VOV4.Êđê - Aguah hruê 4/4, ti Hà Nội, bruă Đảng dŭm anôk bruă gưl dlông mkŏ mjing leh Knăm bi hdơr 15 thŭn hruê mkŏ mjing. Hruê 11/4/2007, Phŭn bruă kđi čar (gưl X) ba mdah leh Klei bi mklă mrô 47 mkŏ mjing bruă Đảng dŭm anôk bruă gưl dlông hluê ngă bi hgŭm 7 anôk bruă Đảng êpul dŭm anôk bruă gưl dlông. Mơ̆ng sa bruă Đảng dưi mkŏ mjing hlăm ênuk kdơ̆ng mblah bi kdơ̆ng hŏng Prăng ti kdrăn mblah Việt Bắc hŏng 6 anôk bruă Đảng mâo dŭm êtuh čô Đảng viên, truh kơ ară anei, bruă Đảng anei mâo êbeh 70.700 čô Đảng viên. 15 thŭn êgao, bruă Đảng anôk bruă anei gĭr hgao klei dleh dlan, lông dlăng, mjing klei bi mlih prŏng hlăm kluôm dhuôm hlăm djăp bruă. Hŏng hdră “Hgŭm mguôp – Ngă phŭn mil pô – Thâo mĭn – Kjăp ktang – Gru mngač”, hlăm wưng ti anăp, anôk bruă Đảng bi mklă leh bruă mkŏ mkra, đĭ kyar anôk bruă kđi čar hlăm wưng thŭn 2020 - 2025 jing: “Mkŏ mjing, ƀư̆ mkra Đảng doh mngač, kjăp ktang, mđĭ lar ai tiê hgŭm mguôp, ngăn phŭn mil pô, mlih mrâo lehanăn mđĭ hĭn klei đua klam ba akŏ mơ̆ng phung knuă druh, đảng viên”.

H’Nêč pô mblang