Hlăm 6 mlan akŏ thŭn anei, Anôk bruă mdrao mgŭn kdriêk Di Linh, čar Lâm Đồng mdrao leh 250 čô hđeh êka, hlăm anăn mkrah wah ênoh anăn jing klei truh hlăm êlan klông. Aê mdrao Lê Công Tuấn, Kơiăng khua Anôk bruă mdrao mgŭn brei thâo, kyua mâo klei bi hgŭm mơ̆ng lu êpul, anôk bruă, klei truh, boh nik klei mngăt êa hrŏ lu leh.

“Hlăm thŭn 2024 anei, klei truh, klei êka êkeh kơ phung hđeh hlăm kdriêk Di Linh hrŏ leh mkă hŏng dŭm thŭn êlâo, klei truh hlăm êlan klông mâo êbeh 50%. Kyua mâo klei bi hgŭm kjăp hŏng sang hră, mtô mblang kơ phung hđeh bi hrŏ klei đĭ êdeh ph’phŭt, mnuih ƀuôn sang mâo klei găl mđing kơ anak aneh hĭn kyua anăn dŭm klei êka, klei mngăt hlăm êa hrŏ lu mkă hŏng dŭm thŭn êlâo”.

Lăn ala dleh găn êrô, lu êa krông, ênao êa, knơ̆ng kdơ̆ng êa, čiăng gang mkhư̆ klei mngăt hlăm êa, dŭm êpul anôk bruă ti kdriêk Di Linh pŏk ngă leh hdră mdơ̆ng dŭm êtuh pŏk mdhă mtă brei mđing răng ti dŭm ênao êa, knơ̆ng kdơ̆ng êa; dưm ao mluh, ana kyâo, klei, mran… ti dŭm anôk anei. Mtô mblang kơ mnuih ƀuôn sang gang kjăp êlan nao mŭt hlăm ênao êa điêt mơ̆ng gŏ sang. Hluê si Ninh Thị Một, Khua êpul mnuih ƀuôn sang dôk mrô 17, wăl krah Di Linh, kdriêk Di Linh, leh mtô mblang, mtrŭt mjhar, mnuih ƀuôn sang čŏng pô hluê ngă, mkra gru hmô gang mkhư̆ klei mngăt hlăm êa ti sang.

“Leh mtô mblang mnuih ƀuôn sang čŏng pô blei dŭm mta mnơ̆ng čiăng yua mkra klei dhiang mâo ao mlut hlăm ênao êa, čiăng mâo hdră gang mkhư̆ klei mngăt hlăm êa hluê si klei ktrâo lač mơ̆ng Anôk gĭt gai hdră gang mkhư̆ klei mngăt hlăm êa ti wăl krah”.

 Lưu Thị Thủy Chung, ti alŭ mnuih ƀuôn sang dôk mrô 17, wăl krah Di Linh, čar Lâm Đồng brei thâo, gŏ sang mâo klei sa ênao điêt mgơ̆ng êa êlam 10 met hlăm wăl sang čiăng mkăp kơ bruă krih êa. Čiăng rơ̆ng klei êđăp ênang, amai mkra mnư̆ gang, kă krañ mâo ƀăng jang kñăm bi hrŏ mnuih mŭt kbiă, huĭ tăm mâo klei truh.

“Ênao êa anei mkăp kơ bruă krih êa mnơ̆ng pla, kyua anăn êpul phung mniê hriê ktrâo lač kơ hdră kă dhiang klei lehanăn kă pông êdeh ksu tơdah  mâo mnuih tăm lĕ snăn arăng ktŭng klei dôk guôn mnuih nao đru. Djiêu gah ênao êa lŏ mâo mnư̆ gang lehanăn mkra ƀăng jang bi hrŏ ênoh mnuih mŭt kbiă. Pô mâo bruă čiăng nao hlăm lam kơh pŏk ƀăng.

Bruă mtô luê lehanăn mjuăt bi hriăm klei thâo rơ̆ng êđăp ênang hlăm ênao êa kơ phung hđeh ăt mâo kdriêk Di Linh mđing pŏk ngă. Hlăm yan bhang êgao, mâo leh dŭm pluh boh adŭ mtô luê kơ phung hđeh ti dŭm să, wăl krah. Hluê Hà Thị Thùy Linh, Khua Êpul bruă mniê kdriêk Di Linh, čar Lâm Đồng, jing mnuih hgŭm hlăm êpul, bruă phung mniê dŭm gưl jing êpul phŭn nao hgŭm mtô mblang mđĭ klei thâo săng kơ hdră gang mkhư̆ klei truh êka êkeh, mngăt hlăm êa kơ phung hđeh.

“Bi hgŭm hŏng dŭm knơ̆ng, dhar bruă, êpul êya ti alŭ wăl nao hlăm hdră mtô mblang nah gŭ, pŏk adŭ bi hriăm luê kơ anak čô mnuih hgŭm hlăm êpul bruă mniê hlăm kluôm kdriêk. Mơ̆ng anăn kñăm mđĭ klei thâo săng kơ phung mniê lehanăn phung hđeh, đru rơ̆ng mâo klei hdĭp êđăp ênang. Mjing klei găl kơ phung hđeh mâo wăl anôk đĭ kyar kluôm dhuôm.

Dŭm alŭ mtô luê đru leh kơ phung hđeh mprăp klei thâo săng rơ̆ng klei êđăp ênang hlăm êa lehanăn mjuăt ktang asei mlei, mâo dŭm bruă ngă jăk, tŭ dưn hlăm wưng yan mdei prŏng. Adei Nguyễn Thiên Di, 13 thŭn, să Liên Đầm, kdriêk Di Linh, čar Lâm Đồng, brei thâo:

“Kâo hriăm luê 2 hruê kăm leh, mâo phung nai mtô bi hriăm. Hlăm yan mdei prŏng dưi hriăm luê kñăm gang mkhư̆ klei mngăt êa lehanăn mđĭ klei suaih pral kơ pô”.

Adei Trịnh Ngọc Bảo Châu, 12 thŭn, dôk ti să Liên Đầm brei thâo:

“Pô hriăm luê, snăn tơdah tăm lĕ hlăm êa êlam, pô thâo luê čiăng đĭ ti hang.

Hŏng klei hgŭm mơ̆ng bruă sang čư̆ êa alŭ wăl lehanăn dŭm êpul êya bruă, klei truh, êka êkeh, klei mngăt hlăm êa mơ̆ng phung hđeh ti kdriêk Di Linh mâo leh klei bi mlih, hrŏ lu, mjing klei găl kơ phung hđeh dưi hlăp lêñ, đĭ hriê kơ prŏng kluôm dhuôm lehanăn hdĭp êđăp ênang./.