Dŭm hruê akŏ mlan 4, hlăm anôk rŭ mdơ̆ng mrô 2 (XL02) hlăm hdră bruă tal 2 2 êlan dơ̆ng êran pral Khánh Hòa – Ƀuôn Ama Thuôt, ai êwa rŭ mdơ̆ng dôk mkŏ mjing mjêč. Grăp êpul mă bruă, phung kra mjing hŏng lu masin, kdrăp mnơ̆ng mơ̆ng Knơ̆ng bruă bi liê leh anăn rŭ mdơ̆ng êlan klông Phương Thành dôk mjêč mkra bêtông, tuh êlan leh anăn tuh gu drŏng hlăm êlan kban. Ayŏng Đỗ Đình Huấn, mgăt êdeh čuk hli lăn brei thâo, hlăm boh klei ênoh êa xăng êa pui đĭ, bruă b yua kdrăp mnơ̆ng dưi brei ngă kjăp, djŏ guôp hĭn kñăm mkiêt mkriêm ênoh bi liê leh anăn rơ̆ng hnơ̆ng ngă bruă.

“Ayŏng adei pral mkiêt mkriêm ba yua masin snăn ngă djŏ hnơ̆ng, mđĭ mtrŭn masin bi knar. Hlăk dŭ mdiăng ăt êran êmưt, krơ̆ng hnơ̆ng ga êdeh hơĭt, amâo mđĭ sa blư̆ ôh srăng liê lu êa xăng êa pui. Hlăk dôk guôn êdeh dŭ mdiăng, amâodah mdei snăn mdjiê hĕ masin čiăng mkiêt mkriêm êa săng, êa pui.”

Hlue si Lương Công Lý, Khua gĭt gai bruă rŭ mdơ̆ng XL02, ênoh êa pui đĭ leh anăn phŭn mkăp hin ngă kơ ênoh bi liê ba yua masin đĭ leh lu snăk, mbĭt anăn lŏ ngă kơ ênoh kdrăp mnơ̆ng msĕ si msei, ximăng, čuah, boh tâo đĭ truh 20%. Ti anăp klei anei, anôk bruă pral gĭt gai mbruă phŭn mkăp êa pui diesel leh anăn mkra mlih hdră kčah rŭ mdơ̆ng, kñăm rơ̆ng djăp êa pui êa xăng leh anăn krơ̆ng hnơ̆ng hdră bruă.

“Phŭn mkăp êa săng êa pui leh anăn mnơ̆ng dhơ̆ng mkra mjing đĭ lu leh anăn hin, hmei pral duah thiăm phŭn mkăp čiăng rơ̆ng hdră ngă bruă. Mbĭt anăn, ăt ksiêm dlăng, bi hrŏ leh anăn mđing pŏk ngă dŭm mta bruă phŭn msĕ si tuh gu drŏng êlan ti dŭm kdrêč êlan phŭn.”

Ai êwa rŭ mdơ̆ng mjêč ăt dôk mkŏ mjing hlăm anôk rŭ mdơ̆ng mrô 3 (XL03), hlăm hdră bruă kdrêč 2 êlan dơ̆ng êran pral Khánh Hòa – Ƀuôn Ama Thuôt. Ênoh rŭ mdơ̆ng mâo ênoh jih jang hlăm brô 1000 êklai prăk, mâo 2 ƀăng mur, êlan kban leh anăn hlăm brô 2,5 km êlan. Trịnh Trung Lượng, Khua gĭt gai hdră bruă XL03 brei thâo, giăm sa mlan êgao, ênoh êa pui đĭ, phŭn mkăp mâo wưng hĭn ngă kơ anôk bruă duh mkra tuôm hŏng lu klei dleh dlan. Wăt tơdah snăn, anôk bruă ăt mđĭ lar hlăm brô 250 čô mnuih mă  bruă, phung mkra mjing hŏng 100 masin, kdrăp mnơ̆ng čiăng rơ̆ng hnơ̆ng rŭ mdơ̆ng.

 Ară anei dôk mŭt hlăm wưng yan không, klei yăl yan adiê jăk kơ bruă rŭ mdơ̆ng kyua anăn grăp hruê anôk bruă čiăng hlăm brô 4.000 lít êa pui diesel čiăng dŭ mdiăng masin. Kyua anăn, hlue si Trịnh Trung Lượng, bruă rơ̆ng phŭn mkăp êa săng êa pui hơĭt jing klei dôk ksiêm mkă dŭm anôk bruă dôk kƀĭn msir mgaih.

“Ênoh êa pui đĭ lu snăn lŏ hin mơh ngă kơ hmei mprăp bi nik. Hmei pral mă bruă hŏng dŭm anôk bruă mkăp čiăng blei mnơ̆ng hnưm, blei lu leh anăn pioh. Ară anei hmei dôk  kriê pioh 3 mgơ̆ng prŏng mơ̆ng 15 êbâo truh 20.000 lít êa pui diezel leh anăn srăng yua rŭ mdơ̆ng mơ̆ng 1-1,5 mlan.”

Rŭ mdơ̆ng mơ̆ng mlan 6/2023 hŏng ênoh bi liê giăm 22 êbâo êklai prăk, êlan dơ̆ng êran pral Khánh Hòa – Ƀuôn Ama Thuôt dưi čang hmăng mjing klei êdah kdlưn kơ klei bi hgŭm krĭng Lăn dap Kngư leh anăn ktuê hang ksĭ Dhŭng kwar krah. Hlăm boh klei ênoh êa săng êa pui đĭ, phung rŭ mdơ̆ng hdră bruă pral pŏk ngă lu hdră msir čiăng rơ̆ng hnơ̆ng hlue ngă klei Khua knŭk kna gĭt gai.