Ti tač êdeh phiơr Phù Cát, êpul kahan ksiêm dăp leh dua tal kiă hŏng klei kjăp, mơ̆ng alŭ wăl nah êngao hlŏng truh hlăm lam tač êdeh phiơr. Bruă ksiêm dlăng êlâo kơ gưl phiơr mâo ngă hŏng klei kjăp, ƀiădah ăt mjing klei găl êđăp ênang kơ jih jang tue đĭ êdeh phiơr. Ƀuh sĭt klei anăn, mâo lu phung tue lač, mnuih mă bruă titač êdeh phiơưr bŏ hŏng klei pral, êđăp ênang lehanăn mnhač tlao êdi. Hoàng Thị Thùy, jing tue hriê mơ̆ng Hà Nội lač:

Băng: “Truh kơ tač êdeh phiơr Phù Cát kâo ƀuh klei mă bruă tinei bŏ hŏng klei êđăp ênang, lehanăn pral snăk. Tơdah mâo wưng găl kâo srăng lŏ hriê, ruah jing anôk hiu čhưn ênguê jăk truh hŏng Quy Nhơn sa blư̆ dơ̆ng mơh.”

Tui si anôk bruă kiă kriê klei mŭt kbiă mơ̆ng tač êdeh phiơr, anôk bruă kahan ksiêm čar Gia Lai, knŏng hlăm mkrah mlan êgao, êpul bruă djŏ tuôm mâo mghaih msir leh truh giăm 300 gưl phiơr, hŏng giăm 50.000 čô tuê đĭ. Mbĭt anăn, grăp hruê lŏ iêp dŭm pluh tôn mnơ̆ng pioh mdiăng hŏng êdeh phiơr găn dua bĭt tač êdeh phiơr   Pleiku lehanăn Phù Cát.

Thượng tá Ngô Lam Sơn, K’iăng khua adŭ bruă kiă kriê klei mŭt kbiă, mơ̆ng knơ̆ng bruă kahan ksiêm čar Gia Lai brei thâo, êpul êya mă bruă hŏng jih ai tiê, ngă djŏ hŏng mta mtrŭn, mbĭt anăn mjing djăp klei găl mơh kơ phung tue, čiăng dưi iêo jak lu tuê hriê čhưn truh hŏng alŭ wăl pô dôk hlăm thŭn hiu čhưn ênguê lăn čar.

Băng: “Khua kiă kriê êpul bruă mâo leh klei bi kƀĭn kčĕ kơ phung knuă druh nga kjăp jih jang bruă hlăm tač êdeh phiơr, mđing mbĭt hŏng bruă hâo hưn, bi blŭ hrăm hŏng tue hlăm klei êdu êun, mjing klei jăk hŏng tue hlăm klei mhač tlao, čiăng kơ digơ̆ mâo klei mơak nanao truh hŏng tač êdeh phiơr. Lehanăn bi mguôp hŏng ACV Phù Cát mkra dŭm pano, hdră mă bruă čiăng jĕ giăm hĭn hŏng tue tơdah truh leh ti tač êdeh phiơr, čiăng kơ diñu dưi ƀuh, lehanăn mâo klei sa ai.’

   Thŭn hiu čhưn ênguê lăn čar 2026, čar Gia Lai mâo ênoh kčah hlăm brô 15 êklăk gưl čô tue hlăm ala čar lehanăn mơ̆ng ala tač êngao. Mbĭt hŏng bruă răng mgang kjăp klei êđăp ênang hlăm dŭm boh tač êdeh phiơr, Gia Lai ăt mtă kơ dŭm knơ̆ng bruă êdeh phiơr mđĭ hĭn gưl phiơr truh hŏng tač êdeh phiơr Pleiku lehanăn Phù Cát, nao hŏng dŭm bruă prŏng hlăm thŭn./.