng msa, klei ƀun ƀin - amâo hriăm hră- bi dôk ung mô̆ mơ̆ng mda lŏ mâo nanao hlăm krĭng mnuih djuê ƀiă ti Dak Lak./.