Hluê si hdră hlăm klei čuăl mkă, klei čuăn mđĭ kyar bruă duh mkra kjăp mơ̆ng krĭng Lăn Dăp Kngư srăng bi mâo ênŭm hluê si klei ba yua dŭm ai dưi leh anăn boh kdrŭt đĭ kyar mrâo hŏng klei kjăp, msĕ si bruă duh mkra mơ̆ng bruă lŏ hma bi mguôp hŏng klei mlih mrô, mđĭ lar dŭm mta bruă mâo klei găl msĕ si: Bruă hiu čhưn ênguê, tuh tia mkra mjing, pui kmlă doh, Ba dhar kreh krĭng Lăn Dăp Kngư jing boh krŭt, tur knơ̆ng kơ klei đĭ kyar leh anăn ñu kma hlăm Krĭng. Mkŏ mjing leh anăn đĭ kyar krĭng Lăn Dăp Kngư srăng bi mguôp bi kna plah wah mđĭ kyar bruă duh mkra dhar kreh, ala ƀuôn leh anăn răng mgang ngăn dŏ, wăl hdĭp mda nao mbĭt hŏng bruă lĭng kahan, răng mgang klei êđăp ênang leh anăn bruă hŏng tač êngao.

            Bi kơ bruă mkŏ mjing wăl Krĭng, Lăn dap kngư dưi mkŏ mjing mâo “3 kiêng – 2 krĭng điêt – 5 êlan knhal”. Hlăm anăn 3 kiêng đĭ kyar mâo: ƀuôn prŏng Pleiku, ƀuôn prŏng Ƀuôn Ama Thuôt leh anăn ƀuôn prŏng Đà Lạt. 5 êlan knhal bruă duh mkra mâo: Êlan knhal Ngŏ Yŭ, Êlan knhal bruă duh mkra Bờ Y – Pleiku - Quy Nhơn, êlan knhal Mundulkiri –Dak Lak – Phú Yên, êlan knhal bruă duh mkra ktuê êlan dơ̆ng pral Ƀuôn Ama Thuôt – Khánh Hoà, êlan knhal bruă duh mkra ktuê êlan dơ̆ng pral Dầu Giây – Đà Lạt – Nha Trang, êlan knhal bruă duh mkra Bu Prơ̆ng – Gia Nghĩa - Bảo Lộc – Bình Thuận. Hluê si k’iăng khua Phŭn bruă kiă kriê bruă knuă Nguyễn Trọng Thừa, čiăng mtrŭt mđĭ dŭm mta phŭn klei čuăl mkă, čiăng uêñ mĭn thiăm kơ dŭm hdră êlan kơ krĭng Lăn Dăp Kngư:

Tinei hmei ƀuh kƀah lu hdră êlan. Khădah mâo lu hdră mtrŭn, lu klei uêñ mĭn, ƀiădah krĭng Lăn Dăp Kngư dôk kƀah hdră êlan PV. Kâo mĭn hdră êlan tinei, ksiêm duah bi klă čiăng dưi kiă kriê, gĭt gai, mkŏ klei găl, ai ktang, ya ka mâo ôh phung duh bi liê prŏng? Hdră êlan mâo klei kpăk gun mơ̆, mâo klei kdlưn hĭn mơ̆, čiăng iêo jak arăng. Kâo mĭn, hlăm klei bi êdah čuăl mkă anei srăng mâo dŭm klei bi êdah kơ đa đa hdră êlan kơ krĭng Lăn Dăp Kngư kjăp ktang hĭn”.

Hdră čuăl mkă krĭng Lăn Dăp Kngư ăt mđing truh mtrŭt mđĭ mkŏ mjing dŭm anôk bruă duh mkra kluôm, thơ̆ng kơ bruă hluê si kơhưm leh anăn klei găl, mđĭ kyar wăl krah leh anăn dŭm alŭ ƀuôn sang krĭng ƀuôn sang djŏ guôp hŏng dŭm klei găl phŭn mrâo, knhuah dhar kreh leh anăn hdră êlan ngă bruă mrâo. Ƀiădah, dŭm mta kñăm anei dôk tuôm hŏng klei dleh kpăk, amâo mâo bi djŏ kyua klei pluă mbĭt mơ̆ng dŭm mta bruă. Êdah hĭn jing klei pluă mbĭ kơ klei čuăl mkă mnơ̆ng gŭ lăn, čuăl mkă yua lăn leh anăn dliê, hŏng klei čiăng đĭ kyar mơ̆ng krĭng Lăn Dăp Kngư. Phạm Ngọc Nghị, khua bruă sang čư êa čar Dak Lak lač klă dŭm klei bi klă kơ bruă krĭng Lăn Dăp Kngư amâo mâo đĭ kyar klei găl pô leh pui kmlă doh hưn sơnei:

Mñă kơ dŭm anôk bruă čuăl mkă ksiêm duah, bi mbŏ bruă pui kmlă doh hlăm hră anăn dŭm mta bruă djŏ tuôm mơ̆ng krĭng Lăn Dăp Kngư. Bruă hluê ngă dŭm hdră pui kmlă doh knŏng dưi hluê ngă êjai rơ̆ng mâo djăp hdră cuăl mkă tă êlan mtrŭt mjhar phung duh bi liê čhĭ pui kmlă sa anôk, čŏng mkra mjing čŏng ba yua ti dŭm anôk mkra mjing čiăng kơ lu pui kmlă ti alŭ wăl čar”.

            Hdră čuăl mkra krĭng Lăn Dăp Kngư truh ti thŭn 2030, tă hdră truh ti thŭn 2050 ăt mkăp wăl kơ klei đĭ kyar rơ̆ng bi hơĭt dŭm wăl dliê knŭk kna mkuôm, wăl kriê pioh čư̆ dliê, wăl kriê pioh mnơ̆ng dhơ̆ng hdĭp, wăl dliê hƀuê ênuk mâo boh tŭ bi lu jơr mnơ̆ng dhơ̆ng hdĭp, kriê pioh gen hlô mnơ̆ng, ana kyâo mtâo yuôm bhăn hlăm dŭm wăl dliê, mđĭ kyar dliê mkra mjing, pla dliê mă kyâo, bruă lŏ hma, dliê kmrơ̆ng bi mguôp, bruă dliê kmrơ̆ng êngao kơ mă kyâo, bruă dliê kmrơ̆ng yang ƀuôn, mnuih djuê ƀiă, mđĭ kyar bruă dliê kmrơ̆ng wăl krah, mđĭ kyar bruă tuh tia mkra mjing, mnia mblei mnơ̆ng hlăm dliê. Ƀrư̆ ƀrư̆ mlih yua êa ƀăng hŏng êa doh čiăng mđĭ klei êđăp ênang mkăp yua êa.

Gĭt gai mmông bi kƀĭn, Khua Phŭn bruă hdră êlan leh anăn duh bi liê Nguyễn Chí Dũng brei thâo, truh kơ ară anei, Hdră čuăl mkă krĭng Lăn Dăp Kngư dưi mơĭt truh leh kơ Dhar bruă mặt trận čar kwar gưl dlông Việt Nam leh anăn dŭm Phŭn, dhar bruă, alŭ wăl čiăng akâo klei blŭ. Phŭn bruă mâo mă leh lu klei blŭ mguôp yuôm bhăn čiăng ƀrư̆ ƀrư̆ bi kluôm hdră čuăl mkă leh anăn êdei kơ klei kƀĭn trông tal 2, ăt dôk guôn thiăm dŭm klei blŭ mguôp mơ̆ng dŭm phŭn, dhar bruă, alŭ wăl leh anăn phung kreh knhâo čiăng čuă mkra mđĭ kyar krĭng Lăn Dăp Kngư klă klơ̆ng djŏ guôp hŏng hdră êlan đĭ kyar mơ̆ng lăn čar, ba krĭng Lăn Dăp Kngư đĭ kyar mtah leh anăn kjăp, djŏ guôp hŏng klei mlih yan adiê.