VOV4.Êđê - Ti anôk mtô mjuăt bi hriăm kahan hang (ƀuôn prŏng Đà Lạt, čar Lâm Đồng), dŭm anôk bruă hlăm wăl kahan 7 leh anăn čar NinhThuận mkŏ mjing leh klei kƀĭn trông bi klă leh anăn mkŏ mjing hdră bi mguôp tui ngă hdră mtrŭn mrô 35 mơ̆ng phŭn bruă kđi čar kơ bruă mđĭ hĭn klei răng mgang tur knơ̆ng klei mĭn mơ̆ng Đảng, bi kdơ̆ng hŏng phung bi roh hlăm wưng aguah tlam mrâo.

Hlăm hruê mmông êgao, bruă Đảng mơ̆ng gưl dlông truh kơ alŭ wăl, bruă Đảng hlăm dŭm êpul êya răng mgang klei êđăp ênang, êpul gĭt gai mrô 35 mơ̆ng dŭm bruă Đảng čar, bruă Đảng ƀuôn prŏng truh kơ krĭng Ngŏ Dhŭng bi klă nanao kơ bruă răng mgang tur knơ̆ng klei mĭn mơ̆ng Đảng, bi kdơ̆ng hŏng dŭm klei mĭn soh čhuai, phung roh jing bruă klam kđi čar kñăm, mjêč leh anăn yuôm bhăn. Nguyễn Tấn Vinh, k’iăng khua kiă kriê anôk bruă ksiêm hriăm bruă kđi čar alŭ wăl 2 brei thâo: Ciăng tui ngă dŭm mta knăm, bruă klam leh anăn hdră êlan hlăm hdră mtrŭn mrô 35 mơ̆ng phŭn bruă kđi čar, čiăng mkŏ mjing leh anăn tui ngă mâo boh tŭ dưn dŭm mta phŭn djŏ guôp hŏng wưng mrâo.

Y-Bel pô mblang