Dôk hlăm yan hjan, Thiếu tá Nguyễn Phúc Thuận (Kđông kahan răng mgang knông lăn Dak Lao), ktrâo lač kơ mnuih ƀuôn sang alŭ Dak Thọ, să Dak Lao, kdriêk Dak Mil, čar Dak Nông hdră dlăng kriê wiê ênăk ana kphê. Mơ̆ng leh wĭt hgŭm nao mjĕ mjuk hŏng anôk bruă Đảng alŭ Dak Thọ, ayŏng hrăm mbĭt hŏng mnuih ƀuôn sang hlăm bruă pla mjing, ƀrư̆ mđĭ mlih klei hdĭp mnuih ƀuôn sang ti krĭng knông lăn.

         “Čiăng rơ̆ng kơ mjeh mnơ̆ng pla, mnơ̆ng rông djŏ guôp, snăn kâo tui ksiêm, bi hgŭm hŏng Êpul hgŭm mnuih ngă lŏ hma să, mơ̆ng kdriêk ksiêm hriăm dŭm mjeh mnơ̆ng pla djŏ guôp čiăng đru kčĕ kơ mnuih ƀuôn sang pla. Atăt ba phung hriăm gưl prŏng bi trông hŏng mnuih ƀuôn sang kơ hdră mă bruă djŏ guôp čiăng kơ mnuih ƀuôn sang dưi ba yua. Kâo ăt tiŏ nao phung knuă druh nao ti grăp alŭ wăl, grăp boh ƀuôn čiăng đru kơ mnuih ƀuôn sang dleh dlan.

Nguyễn Khắc Chinh, Khua bruă Đảng alŭ Dak Thọ, să knông lăn Dak Lao, kdriêk Dak Mil, čar Dak Nông brei thâo, mơ̆ng leh hruê Thiếu tá Nguyễn Phúc Thuận dưi tiŏ nao bi mjĕ mjuk, dŭm klei bi kƀĭn dưi mkŏ mjing mčhĭt m’uăt hĭn. Lu hdră mtrŭn klă sĭt hŏng klei hdĭp, bruă pla mjing dưi pŏk ngă tŭ dưn. Phung đảng viên ăt thâo săng bruă đua klam ba akŏ mơ̆ng pô, gĭr mđĭ kyar bruă duh mkra, jhŏng bi mlih mnơ̆ng pla, mnơ̆ng rông. Thiếu tá Thuận mbĭt hŏng bruă Đảng alŭ mtrŭt mjhar, đru rŭ mdơ̆ng 4 boh sang bi đru.

“Thuận jing sa čô knuă druh mda asei, pral kdal, hur har kơ bruă. Mtă mtă kơ bruă Đảng lehanăn mnuih ƀuôn sang hlăm ƀuôn kơ hdră pla mjing, hluê ngă jăk bruă răng mgang krĭng knông lăn, năng mpŭ lehanăn bo hŏng klei thâo khăp êdi.

Kjăp hdră “Tlâo jhŏng, pă mbĭt” čiăng “ñŭ kma ƀrư̆ ƀrư̆”, phung đảng viên kđông kahan răng mgang knông lăn dưi mjĕ mjuk hŏng anôk bruă đảng alŭ, buôn ti krĭng knông lăn Dak Nông đru kơ mnuih ƀuôn sang ƀrư̆ bi mlih klei mĭn, hdră ngă, mđĭ mlih klei hdĭp. H’Xuân, K’iăng khua bruă Đảng kdriêk Dak Mil, čar Dak Nông brei thâo:

“Hŏng êpul kahan răng mgang knông lăn kluôm kdriêk mkŏ mkra leh lu gru hmô, hdră dưi kah mbha, bi đru lu mơh. Dŭm hdră anăn dưi bi lar bra, mnuih ƀuôn sang alŭ wăl mkă tĭng jăk mơh. Đru mguôp hlăm hdră mkŏ mkra ƀuôn sang Dak Mil, boh nik hluê ngă dŭm hdră mtrŭn mơ̆ng Đảng kơ klei mđĭ kyar bruă duh mkra ala ƀuôn lehanăn mkŏ mkra hdră jih jang mnuih ƀuôn sang răng mgang klei êđăp ênang ti alŭ wăl kdriêk.

            Hŏng klei đru mơ̆ng phung lĭng kahan h’ô ao grat mtah, klei hdĭp, bruă duh mkra mơ̆ng mnuih ƀuôn sang ti krĭng knông lăn Dak Nông ƀrư̆ dưi mđĭ mlih. Mơ̆ng anăn, mnuih ƀuôn sang ăt mđĭ klei thâo răng mgang klei dưi kiă kriê kluôm ênŭm krĭng knông lăn ala čar. Y Quyết, mnuih djuê ana Mnông ti ƀuôn Sarpa, să Thuận An, kdriêk Dak Mil, pla kphê ti krĭng knông lăn Thuận Hạnh, brei thâo:

“Gŏ sang kâo mâo hma tinei, mâo gơ̆ng knăl knông lăn ti hma mtam. Grăp blư̆ nao mă bruă kâo ăt huai mdoh djiêu gah gơ̆ng knăl knông lăn. Tơdah ƀuh mnuih amâo thâo kral mŭt hlăm krĭng knông lăn kâo srăng hưn hŏng kahan răng mgang knông lăn thâo. Knuă druh, lĭng kahn kreh hiu suang dlăng nanao, kâo ăt h’ĭt mơh ai tiê ngă pưk hma tinei.

Hluê si Trung tá Lương Đình Hùng, Khua hlăm anôk bruă kđi čar kahan răng mgang knông lăn Dak Song, čar Dak Nông bi mklă bruă răng mgang knông lăn amâo djŏ knŏng jing bruă klam mơ̆ng phung lĭng kahan ƀiădah anei jing klei đua klam mơ̆ng jih jang mnuih ƀuôn sang. Êpul êya kreh mâo hdră đru kơ yang ƀuôn, dôk mbĭt huă mbĭt, thâo đru kơ mnuih ƀuôn sang krĭng knông lăn.

“Êpul êya jưh knang hlăm mnuih ƀuôn sang, mnuih ƀuôn sang jing pô phŭn hlăm hdră răng mgang knông lăn, lĭng kahan răng mgang knông lăn jing êpul êya ngă bruă phŭn. Grăp thŭn êpul bi hgŭm hŏng bruă sang čư̆ êa să mkŏ mjing lu hdră dhar kreh kdŏ mmuñ, mjuăt ktang asei mlei lehanăn ksiêm wĭt 1 thŭn hluê ngă hdră jih jang mnuih ƀuôn sang răng mgang klei êđăp ênang knông lăn, čiăng hrăm mbĭt hŏng mnuih ƀuôn sang hluê ngă jăk bruă klam răng mgang klei êđăp ênang ti alŭ wăl.

Dŭm thŭn êgao, lĭng kahan răng mgang knông lăn Dak Nông tiŏ nao leh 57 đảng viên wĭt mjĕ mjuk ti 55 alŭ, ƀuôn; jao bruă kơ 146 čô đảng viên wĭt đru grăp gŏ sang ti krĭng knông lăn. Hŏng dŭm bruă ngă klă sĭt lehanăn tŭ dưn, đru mđĭ mlih klei hdĭp mnuih djuê ƀiă, ksŭl mbŭ klei thâo bi mguôp lĭng kahan hŏng mnuih ƀuôn sang ti krĭng knông lăn. Anei jing tur knơ̆ng čiăng lĭng kahan răng mgang knông lăn Dak Nông mkŏ mjing hdră jih jang mnuih ƀuôn sang răng mgang klei êđăp ênang ti krĭng knông lăn hŏng klei h’ĭt kjăp lehanăn đĭ kyar./.