Hlăm wưng êgao, bruă hluê hdră dŭm hdră ala čar kñăm dưi mâo lu boh tŭ dưn yuôm bhăn, đru mguôp hlăm klei mđĭ kyar bruă duh mkra ala ƀuôn mơ̆ng lăn čar. Hdră ala čar kñăm mkŏ mkra krĭng ƀuôn sang mrâo, bi hrŏ ƀun hơĭt kjăp (wưng thŭn 2021 - 2025 dưi mâo leh anăn êgao hdră kčah dŭm mta kñăm, ênoh čuăn. Hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ chiăng wưng tal 1 (2021 - 2025) dưi bi leh 6/9 êpul mta kñăm.

Mnă ktang dŭm mta phŭn mơ̆ng 3 hdră kñăm nao mbĭt hŏng klei mđĭ kyar krĭng ƀuôn sang, hdră duh ƀơ̆ng, bruă mkŏ mkra, phung ƀun ƀin leh anăn bi hơĭt klei hdĭp krĭng ƀuôn sang čư̆ čhiăng, dŭm klei blŭ mguôp lač bruă bi kƀĭn 3 hdră jing găl guôp, rơ̆ng kơ klei hrăm mbĭt hlăm bruă kriê dlăng, pluă mbĭt ai dưi, mđĭ boh tŭ dưn klei duh bi liê, bi klă dŭm ênoh čuăn, hdră êlan duh bi liê, hdră êlan mtô kơ klei ksiêm dlăng, mbĭt anăn bi hrŏ klei lăp wĭt, mđĭ hnơ̆ng ai dưi ba yua klei duh bi liê bruă Knŭk kna. Bi kơ hdră bhiăn bi kƀĭn, k’iăng Khua Knŭk kna Nguyễn Hòa Bình mñă amâo mâo bi mlih jih jang mta kñăm, pô đru, hdră êlan mâo leh bruă Kƀĭn ala bi klă hŏng 3 hdră, mmông ngă bruă truh thŭn 2035, knŏng čiăng mgaih msir klei lăp wĭt leh anăn Hdră êlan mrâo amâo lŏ wĭt mkŏ mjing, amâo lŏ wĭt bi klă. Anôk bruă gĭt gai mơ̆ng 3 hdră jing Knŭk kna, Phŭn bruă ngăn prăk jing pô phŭn.