Dŭm hruê mlan 4 hƀuê ênuk, Thượng tá Nguyễn Thị Minh, knuă druh hđăp kahan ksiêm ƀuôn prŏng Hà Nội hdơr nanao kơ dŭm thŭn bi blah bŏ hŏng dleh dlan, Thượng tá Nguyễn Thị Minh yăl dliê: ñu dưi ruah mŭt hlăm bruă kahan ksiêm mơ̆ng 13 thŭn leh anăn jing 1 hlăm ênoh ƀiă hlăm sang hră “Phung kahan ksiêm mniê” hlăk anăn dưi ruah nao đru kơ kdrăn bi blah ti kwar Dhŭng. Thượng tá Nguyễn Thị Minh brei thâo, lu thŭn mă bruă ti kdrăn bi blah, hdĭp mda hlăm klei “êpa êsei, kƀah hra, êngoh bi ktư̆ nanao”, ƀiădah ai ktang phung hlăk ai đru ñu hgao klei dleh dlan bi leh bruă klam. Ñu ktưn hưn kyua myơr leh jih ênuk hlăk ai kơ klei mtlaih êngie kwar Dhung hluh lir ala čar.

“6 thŭn mă bruă ti kdrăn bi blah, phung hlăk ai ƀiădah dưi găn klei lông dlăng hlăm klei blah ngă leh anăn dleh dlan mơ̆ng klei bi blah. Kâo ƀuh pô hriê kơ prŏng leh anăn thâo lu klei. Lu blư̆ kâo nao mă bruă hlăm klei bi blah leh anăn gĭt gai hdră bi blah hŏng Võ Chí Công. Hlăk anăn kâo dôk điêt, bi kâo ba sa boh masin mkăp pui kmlă leh anăn 1 boh masin nao mbĭt hŏng êpul, hmei êmăn snăk ƀiădah huĭ kyua hlăk anăn phung roh srăng mnah djiê amâodah arăng mă hdĭp.”

Klei mblah dưi 30/4/1975 jing boh tŭ mơ̆ng klei bi blah, săn asei hlăm mbŏ 30 thŭn mơ̆ng lu ênuk mnuih Việt Nam. Anăn jing boh tŭ mơ̆ng klei bi mguôp jih djuê ana hŏng ai ktang, ti gŭ klei gĭt gai klă mngač mơ̆ng Đảng Cộng sản Việt Nam.  Klei mblah dưi anei ăt mâo mơ̆ng ai tiê čiăng kơ klei êngiê, klei êđăp ênang hluh lir čar kwar mơ̆ng jih jang djuê ana Việt Nam. K’iăng nai prŏng, nai prĭn Nguyễn Danh Tiên, Khua Anôk bruă sang hră hƀuê ênuk đảng Đảng, Sang hră kđi čar ala čar Hồ Chí Minh bi mklă:

Klei tŭ dưi mơ̆ng klei blah bi kdơ̆ng hŏng Mi mtlaih ala čar drei êlâo hĭn jing klei tŭ dưi mơ̆ng êlan kđi čar, êlan lĭng kahan êngiê, čŏng ngă, mbruă mơ̆ng Đảng. Hlăm klei bi blah bi kdơ̆ng hŏng Mi kyua mâo Đảng iêô mkrum ai ktang jih ƀuôn sang anăn jih 3 êpul kahan hrăm mbĭt hŏng êpul kđi čar mâo klei bi hgŭm kjăp bi blah kahan ƀuôn hŏng kahan phŭn, bi mguôp bi blah phao ktuang hŏng klei bi blah kđi čar, bi mguôp bi blah lĭng kahan hŏng klei krŭ kdơ̆ng mơ̆ng ƀuôn sang hŏng blŭ “Jih jang mnuih ƀuôn sang đru bi blah, đru kluôm ênŭm kơ klei bi blah”

K’iăng nai prŏng, nai prĭn Bùi Đình Phong, Sang hră kđi čar ala čar Hồ Chí Minh lač: Klei tŭ dưn mơ̆ng klei bi blah bi kdơ̆ng hŏng Mi mtlaih ala čar jing klei tŭ dưn yuôm bhăn mơ̆ng mnuih ƀuôn sang Việt Nam. Klei tŭ dưn anei mâo lu mta phŭn. Hlăm anăn mta phŭn kluôm jing: Kyua mâo êlan djŏ klă, Đảng bi klin jih ai tiê mnuih ƀuôn sang, ai ktang mơ̆ng 2 kwar Dhŭng- Dưr leh anăn ai tiê bi hgŭm lu ala čar. Hruê anei, ai tiê bi hgŭm jih djuê ana brei lŏ dơ̆ng mđĭ lar mkra mđĭ rơ̆ng ƀrư̆ hruê kjăp hĭn.

“Hruê anei, bruă krŭ kdơ̆ng mtlaih êngiê kwar Dhŭng găn leh dŭm pluh thŭn. Ară anei hlăm klei mrâo ară anei mâo lu klei brei ngă ƀiădah 1 hlăm dŭm klei yuôm bhăn amâo dưi amâo ngă ôh jing brei mđĭ lar ai ktang bi hgŭm djuê ana. Čiăng bi hgŭm brei mâo hdră kñăm mbĭt, bam dah dŭm bruă yuôm bhăn mâo klei tŭ dưn kơ grăp čô mnuih čiăng arăng thâo Đảng mâo hdră êlan, bruă klă klơ̆ng. Boh nik bruă ngă mơ̆ng Đảng jing mđing msir mgaih klei hdĭp ai tiê mnơ̆ng dhơ̆ng, tơdah arăng ƀuh klei anăn snăn srăng bi hgŭm, bi klin ti gŭ hla čhiăm gru mơ̆ng Đảng leh anăn drei srăng mâo ai ktang răng mgang klei dưi, răng mgang Đảng”

Êbeh leh 48 thŭn êgao. Hƀuê ênuk ƀrư̆ êgao, drei ƀrư̆ thâo săng êalam hĭn hnơ̆ng kdrưk kơăm leh anăn klei thâo Việt Nam, klei hriăm yuôm bhăn mơ̆ng klei bi blah hŏng Mi, mtlaih ala čar, leh anăn hĭn mơh, anăn jing ai ktang bi hgŭm djuê ana ba klei tŭ dưi hƀuê ênuk. Hŏng klei đăo knang hlăm klei mlih mrâo leh anăn klei gĭt gai klă mngač mơ̆ng Đảng, hlăm êdei anăp ala čar, mnuih ƀuôn sang čang hmăng Đảng lŏ dơ̆ng bi êdah bruă klam hlăm êdei anăp lăn čar, bi êdah bruă klam jing mta phŭn hlăm klei bi hgŭm jih djuê ana čiăng mkŏ mjing leh anăn răng mgang čar kwar. Mđĭ lar ai ktang bi hgŭm jih djuê ana snăn Đảng bi hgŭm, klei gĭt gai mơ̆ng Gưl dlông brei bi hgŭm, brei jing gru mngač, lŏ dơ̆ng mđĭ lar ai ktang bi hgŭm čiăng ngă bruă mlih mrâo, mđĭ kyar lăn čar./.