VOV4.Êđê - Hdră “1 êklăk klei kcĕ, gĭr ktưn găn hgao klei dleh dlan, hŏng klei mbruă, jih ai dưi hŏng klei ruă tưp Covid-19” jing sa hlăm dŭm hdră kñăm mâo Êpul hgŭm mnuih mă bruă mtrŭt mjhar leh anăn hluê ngă mlan mnuih mă bruă hlăm wưng mlan 5 anei. Anei jing mmông găl čiăng bi klă kơhưm, čiăng kơ mnuih mă bruă amâo mâo mdei gĭr ktưn hŏng klei mbruă.

Hoàng Anh Tuấn – pô ngă bruă Angineering, knơ̆ng bruă Toyoda Boshoku, hlăm alŭ wăl duh mkra Nomora ƀuôn prŏng Hải Phòng, hlăm 13 thŭn ngă bruă hlăm anôk khăt mkra snăn mâo truh kơ 30 mta bruă hŏng klei mĭn mrâo dưi ba yua hlăm bruă knuă. Ƀiădah pưng myưng êdi, lehanăn amâo mâo dưi wơr ôh hŏng ñu năng ai hlăm wưng dôk ksiêm duah hdră “čuăl mkă bruă knuă čiăng kơ kdrăp camera thâo bi klă anôk mnơ̆ng čiăng khăt”.Khă dah knơ̆ng bruă iêo jak leh jih mnuih ngă bruă lŏ mă bruă êngao mmông, ƀiădah kăn dưi djăp rei. Bi tơdah lŏ blei sa boh kdrăp mrâo srăng liê truh 7 êklai prăk, snăn knơ̆ng bruă srăng luič mơ̆ng 2 – 3 thŭn kơh lŏ tla hnô ênoh leh bi liê anăn. Mơ̆ng anăn kâo bi mĭn ksiêm duah čiăng đăm liê ngăn prăk ôh ƀiădah ngă bruă, boh nik jing mmông camera bi klă anôk mnơ̆ng khăt amâo luič mmông ôh, snăn mâo mtam klei mĭn bi hrŏ mmông bi klă anôk mơ̆ng camera mtrang. Êlâo kơ bi mlih hdră mă bruă čiăng kơ pral hŏng camera mdei jing 103 giê secon, snăn êdei anei dưi lŏ bi hrŏ adôk mă 92 giê secon.

Klei mĭn anei mâo leh knơ̆ng bruă lông ba yua mơ̆ng mlan 3/2021. Leh ƀuh boh tŭ dưn jing jăk, snăn klei mĭn mâo ba kơ phung khua kiă kriê knơ̆ng bruă tŭ ư lehanăn brei ba yua hlăm lar ƀar ti anôk bruă mơ̆ng mlan 9/2021 hŏng klei tŭ dưn mâo ba wĭt truh 3,8 êklai prăk/thŭn. Anăn yơh jing klei bi mđĭ ai prŏng êdi hŏng Tuấn gĭr hgao klei dleh dlan, mâo lu klei mĭn jăk hĭn hlăm wưng kơ anăp.

Lŏ mâo sa klei mĭn jăk mkăn mơ̆ng ayŏng Nguyễn Thanh Tuấn, khua kiă kriê êpul kuai tuah mơ̆ng knơ̆ng bruă Hdăng Đèo Nai, hlăm Êpul Hdang boh tâo mnơ̆ng hlăm gŭ lăn Việt Nam, jing “ba yua phần mềm thâo kčĕ mơ̆ng kbưi”. Klei mĭng anei đru bi hrŏ leh mmông dôk guôn, mđĭ hĭn mmông mă bruă tŭ dưn mơ̆ng mnuih ngă bruă êjai dôk mă bruă, bi hrŏ čih pioh hlăm hră mơar msĕ si hđăp, mđĭ mmông mtrŭt mjhar mnuih ngă bruă jăk hĭn. Klei kăp mă tŭ klei kčĕ mơ̆ng kbưi, đru bi hrŏ leh ênoh bi liê kơ êdeh êdâo dŭ mdiăng mnuih ngă bruă, lehanăn mđĭ hĭng klei tŭ dưn ba yua kdrăp mrâo mrang kơ knuă druh, mnuih ngă bruă. Nguyễn Thanh Tuấn hưn kơ klei mĭn pô mâo anăn:Anôk bruă hdăng boh tâo hmei jing anôk ngă bruă bŏ hŏng klei suăi, kyua anăn yơh čiăng bi hrŏ dŭm mta bruă jing amâo mâo tŭ yuôm ôh, snăn mđĭ hĭn hnơ̆ng tŭ mnơ̆ng mâo ba wĭt, hdăng boh tâo dưi yap jing mmah jŭ kơ lăn čar drei. Knư̆ mâo lu mmông duh mĭn kơ bruă knuă hĭn jing jăk hĭn, kyua amâo lŏ ba yua ôh dŭm mta klei čih pioh hlăm hră mơar msĕ si hđăp. Asei kâo pô mtam yơh mđrăm mbĭt hŏng ayŏng adei nao hlăm anôk mă hdăng boh tâo dŭm pluh thŭn hŏng anei leh, snăn kâo ƀuh phung ayŏng adei mă bruă suăi snăk, lehanăn čiăng mâo klei tŭ dưn hĭn, snăn kâo mâo klei mĭn si srăng ngă čiăng bi hrŏ hĕ ya mta bruă jing amâo mâo tŭ ôh, lehanăn mđĭ hĭn boh tŭ dưn bruă knuă mă kơ ayŏng adei.

Hlăm hdră “1 êklăk klei mĭn mrâo – klei gĭr hgao klei dleh dlan, hlăm klei mbruă, gĭt ktĭr dưi hŏng klei ruă tưp Covid 19” mơ̆ng knơ̆ng kiă kriê mnuih ngă bruă Việt Nam, amâo mâo djŏ knŏng iêo jak lu mnuih ngă bruă ôh nao bi ksiêm duah hdră êlan mă bruă jăk hĭn, čiăng kơ mnuih ngă bruă lŏ mâo klei thâo gĭr hĭn, mă bruă mâo boh tŭ dưn hĭn. Trần Thanh Hải - K'iăng khua knơ̆ng kiă kriê mnuih ngă bruă Việt Nam, Khua êpul kiă kriê hdră “1 êklăk klei mĭn mrâo - klei gĭr hgao klei dleh dlan, hlăm klei mbruă, gĭr ktĭr dưi hŏng klei ruă tưp Covid 19” brei thâo:Hdră “1 êklăk klei mĭn mrâo - klei gĭr hgao klei dleh dlan, hlăm klei mbruă, gĭr ktĭr dưi hŏng klei ruă tưp Covid 19” bi klă leh kơ sa hdră êlan mă bruă mrâo mrang, dưi ba yua hlăm kdrăp mrâo jing bruă yuôm bhăn êdi hlăm bruă pô djă yua dŭm klei mĭn mrâo, leh bi ksiêm duah hlăm mbah hâo hưn mơ̆ng bruă công đoàn mkŏ mjing. Klei tal dua jing lač kơ klei mnuih ngă bruă dơ̆ng bi mâo lu klei mĭn jăk êjai dôk ngă bruă, kñăm čiăng kơ jih jang mmông pô dôk ngă bruă srăng pral hĭn, lehanăn dưi mâo leh êbeh 250 êbâo klei mĭn mrâo, mơ̆ng lu mnuih hlăm kluôm ala đru ba yua grăp thŭn hlăm wưng giăm anei. Klei anei brei ƀuh drei hlăk mâo leh ai mtrŭt jăk găl, lehanăn hŏng dŭm bruă knuă jing năng mơh, lŏ bi kơrŭ ai ktang klei thâo mĭn hlăm mnuih ngă bruă.

Hŏng lu phung duh mkra, klei mtrŭt mjhar, mđĭ bruă bi ktưn hlăm klei ngă bruă hŏng klei mbruă, mă bruă mâo klei thâo mĭn, lehanăn ară anei jing “1 êklăk klei mĭn mrâo – klei gĭr hgao klei dleh dlan, hlăm klei mbruă, gĭt ktĭr dưi hŏng klei ruă tưp Covid 19” đru leh lehanăn hlăk dôk đru mnuih ngă bruă dưn yua jih klei thâo pô... mơ̆ng anăn, đru mđĭ klei tŭ dưn bruă duh mkra mnia mblei, đru mguôp yuôm bhăn kơ klei mđĭ kyar anôk duh mkra, jing anôk mnuih ngă bruă bi mguôp, lehanan kñăm kơ bruă mđĭ kyar lăn čar./.