Hdră hrŏng ruah mâo čar hlue ngă hlăm lar ƀar. Hlăm klei bi lông mŭt adŭ 10 knŏng hŏng sang hră truăn. Thŭn hriăm anei čar Lâm Đồng mâo êbeh 54.800 čô phung hđeh hriăm hră adŭ 9; ênoh čuăn kơ adŭ 10 hlăm čar thŭn hriăm tinăp jing giăm 45.000 čô phung hđeh hriăm hră, hlăm anăn dŭm boh sang hră gưl 3 ngă klei hrŏng iêo mŭt mâo 42.500 čô phung hđeh, 4 boh sang hră gưl 3 truăn srăng mkŏ mjing klei bi lông kơ giăm 1.300 čô hđeh hriăm hră, lehanăn dŭm boh sang hră knŭk kna čiêm rông hđeh mnuih djuê ƀiă srăng hrŏng ruah hlăm brô 1.000 čô hđeh hriăm hră. Hdră êlan hrŏng ruah tui hlue mdê bi alŭ wăl.

Ti krĭng bi kñông plah wah dŭm boh ƀuôn hgŭm, hđeh hriăm hră ngă hră akâo nao hriăm ti dŭm sang hră jing jĕ hĭn hŏng sang pô. Klei ngă hră mơar mŭt adŭ 10 dŭm boh sang hră knŭk kna ti  Lâm Đồng dưi ngă mơ̆ng hrue 25 - 30/5 hŏng bruă ngă hră mơar hlăm onlnie. Klei hrŏng ruah srăng mkŏ mjing mơ̆ng hrue 15 - 24/7 lehanăn bi ruĕ hlăm hrue 31/7. Leh kơ anăn dŭm boh sang hră gưl 3 êngao knŭk kna, dŭm boh sang hră anôk mjuăt bi hriăm nanao, sang hră mtô bruă ti Lâm Đồng srăng mkŏ mjing klei hrŏng ruah, lehanăn bi leh êlâo kơ hrue 31/8/2026.