Ti anôk bi kƀĭn, Khua knŭk kna Phạm Minh Chính lač klă: Hluê ngă bruă klam mđĭ kyar hdră duh mkra – ala ƀuôn thŭn 2025, wưng thŭn 2021 – 2025 hlăk tar rŏng lăn dôk amâo hơĭt, dleh dưi ksiêm dlăng. Ti ala čar, hdră duh mkra dôk hlăm wưng bi mlih, dôk “mkŏ wĭt” ala čar wăt ti Gưl dlông lehanăn alŭ wăl; klei truh jhat mơ̆ng yan adiê ngă, klei êa lip lêč kjham hmăi truh kơ hdră duh mkra mnia mblei lehanăn klei hdĭp mnuih ƀuôn sang. Khădah snăn, ăt mâo dŭm boh tŭ dưn hlăm djăp mta ra bruă. Thŭn 2025, Việt Nam mâo hnơ̆ng đĭ kyar 8,02%, dôk hlăm êpul mâo hnơ̆ng đĭ kyar lu ti krĭng lehanăn tar rŏng lăn, krơ̆ng kjăp hdră duh mkra kluôm, ksiêm dlăng klei prăk luič ênoh, rơ̆ng hdră đru kơ ala ƀuôn, klei hdĭp mnuih ƀuôn sang dưi mkra mđĭ, hdră lĭng kahan, răng mgang klei êđăp ênang dưi rơ̆ng kjăp, hdră tač êngao, ñŭ kma hŏng tač êngao dưi mtrŭt mđĭ, kơhưm dưi mkra mđĭ. Bi leh mta kñăm msir lăm sang dôk êjai.

Mkŏ mjing mđrăm mbĭt 100 boh sang hră mir gưl sa lehanăn dua ti să knông lăn. Hluê si Êpul hgŭm lu ala čar, ênoh mrô yâo mơak mơ̆ng Việt Nam thŭn 2025 dôk tal 46, đĭ 37 mrô mkă hŏng thŭn 2020. Pŏk ngă kjăp, tŭ dưn hdră mkŏ dăp, bi khuăt anôk bruă knŭk kna lehanăn bruă knŭk kna alŭ wăl 2 gưl mguôp hŏng bruă mtrŭt mđĭ hdră kah mbha gưl, klei dưi. Klei bi kƀĭn ba mdah 10 bruă klam, hdră msir phŭn djŏ tuôm kơ hdră mđĭ kyar bruă duh mkra – ala ƀuôn thŭn 2026 lehanăn dŭm thŭn ti anăp, lŏ dơ̆ng mlih mrâo čiăng hluê ngă tŭ dưn hdră mtrŭn Klei bi kƀĭn tal 14 mơ̆ng Đảng, dŭm hdră mă bruă mơ̆ng Knŭk kna./.