Klei bi hluh 2 tĭng ti ktuê êlan êran pral mkŏ dliê hŏng êa ksĭ, mjing tur knơ̆ng čiăng srăng dưi găn êrô jih ktiê êlan anei hlăm knhal jih thŭn 2026 lehanăn ba hdră anei dưi mŭt ngă bruă akŏ thŭn 2027. Êlan mur găn čư̆ Phượng Hòang, plah wah čar Dak Lak lehanăn Khánh Hòa, dlông 1,7 km, hlăm hdră rŭ mkra XL 01, hdră mrô 2, mâo Anôk kriê dlăng hdră mrô 6, Phŭn bruă rŭ mdơ̆ng ngă pô duh bi liê.

Rŭ mdơ̆ng mơ̆ng mlan 4/2024, giăm 600 čô knuă druh, mnuih mă bruă mbĭt hŏng 180 kdrăp mnơ̆ng ngă bruă jih hruê mlam, bi hluh êlan mur nah hnuă hlăm mlan 10 thŭn êlâo lehanăn mlan 12 êgao dưi bi hluh êlan mur nah điâo. Hdră rŭ mdơ̆ng XL 01 hlăm hdră bruă mrô 2 êlan êran pral Khánh Hòa – Buôn Ma Thuột mao boh taih dlông 11 km. Mbĭt hŏng êlan mur Phượng Hoàng, hdră anei lŏ mâo 10 boh kban, lu kdrêč êlan. Ară anei jih jang bruă dưi ngă leh giăm 90%./.